പാകിസ്താന് പിന്നാലെ പ്രളയ ഭീതിയില്‍ ചൈനയും. തുടര്‍ച്ചയായുള്ള ശക്തമായ മഴയുടെ പശ്ചാത്തലത്തില്‍ സിച്വാന്‍ പ്രവിശ്യയില്‍ കനത്ത നാശ നഷ്ടമാണ് ഉണ്ടായിട്ടുള്ളത്. പ്രവിശ്യയിലെ വിവിധ ഭാഗങ്ങളില്‍ രക്ഷാ പ്രവര്‍ത്തനങ്ങള്‍ പുരോഗമിക്കുകയാണ്. ചെംഗ്ദു, ഗൗന്‍ഗ്വാന്‍, ഗ്രേസ് എന്നീ പ്രദേശങ്ങളിലാണ് മഴ കനത്ത നാശം വിതച്ചിരിക്കുന്നത്. കഴിഞ്ഞ ദിവസം മാത്രം ഇവിടങ്ങളില്‍ നിന്നും 46,400 പേരെ മാറ്റിപ്പാര്‍പ്പിച്ചു. നിരവധി വീടുകള്‍ പൂര്‍ണമായും ഭാഗികമായും തകര്‍ന്നു. പ്രധാന റോഡുകള്‍ ഉള്‍പ്പെടെ വെള്ളത്തിനടിയിലായി. നിരവധി വീടുകളിലും മറ്റ് സ്ഥാപനങ്ങളിലുമെല്ലാം വെള്ളം കയറിയിട്ടുണ്ട്. മിയാന്‍യാംഗ് യാന്‍, ഗ്വാംഗ്യുവാന്‍, ദെയാംഗ്, അബ, ഗാര്‍സെ എന്നീ നഗരങ്ങളിലും മഴ തുടരുന്നുണ്ട്.

165.1 മില്ലീ മീറ്റര്‍ മഴയാണ് ലഭിച്ചിട്ടുള്ളത്. ഇതിന്റെ പശ്ചാത്തലത്തില്‍ അധികൃതര്‍ ജാഗ്രതാ നിര്‍ദ്ദേശം പുറപ്പെടുവിച്ചു. മഴ ശക്തമായി തുടരുകയാണെങ്കില്‍ മണ്ണിടിച്ചലിനും, ഉരുള്‍പ്പൊട്ടലിനും സാദ്ധ്യതയുണ്ടെന്നാണ് വിലയിരുത്തുന്നത്. വേനല്‍ കാലത്ത് പ്രവിശ്യയില്‍ ചൂട് അസാധാരണമാം വിധം ഉയര്‍ന്നിരുന്നു. ഇത് മണ്ണിന്റെ ഘടനയില്‍ മാറ്റം ഉണ്ടാക്കിയിട്ടുണ്ടെന്ന് വിദഗ്ധര്‍ പറയുന്നു. ചൂട് ഉയര്‍ന്നത് മണ്ണ് കൂടുതല്‍ അയയാന്‍ കാരണമായി. ശക്തമായ മഴ മണ്ണ് പെട്ടെന്ന് ഒഴുകി പോകാന്‍ കാരണമാകുമെന്നും അധികൃതര്‍ വ്യക്തമാക്കി.