തായ്‌വാന്‍ കീഴടക്കാനുള്ള നീക്കത്തില്‍ വിലങ്ങുതടിയായി നില്‍ക്കുന്ന അമേരിക്കയ്‌ക്കെതിരെ പ്രകോപനവുമായി വീണ്ടും ചൈന. പസഫിക് കേന്ദ്രീകരിച്ച് തങ്ങള്‍ക്കെതിരെ പടനയിച്ചാല്‍ ആദ്യം അമേരിക്കയുടെ എല്ലാ താവളങ്ങളും തകര്‍ക്കുമെന്ന ഭീഷണിയാണ് ബീജിംഗ് സൈനിക ഭരണകൂടം നടത്തിയിരിക്കുന്നത്.

ഇനി വാക്കുകൊണ്ടല്ല പ്രവൃത്തികൊണ്ട് അമേരിക്ക മനസ്സിലാക്കും. ഒരേയൊരു ചൈന എന്ന തത്വത്തില്‍ നിന്നും പിന്നോട്ടില്ല. തായ്വാന്‍ സ്വതന്ത്ര്യരാജ്യമെന്ന പ്രഖ്യാപനം എപ്പോള്‍ നടത്തിയാലും ആക്രമിക്കുമെന്ന മുന്നറിയിപ്പ് വീണ്ടും ബീജിംഗ് ഭരണകൂടം ആവര്‍ത്തിച്ചു.

ക്വാഡ് സഖ്യത്തിലൂടെ അമേരിക്ക ചൈനയെ വളയാന്‍ മറ്റ് രാജ്യങ്ങളെ ഉപയോഗപ്പെടുത്തു കയാണെന്ന ആരോപണം ചൈന ആവര്‍ത്തിച്ചു. ടോക്കിയോവില്‍ നടന്ന ക്വാഡ് സഖ്യ യോഗത്തിനിടെ ജപ്പാന്‍ വ്യോമമേഖലയിലേയ്ക്ക് വിമാനങ്ങളയച്ച് ചൈന നടത്തിയ പ്രകോപനത്തിന് പിന്നാലെയാണ് അമേരിക്കയുടെ സൈനിക താവളങ്ങള്‍ തകര്‍ക്കുമെന്ന ഭീഷണി നേരിട്ട് മുഴക്കിയിരിക്കുന്നത്.

തായ്വാന്‍ ചൈനയുടെ അവിഭാജ്യഘടകമാണ്. അതിന് അനുസരിച്ചുള്ള നയം മാറ്റം നടന്നില്ലെങ്കില്‍ ആക്രമിച്ച് കൂടെചേര്‍ക്കുമെന്ന നയത്തില്‍ നിന്ന് ഷീ ജിന്‍ പിംഗ് ഇതുവരെ തിരുത്തിപറഞ്ഞിട്ടില്ല. യുദ്ധം ചെയ്യാന്‍ മടിയില്ലെന്ന പിംഗിന്റെ ആവര്‍ത്തിച്ചുളള മുന്നറിയിപ്പ് റഷ്യയുക്രെയ്ന്‍ സംഘര്‍ഷത്തിന്റെ പശ്ചാത്തലത്തില്‍ ഏഷ്യന്‍ മേഖലയ്ക്ക വന്‍ ഭീഷണി തന്നെയാണ് .