ഭാര്യയുടെ ഓഫീസ് കോളുകള്‍ ചോര്‍ത്തി യുവാവ് സമ്പാദിച്ചത് രണ്ട് മില്യണ്‍ ഡോളര്‍ (16 കോടിയിലധികം രൂപ). അമേരിക്കയിലെ ടെക്സാസിലാണ് സംഭവം. അന്താരാഷ്ട്ര എണ്ണ, വാതക കമ്പനിയായ ബിപിയിലാണ് യുവതി ജോലി ചെയ്യുന്നത്. വീട്ടിലിരുന്ന് ജോലി ചെയ്യുകയായിരുന്നു യുവതി. സഹപ്രവര്‍ത്തകരുമായി യുവതി നടത്തിയ സംഭാഷണങ്ങളാണ് പ്രതിയായ ടെയ്ലര്‍ ലൗഡണ്‍ ചോര്‍ത്തിയതെന്ന് യുഎസ് സെക്യൂരിറ്റീസ് ആന്റ് എക്സ്ചേഞ്ച് കമ്മിഷന്‍ അറിയിച്ചു.

ബിപിയില്‍ മാനേജര്‍ തസ്തികയില്‍ ജോലി ചെയ്യുകയായിരുന്നു ടെയ്ലറിന്റെ ഭാര്യ. ട്രാവല്‍ സെന്റേഴ്സ് ഒഫ് അമേരിക്ക എന്ന കമ്പനിയെ വാങ്ങാനുള്ള നീക്കത്തിലായിരുന്നു ബിപി. ഈ ഇടപാടിന്റെ ചുമതല വഹിച്ചിരുന്നത് ടെയ്ലറിന്റെ ഭാര്യയായിരുന്നു. ഭാര്യ നടത്തിയ രഹസ്യ സ്വഭാവമുള്ള സംഭാഷണങ്ങള്‍ ചോര്‍ത്തി മാസങ്ങളോളം ഇയാള്‍ ട്രാവല്‍ സെന്റേഴ്സ് ഒഫ് അമേരിക്കയുടെ ഓഹരികള്‍ വാങ്ങി. ഇതിനിടെ കഴിഞ്ഞവര്‍ഷം ഫെബ്രുവരിയില്‍ ട്രാവല്‍സെന്റേഴ്സ് ഒഫ് അമേരിക്കയെ 74 ശതമാനം പ്രീമിയത്തിന് സ്വന്തമാക്കുകയാണെന്ന് ബിപി പ്രഖ്യാപനം നടത്തിയപ്പോള്‍ ടെയ്ലര്‍ 1.76 മില്യണ്‍ ഡോളര്‍ ലാഭമാണ് നേടിയത്.

എന്നാല്‍ ടെയ്ലര്‍ നടത്തിയ ഇടപാടുകള്‍ ഭാര്യ അറിഞ്ഞിരുന്നില്ല.ശേഷം തന്റെ ഇടപാടുകളുടെ വിവരം ടെയ്ലര്‍ ഭാര്യയോട് തുറന്ന് സമ്മതിക്കുകയായിരുന്നു. പിന്നാലെ യുവതി ബന്ധം ഉപേക്ഷിക്കുകയും വിവാഹമോചനത്തിന് ഹര്‍ജി ഫയല്‍ ചെയ്യുകയും ചെയ്തു. ഭര്‍ത്താവിന്റെ ഇടപാട് വിവരം കമ്പനിയെ അറിയിച്ചതോടെ യുവതിക്ക് ജോലിയും നഷ്ടമായെന്ന് യുഎസ് സെക്യൂരിറ്റീസ് ആന്റ് എക്സ്ചേഞ്ച് കമ്മിഷന്‍ പറഞ്ഞു. ഇടപാടിലൂടെ സമ്പാദിച്ച പണം തിരികെ നല്‍കാമെന്നും പിഴ അടയ്ക്കാമെന്നും അറിയിച്ചിരിക്കുകയാണ് ടെയ്ലര്‍.