യുഎന്‍ സുരക്ഷാ സമിതിയില്‍ നടന്ന പ്രൊസിജറല്‍ വോട്ടെടുപ്പില്‍ റഷ്യയ്‌ക്കെതിരെ ആദ്യമായി വോട്ടു ചെയ്ത് ഇന്ത്യ...
യുഎന്‍ സുരക്ഷാ സമിതിയില്‍ നടന്ന പ്രൊസിജറല്‍ വോട്ടെടുപ്പില്‍ റഷ്യയ്‌ക്കെതിരെ ആദ്യമായി വോട്ടു ചെയ്ത് ഇന്ത്യ. 15 അംഗ സുരക്ഷാ കൗണ്‍സിലില്‍ യുക്രെയ്ന്‍ പ്രസിഡന്റ് വൊളോഡിമിര്‍ സെലെന്‍സ്‌കിയെ വിഡിയോ കോണ്‍ഫറന്‍സിലൂടെ യോഗത്തില്‍ അഭിസംബോധന ചെയ്യാന്‍ ക്ഷണിച്ചപ്പോള്‍ റഷ്യ എതിര്‍ത്തപ്പോള്‍ ഇന്ത്യ അനുകൂലിക്കുകയുമായിരുന്നു.
യുക്രെയ്‌നില്‍ ആറു മാസമായി തുടരുന്ന സംഘര്‍ഷം വിലയിരുത്താന്‍ ബുധനാഴ്ചയാണ് യുഎന്‍എസ്സി യോഗം ചേര്‍ന്നത്. യോഗം ആരംഭിച്ചതിനു പിന്നാലെ, യുഎന്നിലെ റഷ്യന്‍ അംബാസഡര്‍ വാസിലി എ നെബെന്‍സിയ വിഡിയോ കോണ്‍ഫറന്‍സിലൂടെയുള്ള യുക്രെയ്ന്‍ പ്രസിഡന്റിന്റെ പങ്കാളിത്തം സംബന്ധിച്ച് പ്രൊസിജറല്‍ വോട്ടിന് അഭ്യര്‍ഥിച്ചു.
സെലെന്‍സ്‌കിയുടെ പങ്കാളിത്തത്തെ റഷ്യ എതിര്‍ക്കുന്നില്ലെന്നും എന്നാല്‍ പങ്കാളിത്തം വ്യക്തിപരമായിരിക്കണമെന്നും നെബെന്‍സിയ പറഞ്ഞു.
കോവിഡ് മഹാമാരിക്കാലത്ത് സമിതി വെര്‍ച്വലായി പ്രവര്‍ത്തിക്കാന്‍ തീരുമാനിച്ചെങ്കിലും സമിതി ഇപ്പോള്‍ സാധാരണ നടപടിക്രമങ്ങളിലേക്ക് മടങ്ങിയെന്നും അദ്ദേഹം പറഞ്ഞു. യുക്രെയ്ന്‍ യുദ്ധത്തിലാണെന്നും ഈ സാഹചര്യത്തില്‍ പ്രസിഡന്റ് ഇവിടെ ഉണ്ടായിരിക്കണമെന്ന് ആവശ്യപ്പെടുന്നെന്നും അല്‍ബേനിയയുടെ അംബാസഡര്‍ ഫെറിറ്റ് ഹോക്‌സ വാദിച്ചു.
വിഡിയോ കോണ്‍ഫറന്‍സിലൂടെയുള്ള സെലെന്‍സ്‌കിയുടെ പങ്കാളിത്തത്തെ അദ്ദേഹം പിന്തുണയ്ക്കുകയും ചെയ്തു. തുടര്‍ന്ന് സമിതി, വിഡിയോ കോണ്‍ഫറന്‍സിലൂടെ യോഗത്തില്‍ പങ്കെടുക്കാന്‍ സെലന്‍സ്‌കിക്ക് അനുവാദം നല്‍കി. ഇതിനെതിരെ റഷ്യ വോട്ട് ചെയ്തു. ഇന്ത്യ ഉള്‍പ്പെടെ 12 രാജ്യങ്ങള്‍ അനൂകൂലിച്ച് വോട്ട് ചെയ്തു. ചൈനയാകട്ടെ വിട്ടുനിന്നു.
ഈ വര്‍ഷം ഫെബ്രുവരിയില്‍ യുക്രെയ്‌നില്‍ റഷ്യ സൈനിക നടപടി ആരംഭിച്ചതിന് ശേഷം ഇതാദ്യമായാണ്, യുക്രെയ്ന്‍ വിഷയത്തില്‍ റഷ്യയ്‌ക്കെതിരെ ഇന്ത്യ വോട്ട് ചെയ്യുന്നത്.
യുക്രെയ്‌നുമായി ബന്ധപ്പെട്ട് യുഎന്‍ രക്ഷാസമിതിയില്‍ ഇന്ത്യ വിട്ടുനിന്നത് യുഎസിന്റെ നേതൃത്വത്തിലുള്ള പാശ്ചാത്യ ശക്തികളെ മുഷിപ്പിച്ചിരുന്നു. യുക്രെയ്‌നെതിരായ ആക്രമണത്തെ തുടര്‍ന്ന് യുഎസ് ഉള്‍പ്പെടെയുള്ള പാശ്ചാത്യ രാജ്യങ്ങള്‍ റഷ്യയ്‌ക്കെതിരെ സാമ്പത്തിക ഉപരോധം ഏര്‍പ്പെടുത്തിയിട്ടുണ്ടായിരുന്നു.യുക്രെയ്നെതിരെ റഷ്യ നടത്തുന്ന സൈനിക നീക്കത്തെ ഇന്ത്യ ഇതുവരെ വിമര്‍ശിച്ചിട്ടില്ല.
https://www.facebook.com/Malayalivartha
