കത്തിക്കരിഞ്ഞ ടാങ്കുകളുമായി കീവില് റഷ്യയ്ക്ക് ഒപ്പീസു ചൊല്ലി യുക്രൈനികള് റഷ്യയെ നാണം കെടുത്തുന്ന നീക്കം
യുക്രെയ്നിലെ റഷ്യന് അധിനിവേശത്തിന് ആറ് മാസം തികയുകയാണ്. നിസാരം എന്ന് കരുതി ഇറങ്ങിപ്പുറപ്പെട്ട റഷ്യക്ക് നഷ്ടക്കണക്കുകള് ചികഞ്ഞുപോയാല് അതേറെയാണ്. പൊരുതിക്കൊണ്ടേയിരിക്കുന്ന യുക്രെയ്ന് റഷ്യക്ക് മുന്നില് ഇന്നും മുന്നോട്ടുവയ്ക്കുന്ന പ്രതിസന്ധികളും വലുതാണ്. ഇന്നലെ തലസ്ഥാനമായ കീവില് ഒരു പ്രദര്ശനം നടത്തി യുക്രൈന്. റഷ്യയ്ക്ക് കണക്കെടുപ്പ് എളുപ്പമാക്കിയ പ്രദര്ശനം. മൂന്ന് ദിവസം കൊണ്ട് കാല്ക്കീഴിലാക്കാമെന്ന് റഷ്യ കരുതിയ അതേ കീവിലാണ്, യുക്രെയ്ന് തലസ്ഥാനത്തിന്റെ പ്രധാന തെരുവിലിന്നില് തകര്ന്നു തരിപ്പണമായ റഷ്യന് ടാങ്കറുകളുടെ പ്രദര്ശനം യുക്രൈന് നടത്തിയത്.
റഷ്യന് അധിനിവേശം ആറ് മാസം തികയുമ്പോഴും, യുദ്ധക്കെടുതിയില് വലഞ്ഞുകൊണ്ടേയിരിക്കുന്ന ജീവിതങ്ങളും യുക്രൈനെ വലയ്ക്കുന്നുണ്ട്. അതിനിടയിലാണ് റഷ്യന് വീമ്പിന് നേരെ , ഈ ടാങ്കറുകള് നിരത്തി യുക്രെയ്ന് കളിയാക്കി ചിരിക്കുന്നത്. ചെറുത്തുനില്പ്പിന്റെ വിജയചിഹ്നങ്ങളായി അവരീ സൈനിക വാഹനങ്ങളെ കാണുന്നു. കുട്ടികളോട് പറയുന്നു, പടമെടുക്കുന്നു. അവരത് ആത്മവിശ്വാസത്തിന്റെ പ്രതീകമായി എടുത്തു കാട്ടുകയാണ്.
നാളെയാണ് യുക്രെയ്ന്റെ മുപ്പത്തിയൊന്നാം സ്വാതന്ത്ര്യ ദിനം. ആഘോഷങ്ങളില്ല. കടുപ്പമേറിയ ആക്രമണം റഷ്യ നടത്തിയേക്കാമെന്നാണ് പ്രസിഡന്റിന്റെ മുന്നറിയിപ്പ്. അപ്പോഴാണ്, യുക്രെയ്ന് പിടിച്ചെടുത്ത റഷ്യന് ടാങ്കറുകള് നിരത്തുന്നത്. സ്വാതന്ത്ര്യവും പരമാധികാരവും കവരാന് ശ്രമിച്ച ഏകാധിപതികള്ക്ക് ചങ്കുറപ്പുള്ളൊരു രാജ്യത്തിന്റെ മറുപടിയെന്ന് പേരിട്ടായിരുന്നു യുക്രൈന് റഷ്യക്ക് മുമ്പില് ടാങ്കര് ചീന്തുകള് അവതരിപ്പിച്ചത്.
അതേസമയം തന്നെ റഷ്യന് പ്രസിഡന്റ് വ്ലാദിമിര് പുടിന്റെ വിശ്വസ്തന് അലക്സാണ്ടര് ദൂഗിനെ കൊല്ലാന് ലക്ഷ്യമിട്ട് കാര് ബോംബ് സ്ഫോടനം നടന്നത് റഷ്യയെ ഞെട്ടിച്ചിരുന്നു. മോസ്കോയില് നടന്ന സ്ഫോടനത്തില് അലക്സാണ്ടര് ദൂഗിന്റെ മകള് ദാരിയ ദൂഗിന് കൊല്ലപ്പെടുകയും ചെയ്തു. യുക്രൈന് തീവ്രവാദികള് ആണ് ആക്രമണത്തിന് പിന്നിലെന്ന് റഷ്യന് മാധ്യമങ്ങള് ആരോപിച്ചിരുന്നു. തലസ്ഥാന നഗരിയിലെ ഉഗ്രസ്ഫോടനം റഷ്യയെ വിറപ്പിച്ചു.
അതിലുപരിയായി പുടിന്റെ 'ബുദ്ധി'യെന്ന് വിശേഷിപ്പിക്കുന്ന അലക്സാണ്ടര് ദുഗിനെ വധിക്കാനുള്ള ശ്രമം ആരു നടത്തിയാലും റഷ്യയെ സംബന്ധിച്ച് ഞട്ടല് മാറാന് സമയമെടുക്കും. അമേരിക്കയ്ക്കും അവര് നയിക്കുന്ന ഉദാരവത്കരണത്തിനും ബദലായി റഷ്യന് ദേശീയതയെ മുന്നോട്ടുവെക്കുന്നയാളാണ് അലക്സാണ്ടര് ദുഗിന്. റഷ്യന് സംസ്കാരമുള്ള നാടുകളെ മുഴുവന് കൂട്ടിച്ചേര്ത്ത് വിശാല റഷ്യ ഉണ്ടാക്കാന് പുടിന് ഇറങ്ങിതിരിച്ചതും യുക്രൈനെ ആക്രമിച്ചതും എല്ലാം അലക്സാണ്ടര് ദൂഗിന് പറഞ്ഞതു കെട്ടാണെന്ന് പലരും കരുതുന്നത്.
അത്ര കരുത്തനായ അലക്സാണ്ടര് ദുഗിനെ റഷ്യന് തലസ്ഥാനമായ മോസ്കോയില് കാറില് ബോംബുവെച്ചു കൊല്ലനാണ് ശ്രമം നടന്നത്. ഭാഗ്യംകൊണ്ടു മാത്രം അലക്സാണ്ടര് ദുഗിന് രക്ഷപ്പെട്ടു. പക്ഷെ അദ്ദേഹത്തിന്റെ മകള് 29 കാരി ദാരിയ ദൂഗിന് ലാന്ഡ് ക്രൂയിസര് കാറിനൊപ്പം ചാരമായി. മകള്ക്കൊപ്പം ഒരു സാംസ്കാരിക പരിപാടിയില് പങ്കെടുത്ത് മടങ്ങുകയായിരുന്ന അലക്സാണ്ടര് ഡ്യൂഗിന് അവസാന നിമിഷം മറ്റൊരു കാറില് സഞ്ചരിക്കാന് തീരുമാനിച്ചതുകൊണ്ട് മാത്രം രക്ഷപ്പെടുകയായിരുന്നു. ഇതോടെ പുതിയ സാഹചര്യമാണ് യുക്രൈന് റഷ്യ യുദ്ധത്തില് ഉരുത്തിരിയുന്നത്. ഈ ആക്രമണത്തിന് പിന്നില് യുക്രൈന് സാന്നിധ്യം സംശയിക്കുമ്പോഴും റഷ്യ കാര്യമായൊന്നും പ്രതികരിച്ചിട്ടില്ല. നാളെ സ്വാതന്ത്ര്യദിനം ആഘോഷിക്കുന്ന യുക്രൈന് പരസ്യ ആഘോഷങ്ങള് ഒഴിവാക്കിയതിനും മുന്നറിയിപ്പുകള് നല്കിയതിനും പിന്നില്, റഷ്യയില് നിന്ന് എന്തും പ്രതീക്ഷിക്കാമെന്നതു തന്നെയാണ് കാരണം.
https://www.facebook.com/Malayalivartha
