ശത്രുവായാലും മിത്രമായാലും അപകടങ്ങളില്‍ എന്നും അവരെ ചേര്‍ത്തു പിടിക്കുന്നൊരു രീതിയാണ് ഇന്ത്യയ്ക്കുള്ളത്. ചൈനയുമായുള്ള ബന്ധത്തിന്റെ പേരില്‍ ശ്രീലങ്കയെ ഇന്ത്യയ്ക്ക് അകറ്റി നിര്‍ത്താമായിരുന്നു പക്ഷേ അവര്‍ക്കൊരു ആപത്ത് വന്നപ്പോള്‍ ഇന്ത്യ മാത്രമേ അവര്‍ക്ക് സഹായത്തിന് ഉണ്ടായിരുന്നുള്ളൂ.. അടുത്തത് പാകിസ്ഥാന്റെ ഊഴമാണ്. കൊടും പ്രളം ആ രാജ്യത്തെ വിഴുങ്ങിക്കൊണ്ടിരിക്കുകയാണ്. ചങ്കായ ചൈന അവരോടൊപ്പമില്ല. ഇപ്പോള്‍ ഏക ആശ്രയം ഇന്ത്യയാണ്. രൂക്ഷമായ വെള്ളപ്പൊക്കത്തെത്തുടര്‍ന്നുള്ള ഭക്ഷ്യക്ഷാമത്തിനും വിലക്കയറ്റത്തിനും തടയിടാന്‍ ഇന്ത്യയുടെ സഹായം തേടാനുറച്ചിരിക്കുകയാണ് പാകിസ്ഥാന്‍.

ഇക്കാര്യത്തില്‍ ഔദ്യോഗിക സ്ഥിരീകരണം ലഭിച്ചിട്ടില്ലെങ്കിലും ഇന്ത്യയില്‍ നിന്ന് പഴങ്ങളും പച്ചക്കറികളും ഇറക്കുമതി ചെയ്യാനുള്ള നടപടികള്‍ക്ക് പാക് സര്‍ക്കാര്‍ വേഗം കൂട്ടി എന്നാണ് റിപ്പോര്‍ട്ടുകള്‍ വ്യക്തമാക്കുന്നത്. വാഗാ അതിര്‍ത്തിവഴിയായിരിക്കും ഇവ പാകിസ്ഥാനിലേക്ക് കൊണ്ടുപോവുക. നിലവില്‍, ലാഹോറിനും പഞ്ചാബിലെ മറ്റ് നഗരങ്ങള്‍ക്കും അഫ്ഗാനിസ്ഥാനില്‍ നിന്ന് ടോര്‍ഖാം അതിര്‍ത്തി വഴി തക്കാളിയും ഉള്ളിയും വിതരണം ചെയ്യുന്നുണ്ട്. എന്നാല്‍ ഇത് ആവശ്യത്തിന് മതിയാവുന്നില്ലെന്ന് കണ്ടാണ് ഇന്ത്യയില്‍ നിന്ന് ഇറക്കുമതി ചെയ്യാന്‍ നീക്കം ആരംഭിച്ചത്. ഇറാനില്‍ നിന്ന് ഇറക്കുമതി ചെയ്യാന്‍ നോക്കിയെങ്കിലും അടുത്തിടെ ഇറാന്‍ സര്‍ക്കാര്‍ ഇറക്കുമതിക്കും കയറ്റുമതിക്കും നികുതി വര്‍ദ്ധിപ്പിച്ചത് തിരിച്ചടിയായി. നല്ല കാലത്ത് ഒപ്പമുണ്ടായിരുന്ന ചൈനയുടെ ഭാഗത്തുനിന്ന് പാകിസ്ഥാനെ സഹായിക്കാന്‍ കാര്യമായ നടപടികള്‍ ഒന്നും ഉണ്ടാകുന്നില്ലെന്നതും ശ്രദ്ധേയമാണ്.

സാമ്പത്തിക പ്രതസന്ധിയില്‍പ്പെട്ട് നട്ടംതിരിയുന്ന പാകിസ്ഥാന് ഇരുട്ടടിയായിരിക്കുകയാണ് വെള്ളപ്പൊക്കം. ബലൂചിസ്ഥാനിലെയും സിന്ധിലെയും ആയിരക്കണക്കിന് ഏക്കറിലെ കൃഷിയാണ് വെള്ളപ്പൊക്കംമൂലം നശിച്ചത്. ഇവിടത്തെ കൃഷിയിടങ്ങള്‍ പലതും നാമാവശേഷമായി. പഴയ നിലയിലേക്ക് മടങ്ങിയെത്തണമെങ്കില്‍ മാസങ്ങള്‍ വേണ്ടിവരും.

പഴങ്ങള്‍ക്കും പച്ചക്കറികള്‍ക്കും ഇപ്പോള്‍ പാകിസ്ഥാനില്‍ തീ വിലയാണ്. ലാഹോര്‍ മാര്‍ക്കറ്റില്‍ ഒരുകിലോഗ്രാം തക്കാളിക്ക് നിലവില്‍ 500 രൂപയാണ് വില. ഒരു കിലോ ഉള്ളി വേണമെങ്കില്‍ 400 രൂപ കൊടുക്കണം. വരുംദിവസങ്ങളില്‍ സാധനങ്ങളുടെ വില ഇനിയും കൂടുമെന്നും ഉള്ളിയുടെയും തക്കാളിയുടെയും വില കിലോഗ്രാമിന് 700 രൂപ കടന്നേക്കും എന്നാണ് അധികൃതര്‍ നല്‍കുന്ന സൂചന.