ബെഞ്ചമിന്‍ നെതന്യാഹുവിനെതിരെ ജൂതവിദ്യാര്‍ത്ഥികളുടെ പ്രക്ഷോഭം. പലസ്തീനികള്‍ക്ക് സ്വാതന്ത്ര്യം അനുവദിക്കണമെന്നും 75 വര്‍ഷമായി ഇസ്രായേല്‍ തുടരുന്ന ക്രൂരത അവസാനിപ്പിക്കണമെന്നും ആവശ്യപ്പെട്ട് അമേരിക്കയിലെ ജൂത വിദ്യാര്‍ഥികളുടെ തുറന്ന കത്ത്. യുദ്ധം കൊടുമ്പിരി കൊണ്ടിരിക്കെ ഈ കത്ത് നെതന്യാഹുവിന് ഏണിയാകുന്നു. ഇസ്രയേലിനകത്തും നെതന്യാഹുവിനെതിരെ ജനം പ്രതിഷേധിക്കുന്നുണ്ട്. ഇറാന്‍ ഈ അവസരം മുതലെടുത്ത് രംഗത്ത്. അറബ് രാഷ്ട്രങ്ങളും ഇസ്രയേലിന് നേരെ കടുപ്പിക്കുന്നു.

ഇസ്രായേല്‍ ക്രൂരതയെയും ഹമാസിന്റെ അക്രമങ്ങളെയും അപലപിച്ച വിദ്യാര്‍ഥികള്‍, ഹമാസ് നടത്തുന്ന അക്രമങ്ങളെ അതിന് കാരണമായ രാഷ്ട്രീയ പശ്ചാത്തലത്തില്‍ നിന്ന് വേര്‍പെടുത്തി കാണാന്‍ കഴിയില്ലെന്നും കത്തില്‍ വ്യക്തമാക്കി. അമേരിക്കയിലെ ബ്രൗണ്‍ സര്‍വകലാശാലയിലെ 36 ജൂത വിദ്യാര്‍ത്ഥികളാണ് കത്തെഴുതിയത്. ഫലസ്തീനികളുടെ അവകാശങ്ങള്‍ക്കും സ്വാതന്ത്ര്യത്തിനും നിലയുറപ്പിക്കുമെന്ന് വ്യക്തമാക്കിയ എഴുത്ത് ഇസ്രായേല്‍ ആക്രമണം ഒരു മാസം പിന്നിട്ട നവംബര്‍ 7നാണ് പ്രസിദ്ധീകരിച്ചത്.

'ഒക്ടോബര്‍ 7ന് ഹമാസ് ഇസ്രായേലിനെ ആക്രമിക്കുന്നതിന് മുമ്പ്, ഇസ്രായേല്‍ 75 വര്‍ഷമായി ഫലസ്തീനികള്‍ക്കുനേരെ വര്‍ണ്ണവിവേചനവും അധിനിവേശവും നടത്തുകയാണ്. ഭരണകൂടം പതിറ്റാണ്ടുകളായി നിന്തരം നടത്തുന്ന അക്രമചരിത്രത്തിന്റെ തുടര്‍ച്ചയാണ് ഇപ്പോള്‍ നടക്കുന്നത്. കുട്ടികളെന്നോ സ്ത്രീകളെന്നോ ഭേദമില്ലാതെ ആയിരങ്ങളെ ഇസ്രായേല്‍ കൊന്നൊടുക്കുകയും 15 ലക്ഷത്തിലധികം ഫലസ്തീനികളെ നിര്‍ബന്ധിതമായി കുടിയിറക്കുകയും ചെയ്തതിനെ തള്ളിപ്പറയാന്‍ കഴിയാത്തവര്‍ നമ്മുടെ ചരിത്രത്തില്‍ നിന്ന് പാഠം പഠിക്കുന്നതില്‍ പരാജയപ്പെട്ടവരാണ്' കത്തില്‍ ചൂണ്ടിക്കാട്ടി.

ഫലസ്തീനികളുടെ സ്വാതന്ത്ര്യമെന്നാല്‍ ജൂതന്മാരെ പുറത്താക്കുകയാണെന്ന ആരോപണം അടിസ്ഥാന രഹിതമാണ്. ഭൂമിയില്‍ നിന്ന് ജൂതന്മാരെ ഉന്മൂലനം ചെയ്യുകയല്ല, മറിച്ച് സയണിസ്റ്ററ് ഭരണകൂടം അന്യായമായി കൈവശപ്പെടുത്തിയ ഭൂമിയും അവരുടെ സ്വാതന്ത്ര്യവും തിരിച്ചു നല്‍കലാണ്. ഞങ്ങള്‍ ഹമാസിനെയല്ല, ഫലസ്തീനികളെയാണ് പിന്തുണക്കുന്നത്' വിദ്യാര്‍ഥികള്‍ വ്യക്തമാക്കി.

'ലോകത്തില്‍ നടക്കുന്ന അനീതി?ക്കെതിരെ ഉച്ചത്തില്‍ സംസാരിക്കുന്നതില്‍നിന്ന് ഞങ്ങള്‍ പിന്മാറില്ല. ഞങ്ങളുടെ യഹൂദ വ്യക്തിത്വം അനീതിയുമായി സഹകരിക്കാന്‍ ഞങ്ങളെ അനുവദിക്കില്ല. ഇസ്രായേല്‍ ഭരണകൂടത്തെ എതിര്‍ക്കാന്‍ നമ്മുടെ യഹൂദമതം നമ്മെ നിര്‍ബന്ധിക്കുന്നു. 'ഈജിപ്തില്‍ പരദേശികളായിരുന്ന നിങ്ങള്‍ക്ക് അപരിചിതന്റെ വികാരങ്ങള്‍ അറിയുന്നതിനാല്‍ അപരിചിതനെ അക്രമിക്കരുത്' എന്നാണ് തോറയിലെ പുറപ്പാട് പുസ്തകത്തിലെ 23ആം അധ്യായം 9 വാചകം നമ്മോട് കല്‍പിക്കുന്നത്. ഫലസ്തീനികള്‍ നമ്മുടെ സഹോദരങ്ങളാണ്. നമ്മുടെ സമപ്രായക്കാര്‍, വിലപ്പെട്ട ജീവിതമുള്ള മനുഷ്യര്‍. നമ്മുടെ പേരില്‍ അവരെ ആക്രമിക്കരുത്' വിദ്യാര്‍ഥികള്‍ വ്യക്തമാക്കി.