യുദ്ധം കടുക്കുന്നു; മേഖലയില്‍ ജനങ്ങളെ ഒഴിപ്പിക്കല്‍ വേഗത്തിലാക്കി യുക്രെയ്ന്‍
റഷ്യന്‍ സേന ആക്രമണം കടുപ്പിച്ച പ്രദേശങ്ങളില്‍ നിന്ന് ജനങ്ങളെ നിര്‍ബന്ധമായും ഒഴിപ്പിക്കാന്‍ യുക്രെയ്ന്‍ സര്‍ക്കാര്‍ നടപടി ആരംഭിച്ചു. ശൈത്യകാലമായതിനാല്‍ രൂക്ഷമായ തണുപ്പില്‍ നേരിടാവുന്ന പ്രശ്‌നങ്ങള്‍ കൂടി പരിഗണിച്ചാണിത്.
ഇതേസമയം, സപോറിഷ്യ ആണവോര്‍ജ ഉല്‍പാദന കേന്ദ്രത്തില്‍ നിന്ന് റഷ്യന്‍ സേനയെ പൂര്‍ണമായി ഒഴിപ്പിക്കാന്‍ ലോകരാജ്യങ്ങള്‍ സമ്മര്‍ദം ചെലുത്തണമെന്ന് പ്രസിഡന്റ് വൊളോഡിമിര്‍ സെലെന്‍സ്‌കി ആവശ്യപ്പെട്ടു. റഷ്യ നടത്തിയ ഷെല്ലാക്രമണത്തില്‍ ആണവകേന്ദ്രത്തിനു സമീപമുള്ള ഒരു താപവൈദ്യുതനിലയത്തിലെ കല്‍ക്കരി സംഭരണികള്‍ക്കു തീ പിടിച്ചത് ആശങ്ക വര്‍ധിപ്പിച്ചു. വൈദ്യുതി വിതരണം തടസ്സപ്പെട്ടതിനാല്‍ സപോറിഷ്യ നഗരത്തിലെ 18,000 ജനങ്ങള്‍ പ്രതിസന്ധിയിലാണ്.
യുക്രെയ്ന്‍ ഭാഗത്തെ കരിങ്കടല്‍, അസോവ് കടല്‍ തീരമേഖലയില്‍ ആക്രമണം ശക്തമാണ്. ഡോണ്‍ബാസ് മേഖലയില്‍ പിടിമുറുക്കിയ റഷ്യ ഒറ്റപ്പെട്ട ചെറുത്തുനില്‍പ് ഇല്ലാതാക്കാനുള്ള ശ്രമത്തിലാണ്. മൈക്കലോവ് നഗരത്തിലും ആക്രമണം രൂക്ഷമാക്കി.
https://www.facebook.com/Malayalivartha
