ഇന്ധനക്ഷാമം രൂക്ഷം... സര്‍ക്കാര്‍ ഓഫിസുകളും വിദ്യാലയങ്ങളും അടച്ചിടാനൊരുങ്ങി ശ്രീലങ്കന്‍ സര്‍ക്കാര്‍
ശ്രീലങ്കയില്‍ സാമ്പത്തിക പ്രതിസന്ധി രൂക്ഷമായി തുടരുന്ന സാഹചര്യത്തില്‍ ഇന്ധനക്ഷാമവും രൂക്ഷമായതിനാല്‍ സര്‍ക്കാര്‍ ഓഫിസുകളും വിദ്യാലയങ്ങളും അടച്ചിടാനൊരുങ്ങുകയാണ് ശ്രീലങ്കന്‍ സര്‍ക്കാര്‍. ക്ലാസുകള്‍ ഓണ്‍ലൈനാക്കുകയോ വെട്ടിക്കുറയ്ക്കുകയോ ചെയ്യണമെന്ന് സ്വകാര്യ വിദ്യാഭ്യാസ സ്ഥാപനങ്ങളോടും സര്‍ക്കാര്‍ ആവശ്യപ്പെട്ടു.
ഇന്ധന വിതരണത്തിലെ കടുത്ത പ്രതിസന്ധി, പൊതുഗതാഗതത്തിന്റെ കുറവ്, സ്വകാര്യ യാത്രാ സംവിധാനങ്ങളുടെ അപ്രായോഗികത എന്നിവ കണക്കിലെടുത്ത്, തിങ്കളാഴ്ചമുതല്‍ ഓഫിസുകളില്‍ അത്യാവശ്യം ജീവനക്കാര്‍മാത്രം ഹാജരായാല്‍ മതി' പൊതുഭരണ, ആഭ്യന്തര മന്ത്രാലയത്തിന്റെ ഉത്തരവില്‍ പറയുന്നു.ആരോഗ്യ മേഖലയിലെ ജീവനക്കാര്‍ പതിവുപോലെ ജോലിക്കെത്തണമെന്നും വ്യക്തമാക്കിയിട്ടുണ്ട്.
കൊളംബോ നഗരപരിധിയിലെ സര്‍ക്കാര്‍ സ്‌കൂളുകളും സര്‍ക്കാര്‍ അംഗീകൃത സ്വകാര്യ സ്‌കൂളുകളും അടുത്തയാഴ്ച തുറക്കില്ലെന്നാണ് വിദ്യാഭ്യാസ വകുപ്പിന്റെ സര്‍ക്കുലര്‍. ഓണ്‍ലൈന്‍ ക്ലാസുകള്‍ക്ക് അധ്യാപകര്‍ക്ക് നിര്‍ദേശം നല്‍കിയിട്ടുണ്ട്. മരുന്നിന്റെയും ഉപകരണങ്ങളുടെയും ലഭ്യതക്കുറവുമൂലം തിങ്കളാഴ്ച മുതല്‍ ശസ്ത്രക്രിയകള്‍ കുറയ്ക്കുമെന്ന് സര്‍ക്കാര്‍ ആശുപത്രികളിലെ ഹൃദ്രോഗവിദഗ്ധര്‍ വ്യക്തമാക്കി.
തരിശു ഭൂമിയില്‍ കൃഷിചെയ്യാന്‍ ശ്രീലങ്കന്‍ പട്ടാളത്തെ ഇറക്കാനും സര്‍ക്കാര്‍ തയാറായിട്ടുണ്ട്. ആസന്നമായ ഭക്ഷ്യക്ഷാമം ഒഴിവാക്കാനാണ് ശ്രമം. 1500 ഏക്കര്‍ ഭൂമിയിലാണ് പട്ടാളം കൃഷിയിറക്കുക. രാജ്യത്തിന്റെ ഭക്ഷ്യഭദ്രതാ പദ്ധതിക്ക് പ്രചാരവും സഹായവും നല്‍കാന്‍ ഗ്രീന്‍ അഗ്രിക്കള്‍ച്ചര്‍ സ്റ്റിയറിങ് കമ്മിറ്റിക്കും സൈന്യം രൂപം നല്‍കി.
https://www.facebook.com/Malayalivartha
