ശ്രീലങ്കയിലെ ഹാംബന്‍തോട്ട തുറമുഖത്തേക്ക് വ്യാഴാഴ്ച എത്താനിരുന്ന ചൈനയുടെ ചാരക്കപ്പലായ ' യുവാന്‍ വാംഗ് 5 ' തുറമുഖത്തെത്താനാകാതെ ഇന്ത്യന്‍ മഹാസമുദ്രത്തില്‍ തന്നെ തുടരുന്നു. ഇന്ത്യയുടെ ആശങ്ക കണക്കിലെടുത്ത് ബാലിസ്റ്റിക് മിസൈലുകളെയും ഉപഗ്രഹങ്ങളെയും നിരീക്ഷിക്കാന്‍ കഴിയുന്ന കപ്പലിന് നങ്കൂരമിടാന്‍ ശ്രീലങ്ക ഇതുവരെ അനുമതി നല്‍കിയിട്ടില്ല.

എന്നാല്‍ ചൈനീസ് നിര്‍മ്മിത തുറമുഖമായയ ഹാംബന്‍തോട്ട തന്നെയാണ് ഇപ്പോഴും കപ്പലിന്റെ ലക്ഷ്യ സ്ഥാനം. കപ്പലിന്റെ വരവ് നീട്ടി വയ്ക്കാന്‍ ചൈനയോട് ശ്രീലങ്ക ആവശ്യപ്പെട്ടിട്ടുണ്ടെങ്കിലും കപ്പല്‍ ഹാംബന്‍തോട്ടയില്‍ എത്തുമോ ഇല്ലയോ എന്നതില്‍ ഔദ്യോഗിക അറിയിപ്പ് ഉണ്ടായിട്ടില്ല. നോര്‍വീജിയന്‍ കമ്പനിയായ മാരിടൈം ഒപ്റ്റിമ പുറത്തുവിട്ട ഉപഗ്രഹ വിശകലന ഡേറ്റ പ്രകാരം യുവാന്‍ വാംഗ് ഇന്നലെ ഹാംബന്‍തോട്ടയില്‍ നിന്ന് വേഗത കുറച്ച് 599 നോട്ടിക്കല്‍ മൈല്‍ അകലെയാണുണ്ടായിരുന്നത്.

തുറമുഖ നിര്‍മ്മാണത്തിനായി ചൈനയില്‍ നിന്ന് വാങ്ങിയ ഉയര്‍ന്ന പലിശയോട് കൂടിയ വായ്പ തിരിച്ചടയ്ക്കാന്‍ കഴിയാതെ വന്നതോടെ ഹാംബന്‍തോട്ടയെ ശ്രീലങ്കന്‍ സര്‍ക്കാര്‍ 2016ല്‍ ചൈനയ്ക്ക് 99 വര്‍ഷത്തെ പാട്ടത്തിന് നല്‍കിയിരുന്നു.

യുവാന്‍ വാംഗ് വിഷയത്തിലെ നയതന്ത്ര പ്രശ്‌നങ്ങള്‍ രാജ്യത്തെ ചൈനീസ് എംബസി വഴി നേരിട്ടാണ് ലങ്കന്‍ സര്‍ക്കാര്‍ ചര്‍ച്ച ചെയ്യുന്നത്. അതേ സമയം, കപ്പലിന്റെ വരവ് നീട്ടിവയ്ക്കാന്‍ ചൈനയോട് ആവശ്യപ്പെട്ടത് ശ്രീലങ്കന്‍ സര്‍ക്കാരിന് ഗുരുത പ്രത്യാഘാതമുണ്ടാക്കുമെന്ന് ചൈനയിലെ ലങ്കന്‍ എംബസി അറിയിച്ചു.

അതേ സമയം, യുവാന്‍ വാംഗിന്റെ പേരില്‍ ശ്രീലങ്കയുടെ മേല്‍ സമ്മര്‍ദ്ദം ചെലുത്തുന്നുവെന്ന ചൈനയുടെ വാദം ഇന്ത്യ നിഷേധിച്ചു. ശ്രീലങ്ക ഒരു പരമാധികാര രാജ്യമാണെന്നും അതിന് അതിന്റേതായ തീരുമാനങ്ങളുണ്ടെന്നും ഇന്ത്യന്‍ വിദേശകാര്യ മന്ത്രാലയ വക്താവ് അരിന്ദം ബാഗ്ചി പറഞ്ഞു.

യുവാന്‍ വാംഗിന്റെ വരവില്‍ ഇന്ത്യയെ കൂടാതെ യു.എസും ശ്രീലങ്കയെ കടുത്ത ആശങ്ക രേഖപ്പെടുത്തിയതായി റിപ്പോര്‍ട്ടുണ്ട്. ഇന്തോ പസഫിക് മേഖലയിലെ ചൈനീസ് ആധിപത്യത്തെ ചെറുക്കുക എന്നത് ബൈഡന്‍ ഭരണകൂടത്തിന്റെ പ്രധാന ലക്ഷ്യങ്ങളിലൊന്നാണ്.