വീണ്ടും ട്രംപ് രംഗത്ത് വരികയാണ് . യുക്രെയ്ൻ യുദ്ധത്തിൻ്റെ പേരിൽ റഷ്യയെ ഒറ്റപ്പെടുത്താനുള്ള ശ്രമങ്ങൾക്കിടെ, റഷ്യയിൽ നിന്ന് എണ്ണ വാങ്ങുന്നത് ഇന്ത്യ നിർത്തുമെന്ന് പ്രധാനമന്ത്രി നരേന്ദ്ര മോദി തനിക്ക് ഉറപ്പ് നൽകിയതായി യുഎസ് പ്രസിഡൻ്റ് ഡൊണാൾഡ് ട്രംപ് ബുധനാഴ്ച പറഞ്ഞു. ഇത് ഒരു വലിയ ചുവടുവയ്പ്പാണെന്നും ട്രംപ് അഭിപ്രായപ്പെട്ടു.റഷ്യൻ ക്രൂഡ് ഓയിൽ ഇന്ത്യ തുടർന്നും ഇറക്കുമതി ചെയ്യുന്നതിനെക്കുറിച്ച് താൻ പ്രധാനമന്ത്രി മോദിയോട് ആശങ്ക അറിയിച്ചതായി വൈറ്റ് ഹൗസിൽ മാധ്യമപ്രവർത്തകരോട് സംസാരിക്കവെ ട്രംപ് പറഞ്ഞു.

ഇന്ത്യയുടെ എണ്ണ ഇറക്കുമതി റഷ്യൻ പ്രസിഡൻ്റ് വ്‌ളാഡിമിർ പുടിൻ്റെ യുദ്ധത്തിന് ധനസഹായം നൽകുന്നു എന്നാണ് വാഷിംഗ്ടൺ വിശ്വസിക്കുന്നത്. "ഇന്ത്യ എണ്ണ വാങ്ങുന്നതിൽ എനിക്ക് സന്തോഷമുണ്ടായിരുന്നില്ല," ട്രംപ് പറഞ്ഞു."പ്രധാനമന്ത്രി നരേന്ദ്ര മോദി ഇന്ന് എന്നോട് റഷ്യയിൽ നിന്ന് എണ്ണ വാങ്ങുന്നത് നിർത്തുമെന്ന് ഉറപ്പ് നൽകി. അതൊരു വലിയ ചുവടുവയ്പ്പാണ്. ഇനി ചൈനയെക്കൊണ്ട് ഇതേ കാര്യം ചെയ്യിക്കണം," അദ്ദേഹം കൂട്ടിച്ചേർത്തു.ഊർജ്ജ നയത്തിലെ അഭിപ്രായവ്യത്യാസങ്ങൾക്കിടയിലും പ്രധാനമന്ത്രി മോദി തൻ്റെ അടുത്ത പങ്കാളിയാണെന്നും ട്രംപ് പറഞ്ഞു.

"അദ്ദേഹം (നരേന്ദ്ര മോദി) എൻ്റെ സുഹൃത്താണ്. ഞങ്ങൾ തമ്മിൽ മികച്ച ബന്ധമുണ്ട്," ചൈനയുമായുള്ള സംഘർഷങ്ങൾക്കിടയിൽ ഇന്ത്യയെ വിശ്വസനീയമായ പങ്കാളിയായി കാണുന്നുണ്ടോ എന്ന ചോദ്യത്തിന് മറുപടിയായി ട്രംപ് പറഞ്ഞു.എങ്കിലും, റഷ്യൻ എണ്ണ ഇറക്കുമതി ഇന്ത്യ നിർത്തുമെന്ന ട്രംപിൻ്റെ വാദം ന്യൂഡൽഹി ഇതുവരെ സ്ഥിരീകരിച്ചിട്ടില്ല.മോദിയുടെ ഉറപ്പ് ലഭിച്ചത് മോസ്കോയുടെ ഊർജ്ജ വരുമാനം ഇല്ലാതാക്കാനുള്ള തൻ്റെ നയതന്ത്ര നീക്കത്തിൻ്റെ ഭാഗമാണെന്ന് ട്രംപ് പറഞ്ഞു.

ഇനി ചൈനയെക്കൊണ്ട് ഇതേ കാര്യം ചെയ്യിക്കണമെന്നും അദ്ദേഹം കൂട്ടിച്ചേർത്തു. ചൈനയെ സമ്മർദ്ദത്തിലാക്കുന്നത് കഴിഞ്ഞ ആഴ്ച നമ്മൾ മിഡിൽ ഈസ്റ്റിൽ ചെയ്തതിനേക്കാൾ താരതമ്യേന എളുപ്പമായിരിക്കും എന്നും അദ്ദേഹം പറഞ്ഞു.