ഗാസ മുനമ്പിൽ നിന്ന് രണ്ട് ബന്ദികളെ ഹമാസിന്റെ ത‌ടങ്കലിൽ നിന്നും പുറത്തേക്ക് എത്തിച്ചു. ഫെർണാണ്ടോ സൈമണ്‍ മർമാൻ (60), ലൂയിസ് ഹാർ (70) എന്നിവരെ തിങ്കളാഴ്ച പുലർച്ചെ രക്ഷിച്ചതായി ഇസ്രായേല്‍ സൈന്യം അറിയിച്ചു. ഇരുവരുടെയും ആരോഗ്യനില തൃപ്തികരമാണെന്ന് സൈന്യം അറിയിച്ചു. ഹമാസ് തീവ്രവാദി സംഘം തടവിലാക്കിയതായി കരുതപ്പെടുന്ന 100 ലധികം തടവുകാരെ നാട്ടിലേക്ക് കൊണ്ടുവരാനുള്ള ശ്രമത്തില്‍ ചെറുതും എന്നാല്‍ പ്രതീകാത്മകവുമായ പ്രാധാന്യമുള്ള വിജയമാണിതെന്ന് ഇസ്രായേല്‍ സൈന്യം വ്യക്തമാക്കി.

തെക്കൻ അതിർത്തി പട്ടണമായ റഫയിലെ ഒരു റെസിഡൻഷ്യല്‍ കെട്ടിടത്തില്‍ നിന്ന് രണ്ടുപേരെ രക്ഷപ്പെടുത്തിയ റെയ്ഡില്‍ കുറഞ്ഞത് ഏഴ് ഭീകരരെയെങ്കിലും വധിച്ചതായിട്ടാണ് സൈന്യം റിപ്പോർട്ട് ചെയ്തത്.ഇസ്രായേല്‍-ഹമാസ് യുദ്ധത്തിന് തുടക്കമിട്ട ഒക്‌ടോബർ 7-ന് അതിർത്തി കടന്നുള്ള ആക്രമണത്തില്‍ കിബ്ബത്ത്സ് നിർ യിഷാക്കില്‍ നിന്നാണ് ബന്ദികളായ ഇരുവരെയും ഹമാസ് തീവ്രവാദികള്‍ തട്ടിക്കൊണ്ടുപോയത്. കൃത്യമായ ഇൻ്റലിജൻസ് അടിസ്ഥാനമാക്കിയാണ് ഓപ്പറേഷൻ നടത്തിയതെന്നും ഒരു കെട്ടിടത്തിന്റെ രണ്ടാം നിലയില്‍ സ്ഥിതി ചെയ്യുന്ന ഇവരുടെ കേന്ദ്രം കുറച്ചുകാലമായി നിരീക്ഷിച്ചിട്ടുണ്ടെന്നും ലെഫ്റ്റനൻ്റ് കേണല്‍ റിച്ചാർഡ് ഹെക്റ്റ് പറഞ്ഞു.

റെയ്ഡ് നടക്കുമ്പോള്‍ പ്രധാനമന്ത്രി ബെഞ്ചമിൻ നെതന്യാഹു ഇസ്രായേല്‍ സൈനിക മേധാവിയും മറ്റ് ഉന്നത ഉദ്യോഗസ്ഥരും ചേർന്നു. ഇനിയും നൂറോളം ബന്ദികള്‍ ഹമാസിന്റെ തടവിലാണെന്ന് ഇസ്രായേല്‍ പറയുന്നു. അതേസമയം ഒക്‌ടോബർ 7-ന് കൊല്ലപ്പെടുകയോ തടവില്‍ മരിക്കുകയോ ചെയ്ത 30 ഓളം പേരുടെ അവശിഷ്ടങ്ങള്‍ ഹമാസ് കൈവശം വച്ചിരിക്കുകയാണ്. എല്ലാ ബന്ദികളേയും രക്ഷിക്കുക എന്നത് യുദ്ധത്തിന്റെ പ്രധാന ലക്ഷ്യങ്ങളിലൊന്നാണെന്ന് ഇസ്രായേല്‍ ഉറപ്പിച്ചു പറഞ്ഞു.