വഌദിമിര്‍ പുടിന്റെ ആരോഗ്യനില വളരെ മോശമെന്ന് സൂചന നല്‍കുന്ന വീഡിയോ പുറത്ത്. വിറയ്ക്കുന്നത് മൂലം എഴുന്നേറ്റു നില്‍ക്കാന്‍ പോലും ബുദ്ധിട്ടുന്ന റഷ്യന്‍ പ്രസിഡന്റ് പുടിന്റെ ദൃശ്യങ്ങളാണ് വീഡിയോയിലുള്ളത്. ക്രെംലിനില്‍ നടന്ന ഒരു അവാര്‍ഡ് വിതരണ പരിപാടിയുടെ വീഡിയോ ആണ് ഇത് ന്യൂയോര്‍ക്ക് ടൈംസാണ് ഇക്കാര്യം റിപ്പോര്‍ട്ട് ചെയ്തിരിക്കുന്നത്. വീഡിയോ സോഷ്യല്‍ മീഡിയയില്‍ വ്യാപകമായി പ്രചരിക്കുന്നുണ്ടെങ്കിലും അതിന്റെ ആധികാരികത സ്ഥിരീകരിക്കാന്‍ റഷ്യന്‍ ഏജന്‍സികള്‍ തയ്യാറായിട്ടില്ല.

സിനിമാ നിര്‍മാതാവായ നികിത മിഖയ്‌ലോവിന് അവാര്‍ഡ് നല്‍കിയ ശേഷം മുന്നോട്ടും പിന്നോട്ടും ആടുന്ന പുടിന്റെ ദൃശ്യങ്ങളാണ് വീഡിയോയിലുള്ളത്. 69 കാരനായ പുടിന്റെ ആരോഗ്യനില വളരെ മോശമാണെന്ന് നേരത്തെ തന്നെ റിപ്പോര്‍ട്ടുകളുണ്ടായിരുന്നു. യുക്രൈന്‍ ആക്രമണത്തിന് പിന്നാലെ ഇത് ശക്തമായി. പുടിന് രക്താര്‍ബുദമാണെന്ന് അദ്ദേഹവുമായി അടുപ്പമുള്ള ഒരു ഉദ്യോഗസ്ഥനെ ഉദ്ദരിച്ച് അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തിരുന്നു. എന്നാല്‍ എല്ലാ റിപ്പോര്‍ട്ടുകളും തള്ളിയ റഷ്യ പ്രസിഡന്റ് പൂര്‍ണ ആരോഗ്യവാനാണെന്നും അവകാശപ്പെട്ടിരുന്നു.

വിദേശ ഏജന്‍സികള്‍ തന്റെ ആരോഗ്യവിവരങ്ങള്‍ സ്വന്തമാക്കുമെന്ന് പുടിന്‍ ഭയപ്പെട്ടിരുന്നതായി ഡോക്ട്രൈന്‍ ആന്‍ഡ് സ്ട്രാറ്റജി കണ്‍സല്‍ട്ടിങ് പ്രസിഡന്റ് റബേക്ക കോഫ്‌ലറും യുഎസ് ഇന്റലിജന്‍സ് ഏജന്‍സിയായ സിഐഎയുടെ മുന്‍ ഉദ്യോഗസ്ഥനും സ്ഥിരീകരിച്ചിട്ടുണ്ട്. റഷ്യയുടെ ഫെഡറല്‍ ഗാര്‍ഡ് സര്‍വീസിന്റെ ഒരു ഉദ്യോഗസ്ഥന്‍ പുടിന്റെ മലവും മൂത്രവും ശേഖരിക്കുന്നതിനു മാത്രം കൂടെയുണ്ടാകുമെന്നാണ് ഫ്രഞ്ച് മാധ്യമം റിപ്പോര്‍ട്ട് ചെയ്യുന്നത്. ഇയാള്‍ എപ്പോഴും ഒരു സ്യൂട്ട് കെയ്‌സും കരുതും.

വിദേശ യാത്രാസമയങ്ങളില്‍ പുടിന്റെ മലവും മൂത്രവും അദ്ദേഹത്തിന്റെ സുരക്ഷാ ഉദ്യോഗസ്ഥര്‍ ശേഖരിച്ചു തിരികെക്കൊണ്ടുപോയിരുന്നതായും ഫ്രഞ്ച് മാധ്യമം റിപ്പോര്‍ട്ട് ചെയ്തിരുന്നു. പുടിന്റെ ആരോഗ്യസ്ഥിതിയെക്കുറിച്ച് യാതൊരു വിവരവും വിദേശ ഇന്റലിജന്‍സ് ഏജന്‍സികള്‍ക്ക് കിട്ടരുതെന്ന് ഉറപ്പാക്കാനാണ് റഷ്യന്‍ ഉദ്യോഗസ്ഥര്‍ ഇങ്ങനെ ചെയ്തത്. ഫ്രഞ്ച് മാധ്യമമായ 'പാരിസ് മാച്ച്' ആണ് ഇക്കാര്യം ആദ്യം റിപ്പോര്‍ട്ട് ചെയ്തത്. പുടിന്റെ മലവും മൂത്രവും പ്രത്യേക ബാഗുകളിലാക്കി മോസ്‌കോയിലേക്കു തന്നെ കൊണ്ടുപോകുകയാണു ചെയ്യുന്നത്. 2017 മേയ് 29നു പുടിന്‍ ഫ്രാന്‍സ് സന്ദര്‍ശിച്ചപ്പോഴും 2019 ഒക്ടോബറില്‍ സൗദിയിലെത്തിയപ്പോഴും ഈ രീതി പിന്തുടര്‍ന്നതായി റഷ്യന്‍ ഭരണത്തെക്കുറിച്ചു ഗവേഷണം നടത്തുന്ന മിഖായേല്‍ റൂബിന്‍ പ്രതികരിച്ചു. പുടിന്‍ റഷ്യ ഭരിക്കാന്‍ തുടങ്ങിയ കാലം മുതല്‍ തന്നെ ഇങ്ങനെ ചെയ്യുന്നുണ്ടെന്നാണു വിദഗ്ധര്‍ പറയുന്നത്.