പാകിസ്ഥാനില്‍ ഇന്ത്യയിലേയ്ക്കുള്ള നുഴഞ്ഞുകയറ്റം തടയുന്നതിനായി. മൈനുകള്‍കൊണ്ട് ഒരു കോട്ട തന്നെ തീര്‍ത്തിരിക്കുകയാണ് ഇന്ത്യന്‍ സൈന്യം. കശ്മീരില്‍ ഇനി ഭീകരത വച്ചുപൊറുപ്പിക്കില്ലെന്ന കേന്ദ്ര നയം അപ്പടി ആവിഷ്‌ക്കരിക്കുകയാണ് സൈന്യം. ഇതിന്റെ ഭാഗമായി അതിര്‍ത്തിയിലുടനീളം മൈനുകള്‍ സ്ഥാപിച്ച് ഒരു ഭീകരനും അതിര്‍ത്തി കടക്കാതിരിക്കാനുള്ള സംവിധാനങ്ങള്‍ കൂടുതല്‍ കാര്യക്ഷമമാക്കി. എന്നാല്‍ ഇതറിയാതെ ഇന്ത്യയിലേക്ക് നുഴഞ്ഞുകയറാന്‍ ശ്രമിച്ച പാക് ഭീകരര്‍ മൈന്‍ഫീല്‍ഡില്‍ ചവിട്ടി പൊട്ടിത്തെറിച്ചു. നിയന്ത്രണരേഖയില്‍ നിന്ന് 150 മീറ്റര്‍ അകലെ നടന്ന പൊട്ടിത്തെറിയില്‍ കൊല്ലപ്പെട്ട രണ്ട് ഭീകരരുടെ മൃതദേഹം രണ്ടുദിവസത്തിന് ശേഷം സൈന്യം കണ്ടെടുത്തു. മൃതദേഹങ്ങള്‍ മൈന്‍ഫീല്‍ഡില്‍ ആയിരുന്നതിനാലാണ് മൃതദേഹം വീണ്ടെടുക്കാന്‍ സമയമെടുത്തത്.

മൂന്ന് പേരടങ്ങുന്ന സംഘമാണ് നുഴഞ്ഞുകയറിയത്. ഇതില്‍ ഒരാള്‍ പരിക്കുകളോടെ രക്ഷപ്പെട്ടെങ്കിലും സൈന്യം പിന്തുടര്‍ന്ന് പിടികൂടുകയായിരുന്നു. പിടികൂടിയയാള്‍ക്ക് ശസ്ത്രക്രിയ നടത്തി. ഇയാള്‍ക്ക് ആവശ്യമായ രക്തവും സൈന്യം നല്‍കി. പാകിസ്ഥാന്‍ സൈന്യത്തിന്റെ രഹസ്യാന്വേഷണ വിഭാഗത്തില്‍ ജോലി ചെയ്തിരുന്ന ലഷ്‌കര്‍ ഗൈഡ് ഓഗസ്റ്റ് 21 ന് അറസ്റ്റിലായതിന് പിന്നാലെയാണ് ഏറ്റവും പുതിയ നുഴഞ്ഞുകയറ്റ ശ്രമം നടന്നത്. തുടര്‍ച്ചയായുള്ള നുഴഞ്ഞുകയറ്റ ശ്രമങ്ങളെത്തുടര്‍ന്ന് പ്രദേശത്ത് സൈന്യം കാവല്‍ ശക്തമാക്കിയിട്ടുണ്ട്. 72 മണിക്കൂറിനിടെ നടന്ന മൂന്നാമത്തെ നുഴഞ്ഞുകയറ്റ ശ്രമമാണ് സൈന്യം തടഞ്ഞത്.

'2022 ഓഗസ്റ്റ് 21 ന് രാവിലെ, നൗഷേരയിലെ ജങ്കാര്‍ സെക്ടറില്‍ വിന്യസിച്ചിരിക്കുന്ന സൈനികര്‍ നിയന്ത്രണ രേഖയുടെ സ്വന്തം വശത്ത് തീവ്രവാദികളുടെ നീക്കം കണ്ടെത്തി. ഒരു ഭീകരന്‍ ഇന്ത്യന്‍ പോസ്റ്റിന് സമീപം വന്ന് വേലി മുറിക്കാന്‍ ശ്രമിച്ചു. സൈന്യം തിരിച്ചറിഞ്ഞതോടെ ഭീകരര്‍ ഓടിപ്പോകാന്‍ ശ്രമിച്ചു. ഇതിനിടയില്‍ മൈന്‍ പൊട്ടിത്തെറിച്ച് രണ്ട് ഭീകരര്‍ കൊല്ലപ്പെടുകയും ഒരാള്‍ക്ക് പരിക്കേല്‍ക്കുകയും ചെയ്തു.

പരിക്കേറ്റ പാകിസ്ഥാന്‍ ഭീകരനെ ജീവനോടെ പിടികൂടുകയും അടിയന്തര വൈദ്യസഹായം നല്‍കുകയും ജീവന്‍ രക്ഷിക്കാനുള്ള ശസ്ത്രക്രിയ നടത്തുകയും ചെയ്തു. പാക് അധീന കശ്മീരിലെ കോട്‌ലി ജില്ലയിലെ സബ്‌സ്‌കോട്ട് ഗ്രാമത്തില്‍ താമസിക്കുന്ന തബാറക് ഹുസൈന്‍ ആണെന്ന് പിടിയിലായ ഭീകരന്‍ വെളിപ്പെടുത്തി' സൈന്യം പുറത്തിറക്കിയ പ്രസ്താവനയില്‍ പറയുന്നു.