നൈജീരിയയിലെ തോക്കുധാരികള്‍ വടക്കന്‍ പട്ടണമായ കുരിഗയില്‍ നിന്ന് 200 ലധികം സ്‌കൂള്‍ വിദ്യാര്‍ത്ഥികളെ തട്ടിക്കൊണ്ടുപോയി. സെക്കന്‍ഡറി വിഭാഗത്തില്‍ നിന്ന് 187 പേരെയും പ്രൈമറി വിഭാഗത്തില്‍ 40 പേരെയുമാണ് തട്ടിക്കൊണ്ട് പോയതെന്ന് ഹോം ഇക്കണോമി അധ്യാപകനായ സാനി അബ്ദുള്ള പറഞ്ഞു. 2021 ന് ശേഷം ഇവിടുത്തെ സ്‌കൂളില്‍ നടക്കുന്ന ഏറ്റവും വലിയ തട്ടിക്കൊണ്ടുപോകലാണിതെന്ന് ഒരു അധ്യാപകനും പ്രാദേശിക കൗണ്‍സിലറും കാണാതായ കുട്ടികളുടെ മാതാപിതാക്കളും പറഞ്ഞു. അന്ന് മോചനദ്രവ്യം നല്‍കി മാസങ്ങള്‍ക്കുശേഷം വിദ്യാര്‍ഥികള്‍ കുടുംബത്തിലേക്ക് മടങ്ങി എത്തിയിരുന്നു. പ്രദേശത്ത് സുരക്ഷയില്ലാത്തതാണ് തട്ടിക്കൊണ്ടുപോകലിന് കാരണമെന്ന് രക്ഷിതാക്കളും നാട്ടുകാരും ആരോപിച്ചു.

കടുന സംസ്ഥാന ഗവര്‍ണര്‍ ഉബ സാനി കുരിഗ സന്ദര്‍ശിക്കുകയും വിദ്യാര്‍ത്ഥികളെ മോചിപ്പിക്കുമെന്ന് വാഗ്ദാനം ചെയ്യുകയും ചെയ്തു, എന്നാല്‍ എത്ര വിദ്യാര്‍ത്ഥികളെ കാണാതായെന്ന് അദ്ദേഹത്തിന്റെ ഓഫീസ് അറിയിച്ചില്ല. വിദ്യാര്‍ത്ഥികളെ സുരക്ഷിതമായി രക്ഷപ്പെടുത്താനും കുറ്റവാളികളെ പിടികൂടാനും ആംനസ്റ്റി ഇന്റര്‍നാഷണല്‍ നൈജീരിയന്‍ അധികൃതരോട് ആവശ്യപ്പെട്ടു.