മനുഷ്യന്‍ വീണ്ടും ചന്ദ്രനിലേക്ക്.... ആര്‍ട്ടിമിസിന് ഇന്നു തുടക്കം.... പരമ്പരയിലെ ആദ്യ ദൗത്യമായ ആര്‍ട്ടിമിസ് 1 ഇന്ന് വൈകിട്ട് 6.04ന് ഫ്‌ലോറിഡയിലെ കേപ് കാനവറലില്‍ നിന്ന് കുതിച്ചുയരും.

പരീക്ഷണാര്‍ഥമുള്ള ഈ ദൗത്യത്തില്‍ മനുഷ്യയാത്രികരില്ല. എങ്കിലും ഓറിയണ്‍ പേടകത്തെ ചന്ദ്രനു ചുറ്റുമുള്ള ഭ്രമണപഥത്തില്‍ നിക്ഷേപിക്കാനായി ആദ്യദൗത്യം ശ്രമിക്കും. 2024ല്‍ ചന്ദ്രനു ചുറ്റും യാത്രികര്‍ ഭ്രമണം ചെയ്യാനും 2025ല്‍ ആദ്യ സ്ത്രീയുള്‍പ്പെടെ യാത്രികരെ ചന്ദ്രോപരിതലത്തിലെത്തിക്കാനും നാസ പദ്ധതിയിടുകയാണ്.

ലോകത്തിലെ ഏറ്റവും കരുത്തുറ്റതും 322 അടി ഉയരമുള്ള റോക്കറ്റുമായ സ്പേസ് ലോഞ്ച് സിസ്റ്റമാണ് (എസ്എല്‍എസ്) യാത്രികരുടെ പേടകമായ ഓറിയോണ്‍ വഹിക്കുന്നത്.

50 വര്‍ഷങ്ങള്‍ക്ക് മുന്‍പ് അപ്പോളോ ദൗത്യങ്ങളില്‍ ഉപയോഗിച്ച സാറ്റേണ്‍ ഫൈവ് റോക്കറ്റുകളെക്കാള്‍ ഉയരം കുറഞ്ഞതാണ് എസ്എല്‍എസ് എങ്കിലും കരുത്ത് കൂടുതലാണ്. 11 അടി പൊക്കമുള്ളതാണ് ഒറിയോണ്‍ പേടകം. 4 യാത്രികരെ വഹിക്കാനുള്ള ശേഷി ഇതിനുണ്ട്.
ഫ്‌ലോറിഡയിലെ വിക്ഷേപണത്തിനു ശേഷം 6 ആഴ്ചയെടുത്താണ് ആര്‍ട്ടിമിസ് 1 യാത്ര പൂര്‍ത്തീകരിക്കുന്നത്.

റോക്കറ്റിന്റെ കോര്‍ സ്റ്റേജ് വിക്ഷേപണത്തിനു ശേഷം കുറച്ചുസമയം കഴിയുമ്പോള്‍ ഭൂമിയില്‍ പതിക്കും. ഭൂമിയില്‍ നിന്ന് 3,86,000 കിലോമീറ്റര്‍ അകലെയുള്ള ചന്ദ്രനിലേക്ക് എത്താനായി ഓറിയോണ്‍ ഒരാഴ്ചയെടുക്കും. പിന്നീട് അഞ്ചാഴ്ചയോളം പിന്നിട്ട ശേഷം മണിക്കൂറില്‍ 40,000 കിലോമീറ്റര്‍ എന്ന വേഗത്തില്‍ പസിഫിക് സമുദ്രത്തിലേക്ക് ഓറിയണ്‍ വീഴും. 9300 കോടിയിലധികം യുഎസ് ഡോളര്‍ ചെലവു വരുന്നതാണ് ആര്‍ട്ടിമിസ് പദ്ധതി. ആദ്യദൗത്യത്തിന് 400 കോടി യുഎസ് ഡോളര്‍ ചെലവുവരും.

അതേസമയം യാത്രികരില്ലെങ്കിലും 3 പാവകളെ ഓറിയോണ്‍ പേടകത്തില്‍ സ്ഥാപിച്ചിട്ടുണ്ട്. കമാന്‍ഡര്‍ മൂണ്‍ക്വിന്‍ കാംപോസാണു പ്രധാന പാവ. ഹെല്‍ഗ, സോഹര്‍ എന്ന് മറ്റ് 2 പാവയാത്രികര്‍ കൂടിയുണ്ട്. അപകടാവസ്ഥയിലേക്കു പോയ അപ്പോളോ 13 ദൗത്യത്തെ രക്ഷിക്കുന്നതില്‍ പ്രധാന പങ്കുവഹിച്ച നാസ എന്‍ജിനീയറായ ആര്‍തുറോ കാംപോസിന്റെ പേരാണ് പ്രധാന പാവയ്ക്കു നല്‍കിയിരിക്കുന്നത്. പാവകള്‍ അണിഞ്ഞിരിക്കുന്ന സ്പേസ് സ്യൂട്ട്, തിരിച്ചെത്തിയ ശേഷം നാസ പരിശോധിക്കും. ഇവ ഏല്‍ക്കുന്ന ബഹിരാകാശ വികിരണങ്ങളുടെ തോതും തീവ്രതയും വിവിധ പഠനങ്ങളിലൂടെ വിലയിരുത്തുകയും ചെയ്യും .