ഗാസയില്‍ ആറാഴ്ച നീളുന്ന വെടിനിര്‍ത്തലിനും, ഇസ്രായേലി ബന്ദികളെ മോചിപ്പിക്കാനുമുള്ള ചര്‍ച്ച പുരോഗമിക്കുന്നു...
ഗാസയില്‍ ആറാഴ്ച നീളുന്ന വെടിനിര്‍ത്തലിനും, ഹമാസിന്റെ കൈവശമുള്ള ഇസ്രായേലി ബന്ദികളെ മോചിപ്പിക്കാനുമുള്ള ചര്‍ച്ച പുരോഗമിക്കുകയാണെന്ന് അറിയിച്ച്, അമേരിക്കന്‍ പ്രസിഡന്റ് ജോ ബൈഡന്‍. ജോര്‍ഡന്‍ രാജാവ് അബ്ദുല്ലയുമായി, വൈറ്റ് ഹൗസില്‍ കൂടിക്കാഴ്ച നടത്തിയതിന് ശേഷമാണ് അദ്ദേഹം ഇക്കാര്യം വെളിപ്പെടുത്തിയത്. വെടിനിര്‍ത്തല്‍ ചര്‍ച്ചകള്‍ ഊര്‍ജിതമാക്കുന്നതിന്റെ ഭാഗമായാണ് അബ്ദുല്ല രാജാവ് വാഷിങ്ടണിലെത്തിയത്. ഗാസയില്‍ ഇനിയും നിരപരാധികളുടെ ചോര വീഴുന്നത് ദുഃഖകരമാണെന്നും ഏത്, വിധേനയും വെടിനിര്‍ത്തല്‍ യാഥാര്‍ഥ്യമാക്കാനാണ് ശ്രമം നടത്തുന്നതെന്നും ബൈഡന്‍ പറഞ്ഞു. താല്‍ക്കാലിക വെടിനിര്‍ത്തലല്ല, സമ്പൂര്‍ണ യുദ്ധവിരാമമാണ് വേണ്ടതെന്ന് അബ്ദുല്ല രാജാവ് അഭിപ്രായപ്പെട്ടു.
ഈജിപ്തിന്റെയും ഖത്തറിന്റെയും മധ്യസ്ഥതയില്‍ വെടിനിര്‍ത്തല്‍ വ്യവസ്ഥകള്‍ സംബന്ധിച്ച ചര്‍ച്ചകള്‍ നടക്കുന്നുണ്ട്. അമേരിക്കന്‍ രഹസ്യാന്വേഷണ ഏജന്‍സിയായ CIA ഡയറക്ടര്‍ വില്യം ബേണ്‍സ്, ഇതിന്റെ ഭാഗമായി കൈറോയിലെത്തി. ഇസ്രായേല്‍ ചാര സംഘടനയായ മൊസാദ് തലവന്‍ ഡേവിഡ് ബെര്‍ണിയയും ഇന്ന് കൈറോയിലെത്തും.
ഗാസയിലെ ഫലസ്തീനികളുടെ ജീവിതം കൂടുതല്‍ ദുരിതമയമാകുന്നത് ചൂണ്ടിക്കാട്ടി അറബ് രാജ്യങ്ങള്‍ വെടിനിര്‍ത്തലിനായി സമ്മര്‍ദം ചെലുത്തിവരുകയാണ്. റഫയില്‍ ആക്രമണം ശക്തമാക്കാനുള്ള ഇസ്രായേല്‍ തീരുമാനം ചര്‍ച്ചകള്‍ക്കും ബന്ദിമോചനത്തിനും തിരിച്ചടിയാകുമെന്ന് ഹമാസ് മുന്നറിയിപ്പ് നല്‍കിയിരുന്നു.
https://www.facebook.com/Malayalivartha
