പതിനാലാം വയസില് കോഡിംഗിനോട് തോന്നിയ താല്പര്യം: ഇന്ന് ഇരുപത്തഞ്ചുകാരനെ കോടീശ്വരനാക്കി
ഇലോണ് മസ്കിന്റെ ബഹിരാകാശ ഗവേഷണ കമ്പനിയായ സ്പേസ് എക്സ് എഐ കോഡിംഗ് ഏജന്റായ കേഴ്സറിന് പിന്നിലുള്ള സോഫ്റ്റ്വെയര് കമ്പനി അനിസ്ഫിയറിനെ 60 ബില്യണ് (6000 കോടി) ഡോളറിന് വാങ്ങാന് ഒരുങ്ങുന്ന എന്ന വാര്ത്തയാണ് ഇപ്പോള് ഐടി ലോകത്തെ ചൂടേറിയ ചര്ച്ചാവിഷയം. എന്റര്െ്രെപസ് എഐ (നിര്മ്മിതബുദ്ധിക) വിപണിയില് ശക്തമായ സാന്നിധ്യം ഉറപ്പിക്കുന്നതിനുള്ള നീക്കത്തിന്റെ ഭാഗമായാണ് ഇലോണ് മസ്കിന്റെ ഈ പുതിയ നീക്കം.
ഈ വാര്ത്ത പുറത്തുവന്നതിന് പിന്നാലെ സോഷ്യല് മീഡിയ തിരഞ്ഞത് കഴ്സറിന്റെ സഹസ്ഥാപകനായ ഇന്ത്യന് വംശജന് അമന് സാംഗറിനെ കുറിച്ചാണ്. വെറും ഇരുപത്തഞ്ചുവയസുള്ള അമന്റെ വളര്ച്ച ഈ മേഖലയിലുള്ളവരെ ഒരുപോലെ ഞെട്ടിച്ചിരിക്കുകയാണ്. ന്യൂയോര്ക്കില് വളര്ന്ന അമന്റെ കുടുംബത്തിന് ശക്തമായ ഇന്ത്യന് വേരുകളുണ്ട്. പിതാവ് അരവിന്ദ് സാംഗര് ഐഐടി ബോംബെയിലെ മുന് വിദ്യാര്ത്ഥിയും പ്രമുഖ ഹെഡ്ജ് ഫണ്ട് പ്രൊഫഷണലുമാണ്. അമ്മ ശില്പ സാംഗര് ദന്തഡോക്ടറും സംരംഭകയുമാണ്. പതിനാലാം വയസില് കോഡിംഗിനോട് തോന്നിയ താല്പര്യമാണ് അമനെ ഈ മേഖലയിലേയ്ക്ക് എത്തിച്ചത്.
2026 സാമ്പത്തിക വര്ഷത്തിന്റെ മൂന്നാം പാദത്തോടെ കമ്പനികളുടെ ലയനം ഔദ്യോഗികമായി പൂര്ത്തിയാകുമെന്ന് സ്പേസ്എക്സ് ഉദ്യോഗസ്ഥര് പറയുന്നു. ലയനത്തിന് ശേഷം കേഴ്സസര് സ്പേസ് എക്സിന്റെ പൂര്ണ്ണ ഉടമസ്ഥതയിലുള്ള കമ്പനിയായി പ്രവര്ത്തിക്കും. ഒരു സാധാരണ കൗമാരക്കാരനില് നിന്നും ഏതാനും വര്ഷങ്ങള് കൊണ്ട് ആഗോള ശതകോടീശ്വരനായി മാറിയ അമന് സാംഗറിന്റെ വിജയം ഐടി ലോകത്തെ പുതിയ ഇന്ത്യന് തിളക്കമാണ്.
വെറുമൊരു ചാറ്റ് ബോട്ട് ഉണ്ടാക്കുന്നതിന് പകരം പ്രോഗ്രാമര്മാര്ക്ക് കോഡ് എഴുതാനും എഡിറ്റ് ചെയ്യാനും സഹായിക്കുന്ന ഒരു ആര്ട്ടിഫിഷ്യല് ഇന്റലിജന്സ് (എഐ) ടൂള് ആണ് കേഴ്സര്. അഡോബ്, യൂബര് തുടങ്ങിയ വമ്പന് കമ്പനികളിലെ 50000ത്തോളം ടീമുകള് നിലവില് കേഴ്സസര് ഉപയോഗിക്കുന്നുണ്ട്. പ്രതിവര്ഷം 1 ബില്യണ് ഡോളറിലധികം (ഏകദേശം 8300 കോടി രൂപ) വരുമാനം നേടുന്ന കമ്പനിയായി കേഴ്സര് ഇതിനകം ആഗോളതലത്തില് വളര്ന്നുകഴിഞ്ഞു.
സ്പേസ്എക്സ് ഏറെക്കാലമായി കേഴ്സറിനെ നിരീക്ഷിച്ചു വരികയായിരുന്നു. സാന് ഫ്രാന്സിസ്കോ ആസ്ഥാനമായ സ്റ്റാര്ട്ടപ്പിനെ 60 ബില്യണ് ഡോളറിന് വാങ്ങാനോ പകരം 10 ബില്യണ് ഡോളര് നല്കി കോര്പ്പറേറ്റ് പങ്കാളിത്തം സ്ഥാപിക്കാനോ ഉള്ള സാധ്യതകള് സ്പേസ് എക്സിന് മുന്നിലുണ്ടായിരുന്നെങ്കിലും. പൂര്ണമായി ഏറ്റെടുക്കാനാണ് സ്പേസ് എക്സ് തീരുമാനിച്ചത്.
ലോകപ്രശസ്തമായ മസാച്യുസെറ്റ്സ് ഇന്സ്റ്റിറ്റിയൂട്ട് ഓഫ് ടെക്നോളജിയില് ഉപരിപഠനത്തിന് ചേര്ന്നതാണ് അമാന്റെ ജീവിതത്തില് വഴിത്തിരിവായത്. അവിടെവച്ച് പരിചയപ്പെട്ട മൈക്കല് ട്രൂവല്, സുലൈഹ് ആസിഫ്, അര്വിഡ് ലുനെമാര്ക്ക് എന്നിവരുമായി ചേര്ന്നാണ് കേഴ്സറിന്റെ മാതൃകമ്പനിയായ 'അനിസ്ഫിയര്' സ്ഥാപിച്ചത്. കേഴ്സര് തുടങ്ങുന്നതിന് മുന്പ് ഗൂഗിളിലും ബ്രിഡ്ജ് വാട്ടര് അസോസിയേറ്റ്സിലും അമാന് ഇന്റേണ്ഷിപ്പ് ചെയ്തിട്ടുണ്ട്. കൂടാതെ ഒരു സ്വന്തം എഐ കണ്സള്ട്ടന്സി സ്ഥാപനവും അമാനുണ്ടായിരുന്നു.
https://www.facebook.com/Malayalivartha
