യൂറോപ്യന്‍ യൂണിയനില്‍ ചേരുന്നതിനുള്ള യുക്രെയിന്റെ അപേക്ഷ ഔദ്യോഗികമായി പരിഗണിക്കാന്‍ ശുപാര്‍ശ ചെയ്യുന്നതായി യൂറോപ്യന്‍ കമ്മിഷന്‍ അദ്ധ്യക്ഷ ഉര്‍സുല വോണ്‍ ഡെര്‍ ലെയ്ന്‍ അറിയിച്ചു. അതേ സമയം, ശുപാര്‍ശ അടുത്താഴ്ച നടക്കുന്ന 27 അംഗ ഇ.യു രാജ്യങ്ങളുടെ യോഗത്തില്‍ അംഗീകരിക്കേണ്ടതുണ്ട്. അംഗീകരിക്കപ്പെട്ടാല്‍ ഇ.യു അംഗത്വത്തിലേക്കുള്ള ആദ്യ ചവിട്ടുപടിയായി ഇതിനെ കാണാം. അംഗത്വം നേടുന്നതിന് വര്‍ഷങ്ങളോളം നീളുന്ന നടപടിക്രമങ്ങളാണ് വേണ്ടത്. യൂറോപ്യന്‍ യൂണിയനിലേക്കുള്ള അപേക്ഷ അംഗീകരിച്ചത് റഷ്യയെ പരാജയപ്പെടുത്താന്‍ തങ്ങളെ സഹായിക്കുമെന്ന് യുക്രെയിന്‍ പ്രസിഡന്റ് വൊളൊഡിമിര്‍ സെലെന്‍സ്‌കി പറഞ്ഞു.

അതേസമയം പാശ്ചാത്യ രാജ്യങ്ങള്‍ക്കെതിരെ പൊട്ടിത്തെറിച്ച് റഷ്യന്‍ പ്രസിഡന്റ് വ്‌ലാഡിമിര്‍ പുട്ടിന്‍. ഇന്നലെ സെന്റ് പീറ്റേഴ്‌സ്ബര്‍ഗ് ഇന്റര്‍നാഷണല്‍ ഇക്കണോമിക് ഫോറത്തില്‍ നടത്തിയ 73 മിനിറ്റ് നീണ്ട പ്രസംഗത്തിലാണ് പാശ്ചാത്യ രാജ്യങ്ങള്‍ക്കെതിരെ പുട്ടിന്‍ ആഞ്ഞടിച്ചത്. സൈബര്‍ ആക്രമണം നേരിട്ടതിനാല്‍ പരിപാടി തുടങ്ങാന്‍ വൈകിയെന്ന് റിപ്പോര്‍ട്ടുണ്ട്. പാശ്ചാത്യ രാജ്യങ്ങള്‍ റഷ്യയ്‌ക്കെതിരെ സ്വീകരിക്കുന്ന നടപടികള്‍ ഭ്രാന്തും വിവേകശൂന്യവുമാണെന്ന് പുട്ടിന്‍ പറഞ്ഞു.

ആവശ്യമുള്ളവരുമായി റഷ്യ സാമ്പത്തിക സഹകരണം വര്‍ദ്ധിപ്പിക്കുമെന്നും തങ്ങള്‍ക്കെതിരെയുള്ള പാശ്ചാത്യ ഉപരോധങ്ങള്‍ പരാജയപ്പെട്ടെന്നും ഏകധ്രുവ ലോകത്തിന്റെ യുഗം അവസാനിച്ചെന്നും പുട്ടിന്‍ പറഞ്ഞു. ഭക്ഷ്യ പ്രതിസന്ധിയ്ക്കും വിലക്കയറ്റത്തിനും റഷ്യ കാരണമല്ലെന്നും യു.എസ് ചെലവുകള്‍ വര്‍ദ്ധിപ്പിക്കുന്നതായും ധാന്യ കയറ്റുമതി കൂട്ടാന്‍ റഷ്യ തയാറാണെന്നും പുട്ടിന്‍ പറഞ്ഞു.

' യൂറോപ്യന്‍ യൂണിയന് അതിന്റെ രാഷ്ട്രീയ പരമാധികാരം നഷ്ടപ്പെട്ടു. അതിലെ നേതാക്കള്‍ അവരുടെ സ്വന്തം ജനങ്ങളുടെ ചെലവില്‍ മറ്റാരുടെയോ താളത്തിനൊത്ത് നൃത്തം ചവിട്ടുകയാണ്.' പുട്ടിന്‍ ആരോപിച്ചു. അമേരിക്ക മറ്റുള്ള രാജ്യങ്ങളെ അവരുടെ കോളനികളായി കാണുന്നുവെന്ന് കുറ്റപ്പെടുത്തിയ പുട്ടിന്‍ ലോക രാഷ്ട്രീയം ഇനി പഴയപോലെ ആകില്ലെന്ന് മുന്നറിയിപ്പ് നല്‍കി. ശക്തവും ആധുനികവുമായ രാജ്യമെന്ന നിലയില്‍ റഷ്യ ഒരു പുതിയ ആഗോളക്രമത്തിലേക്ക് പ്രവേശിക്കുകയാണെന്ന് പറഞ്ഞാണ് പുട്ടിന്‍ തന്റെ പ്രസംഗം അവസാനിപ്പിച്ചത്.