ആണവ, മിസൈല്‍, ബഹിരാകാശ സംവിധാനങ്ങളിലെ സിഗ്‌നലുകള്‍ ചോര്‍ത്താന്‍ കഴിയുന്ന ചൈനയുടെ വിവാദ ചാരക്കപ്പലായ ' യുവാന്‍ വാംഗ് 5 ' ശ്രീലങ്കന്‍ തുറമുഖം വിട്ടു. ഇന്നലെ പ്രാദേശിക സമയം വൈകിട്ട് 4 മണിയ്ക്കാണ് കപ്പല്‍ തുറമുഖം വിട്ടത്. ചൈനയിലെ ജിയാംഗ് യിന്‍ തുറമുഖത്തേക്കാണ് ഇനി പോവുക. ആറ് ദിവസത്തെ സന്ദര്‍ശനത്തിനായി ആഗസ്റ്റ് 16ന് രാവിലെ 8.20നാണ് ഇന്ധനം നിറയ്ക്കാനെന്ന പേരില്‍ കപ്പല്‍ ഹാംബന്‍തോട്ടയിലടുപ്പിച്ചത്.

ചൈനീസ് എംബസി അഭ്യര്‍ത്ഥിച്ച സഹായങ്ങള്‍ കപ്പലിന് ശ്രീലങ്ക നല്‍കിയതായി ഹാംബന്‍തോട്ട തുറമുഖ അധികൃതര്‍ പറഞ്ഞു. ശ്രീലങ്കന്‍ കടലില്‍ ഓട്ടോമാറ്റിക് ഐഡന്റിഫിക്കേഷന്‍ സിസ്റ്റം ഓണ്‍ ആക്കി വയ്ക്കണമെന്നും ഗവേഷണങ്ങള്‍ പാടില്ലെന്നുമുള്ള നിബന്ധനയോടെയാണ് കപ്പലിനെ ഹാംബന്‍തോട്ടയിലേക്ക് പ്രവേശിപ്പിച്ചത്.

ആഗസ്റ്റ് 11നാണ് ഹാംബന്‍തോട്ടയില്‍ എത്തേണ്ടിയിരുന്നതെങ്കിലും ഇന്ത്യയുടെയും യു.എസിന്റെയും ആശങ്കയുടെ പശ്ചാത്തലത്തില്‍ ശ്രീലങ്ക അനുമതി നല്‍കാന്‍ വൈകുകയായിരുന്നു. ഇന്ത്യയും അമേരിക്കയും എതിര്‍പ്പിന് വ്യക്തമായ കാരണം നല്‍കിയില്ലെന്ന് കാട്ടി ആഗസ്റ്റ് 13ന് കപ്പല്‍ പ്രവേശനത്തിന് ശ്രീലങ്ക അനുമതി നല്‍കി.

750 കിലോമീറ്റര്‍ ആകാശ പരിധിയിലും കടലിലെയും കരയിലെയും സിഗ്‌നലുകള്‍ ചോര്‍ത്താന്‍ കഴിയുന്ന കപ്പല്‍ ഇന്ത്യയിലെ ഐ.എസ്.ആര്‍.ഒ ഉള്‍പ്പെടെയുള്ള തന്ത്രപ്രധാന കേന്ദ്രങ്ങള്‍ക്ക് ഭീഷണിയാകുമെന്ന് ആശങ്ക നിലനിന്നിരുന്നു.

ഇതിന്റെ പശ്ചാത്തലത്തില്‍ കപ്പലിന് മേല്‍ ഇന്ത്യയുടെ ശക്തമായ നിരീക്ഷണ വലയമുണ്ടായിരുന്നു. ചൈനീസ് വായ്പയില്‍ നിര്‍മ്മിച്ച ഹാംബന്‍തോട്ട തുറമുഖം 2017 മുതല്‍ ചൈന 99 വര്‍ഷത്തേക്ക് പാട്ടത്തിനെടുത്തിരിക്കുകയാണ്.