ആശുപത്രികളില്‍ നിന്ന് അനക്കമുണ്ടായാല്‍ വളഞ്ഞിരിക്കുന്ന ഇസ്രായേല്‍ സൈന്യത്തിന്റെ സ്‌നൈപ്പര്‍ സ്‌ക്വാഡിന്റെ വെടിയുണ്ടകള്‍ ചീറിയെത്തും; ഇടതടവില്ലാതെ, ബോംബിങ്; പകര്‍ച്ചവ്യാധികള്‍ ഉണ്ടാവാതിരിക്കാന്‍, ഫ്രീസറില്‍ നിന്ന് മൃതദേഹങ്ങള്‍ പുറത്തെടുത്ത് ഖബറടക്കാനുള്ള നീക്കവും സാധിക്കുന്നില്ല...
പുറം ലോകത്ത് നിന്ന് ഗാസയിലെ ആശുപത്രികളെ വേര്‍പെടുത്തിയ ഇസ്രായേല്‍ സേന അവിടങ്ങളില്‍ സമാനതകളില്ലാത്ത കൂട്ടക്കൊലക്ക് ഒരുങ്ങുകയാണെന്ന് ആശങ്ക ഉയരുന്നു. ആശുപത്രികളില്‍ നിന്ന് ഒരു അനക്കമുണ്ടായാല്‍ വളഞ്ഞിരിക്കുന്ന ഇസ്രായേല്‍ സൈന്യത്തിന്റെ സ്‌നൈപ്പര്‍ സ്‌ക്വാഡിന്റെ വെടിയുണ്ടകള്‍ ചീറിയെത്തും. ആശുപത്രിയില്‍ നിന്ന് പുറത്തേക്ക് രക്ഷപ്പെടാനോ പുറത്തു നിന്ന് ആശുപത്രിയിലേക്ക് വരാനോ കഴിയില്ല.
''പ്രവര്‍ത്തിപ്പിക്കാനുള്ള ഇന്ധനമില്ലാത്തതിനാല്‍ പ്രധാന ഫ്രീസറില്‍ നിന്ന് മൃതദേഹങ്ങള്‍ പുറത്തെടുത്തിരുന്നു. ഇവ കാരണം മറ്റ് പകര്‍ച്ചവ്യാധികള്‍ ഉണ്ടാവാതിരിക്കാന്‍ ഉടന്‍ ഖബറടക്കാനായിരുന്നു തീരുമാനിച്ചിരുന്നത്. എന്നാല്‍ ഇസ്രായേല്‍ ഇടതടവില്ലാതെ ബോംബിങ് നടത്തുന്നതിനാല്‍ അത് സാധിക്കുന്നില്ല'' -അല്‍ശിഫ ആശുപത്രി സര്‍ജന്‍ മര്‍വാന്‍ അബൂസാദ ബി.ബി.സിക്ക് അയച്ച വോയ്‌സ് നോട്ടില്‍ പറഞ്ഞു.
ആശുപത്രിയില്‍ നിന്ന് റോഡിലേക്ക് ഇറങ്ങിയവര്‍ക്കു നേരെ ഇസ്രായേല്‍ വെടിയുതിര്‍ത്തുവെന്നും അദ്ദേഹം കൂട്ടിച്ചേര്‍ത്തു. ''ആശുപത്രിയില്‍നിന്ന് രക്ഷപ്പെടാന്‍ ശ്രമിച്ചവരെ തെരുവില്‍ വെച്ച് ഇസ്രായേല്‍ സേന വെടിവെച്ചു വീഴ്ത്തി'' -മര്‍വാന്‍ വിശദീകരിച്ചു. ഗാസയില്‍ മാനുഷിക ദുരന്തം മറനീക്കുകയാണെന്നും അവിടത്തെ സാഹചര്യം വിശദീകരിക്കാനാവുന്നില്ലെന്നുമായിരുന്നു ഡോക്ടേഴ്‌സ് വിത്തൗട്ട് ബോര്‍ഡേഴ്‌സ് അംഗം താന്യ ഹാജ് ഹസ്സന്‍ പറഞ്ഞു. മാനുഷിക ദുരന്തം ഉണ്ടാവുമെന്ന് മുന്നറിയിപ്പ് നല്‍കാന്‍ തുടങ്ങിയിട്ട് ആഴ്ചകളായി.
ദിവസം ചെല്ലുന്തോറും ഞങ്ങളുടെ ശബ്ദം ദുര്‍ബലമാകുന്നു. നാം ജീവിക്കുന്നത് എന്തൊരു ലോകത്താണ്''-താന്യ കൂട്ടിച്ചേര്‍ത്തു. അല്‍ശിഫ ആശുപത്രിയിലെ അവസ്ഥ ഇതു പോലെ തുടരാന്‍ അനുവദിക്കാവുന്നതല്ലെന്ന് അന്താരാഷ്ട്ര റെഡ്‌ക്രോസ് കമ്മിറ്റി പശ്ചിമേഷ്യ തലവന്‍ ഫാബ്രിസിയോ കാര്‍ബോണി മുന്നറിയിപ്പ് നല്‍കി. ''പരിക്കേറ്റവരും കിടപ്പാടം നഷ്ടപ്പെട്ടവരും ആരോഗ്യപ്രവര്‍ത്തകരുമടങ്ങുന്ന ആയിരങ്ങളുടെ ജീവന്‍ ഏതു സമയവും എടുക്കപ്പെടാം.
ഇവരുടെ ജീവന്‍ യുദ്ധകാല നിയമങ്ങള്‍ പ്രകാരം സംരക്ഷിക്കപ്പെടണം.'' -അദ്ദേഹം എക്‌സില്‍ കുറിച്ചു. ഹമാസിന് ഷിഫയ്ക്ക് താഴെ കമാന്‍ഡ് സെന്ററുകളും തുരങ്കങ്ങളും ഉണ്ടെന്നാണ് ഇസ്രായേല്‍ അവകാശപ്പെടുന്നത്. എന്നാല്‍ ഈ ആരോപണങ്ങള്‍ തീവ്രവാദ സംഘടന നിഷേധിച്ചു. ശിശുക്കളെ സുരക്ഷിതമായ ആശുപത്രിയിലേക്ക് മാറ്റാന്‍ രാജ്യത്തിന്റെ സൈന്യം സഹായിക്കുമെന്ന് ഇസ്രായേല്‍ ചീഫ് സൈനിക വക്താവ് ഡാനിയല്‍ ഹഗാരി ശനിയാഴ്ച പറഞ്ഞു.
അതേ സമയം, ഗാസയിലെ ഫീല്‍ഡ് ഹോസ്പിറ്റലിലേക്ക് റോയല്‍ എയര്‍ഫോഴ്സ് വിമാനത്തില്‍ വൈദ്യസഹായത്തിനായി ഒരു ബാച്ചിനെ എത്തിച്ചതായി ജോര്‍ദാന്‍ സൈന്യം അറിയിച്ചു. ഗാസയിലെ ഫലസ്തീനികള്‍ക്കുള്ള ആരോഗ്യ സേവനങ്ങള്‍ നല്‍കുന്നതിനുള്ള ആശുപത്രിയുടെ ശേഷി വര്‍ദ്ധിപ്പിക്കുന്നതിന് യുണൈറ്റഡ് അറബ് എമിറേറ്റ്‌സ് (യുഎഇ), ഖത്തര്‍ എന്നിവയുടെ സഹകരണത്തോടെയാണ് ഈ നീക്കമെന്ന് സൈന്യം പ്രസ്താവനയില്‍ പറഞ്ഞു.
https://www.facebook.com/Malayalivartha
