വിമാനം ലാന്‍ഡ് ചെയ്തതിനിടയില്‍ റണ്‍വേയില്‍ വിഹരിക്കുന്ന ആളെ കണ്ട് ഞെട്ടി അധികൃതര്‍
ജപ്പാനിലെ വിമാനത്താവളത്തിന്റെ പ്രവര്‍ത്തനം താറുമാറാക്കിയ ആളെ കണ്ട് ഞെട്ടി അധികൃതര്‍. അപ്രതീക്ഷിതമായി റണ്‍വേയില്‍ കരടി എത്തിയതോടെയാണ് ജപ്പാനിലെ പ്രധാന വിമാനത്താവളത്തിന്റെ പ്രവര്‍ത്തനം അലങ്കോലമായത്. ജപ്പാനിലെ വടക്ക് കിഴക്കന്‍ മേഖലയിലെ ഹനമാക്കി വിമാനത്താവളത്തില്‍ ബുധനാഴ്ചയാണ് കരടി കയറിയത്.
യാത്രാ വിമാനം ലാന്‍ഡ് ചെയ്യുന്നതിനിടയിലാണ് റണ്‍വേയിലൂടെ തലങ്ങും വിലങ്ങും പായുന്ന കരടിയെ വിമാനത്താവള അധികൃതര്‍ കണ്ടെത്തിയത്. പിന്നാലെ റണ്‍വേ അടച്ചിട്ട് പൊലീസും വിമാനത്താവള അധികൃതരും ചേര്‍ന്ന് തെരച്ചില്‍ നടത്തിയെങ്കിലും കരടിയെ കണ്ടെത്താനായില്ല. രണ്ട് മണിക്കൂറോളമാണ് കരടിയെ തെരഞ്ഞ് റണ്‍വേ അടച്ചിട്ടത്.
നേരത്തെ നവംബര്‍ മാസത്തില്‍ ജപ്പാന്‍ പ്രതിരോധ സേന സമീപ മേഖലയില്‍ കരടിയുടെ ആക്രമണം തടയാനായി സേനയെ വിന്യസിച്ചിരുന്നു. പര്‍വ്വത മേഖലയിലെ സാധാരണക്കാര്‍ക്ക് നേരെ കരടിയുടെ ആക്രമണം പതിവായതിന് പിന്നാലെയായിരുന്നു ഇത്. സ്‌കൂളുകള്‍, റെയില്‍വേ സ്‌റ്റേഷന്‍, സൂപ്പര്‍ മാര്‍ക്കറ്റുകള്‍, റിസോര്‍ട്ടുകള്‍ എന്നിവയ്ക്ക് സമീപത്ത് ആളുകളെ കൂസാതെ കരടി എത്തുകയും സാധാരണക്കാരെ ആക്രമിക്കുന്നതും വടക്ക് കിഴക്കന്‍ ജപ്പാനില്‍ സാധാരണമായിരുന്നു. ഏപ്രില്‍ മാസം മുതല്‍ 100ലേറെ ആളുകളാണ് കരടിയുടെ ആക്രമണത്തില്‍ പരിക്കേറ്റത്. 12 പേരെ കരടി കൊല്ലുകയും ചെയ്തിരുന്നു. 2006 മുതലാണ് ജപ്പാനില്‍ കരടിയാക്രമണം രേഖപ്പെടുത്താന്‍ ആരംഭിച്ചത്.
https://www.facebook.com/Malayalivartha
