വാഴപ്പഴം 1,20,000 ഡോളറിന് (ഏകദേശം 85 ലക്ഷത്തിലധികം ഇന്ത്യന്‍ രൂപയ്ക്ക്) വിറ്റ് പോയ സംഭവത്തില്‍ ട്വിസ്റ്റ്. പാരിസിലെ മിയാമി ബീച്ചിലെ ആര്‍ട്ട് ബേസിലില്‍ ഒരുക്കിയ ഈ ' കലാസൃഷ്ടി' നിമിഷങ്ങള്‍ക്കകമാണ് ഇത്ര വലിയ തുകയ്ക്ക് വിറ്റ് പോയത്.

മൗരീസിയോ കാറ്റെലന്‍ എന്ന കലാകാരന്‍ തയ്യാറാക്കിയ കൊമേഡിയന്‍ എന്ന പേരില്‍ അവതരിപ്പിച്ച വാഴപ്പഴത്തിന്റെ ഇന്‍സ്റ്റലേഷനാണ് മൂന്ന് പേര്‍ ചേര്‍ന്ന് 85 ലക്ഷം രൂപയ്ക്ക് വാങ്ങിയത്. എന്നാല്‍ മൂവര്‍ സംഘം വാങ്ങിയ കലാസൃഷ്ടി ന്യൂയോര്‍ക്കിലെ പ്രശസ്തനായ പ്രാങ്ക് അവതാരകന്‍ ഡേവിഡ് ഡാറ്റുന അനുവാദമില്ലാതെ ചുമരില്‍നിന്ന് എടുത്ത് കഴിച്ചതും ലോകശ്രദ്ധ നേടിയിരുന്നു.

ഇപ്പോഴിതാ ടേപ്പ് ഉപയോഗിച്ച് ഒട്ടിച്ചുവെച്ച വാഴപ്പഴം വീണ്ടും വാര്‍ത്തകളില്‍ നിറയുകയാണ്. കാരണമെന്തന്നല്ലേ? ലോകവ്യവസായത്തിന്റെ അടയാളമായി ദ്വയാര്‍ത്ഥ പ്രയോഗത്തില്‍ അവതരിപ്പിച്ച ആ ഇന്‍സ്റ്റലേഷന്‍ കോപ്പിയടിയാണെന്നുള്ള ഒരു പരാതി ഉയര്‍ന്നിരിക്കുകയാണിപ്പോള്‍.

2000 ത്തില്‍ ഒരു ചുവരില്‍ വാഴപ്പഴവും ഓറഞ്ചും ടേപ്പ് വെച്ച് ഒട്ടിച്ച ഇന്‍സ്റ്റലേഷനുമായി കൊമേഡിയന്‍ വാഴപ്പഴ ഇന്‍സ്റ്റലേഷന് വളരെയധികം സാമ്യമുണ്ടെന്നാണ് പരാതി. ജോ മോര്‍ഫോഡില്‍ എന്നയാളാണ് പരാതി നല്‍കിയത്. തന്റെ കലാസൃഷ്ടി കോപ്പി അടിച്ച് 85 ലക്ഷത്തോളം സ്വന്തമാക്കിയെന്നാണ് ഇയാള്‍ ആരോപിക്കുന്നത്.

കേസ് പരിഗണിച്ച കോടതി പക്ഷേ ഈ സൃഷ്ടികളെ എല്ലാം കലയായി കണക്കാക്കാമോ എന്നാണ് ആദ്യം ചോദിച്ചത്. ആശയങ്ങളില്‍ ആര്‍ക്കും പകര്‍പ്പവകാശം നേടാന്‍ കഴിയില്ലെന്നും അതിനാല്‍ ടേപ്പ് ഉപയോഗിച്ച് പഴങ്ങള്‍ ഒട്ടിക്കുന്ന സൃഷ്ടികളെ ഒരാളുടേതുമാക്കാന്‍ കഴിയില്ലെന്നും കോടതി പറഞ്ഞു. ജോ മോര്‍വേഡിന് വാഴപ്പഴത്തിലോ ടേപ്പിലോ പകര്‍പ്പവകാശം നേടാന്‍ കഴിയില്ലെന്ന് ജഡ്ജി കൂട്ടിച്ചേര്‍ത്തു.