ആണവ കേന്ദ്രങ്ങളിലെ ഐഎഇഎ പരിശോധനയ്ക്ക് ഇറാന് അനുമതി നല്കി
അന്താരാഷ്ട്ര ആണവോര്ജ ഏജന്സിയുടെ പരിശോധനകള്ക്ക് ഇറാന് അനുമതി നല്കിയതായി യുഎസ് വൈസ് പ്രസിഡന്റ് ജെ ഡി വാന്സ്. അമേരിക്കയും ഇറാനും തമ്മില് നടത്തുന്ന ചര്ച്ചകളില് വന് പുരോഗതിയുണ്ടെന്ന് ജെ ഡി വാന്സ്അറിയിച്ചു. ഇസ്രയേല് ലെബനനില് നടത്തിയ ആക്രമണം വെടിനിര്ത്തല് കരാറിന്റെ ലംഘനമാണെന്ന് ആരോപിച്ച് ഹോര്മുസ് കടലിടുക്ക് വീണ്ടും അടച്ചുപൂട്ടുകയാണെന്ന് ഇറാന് പ്രഖ്യാപിച്ചതോടെയാണ് ചര്ച്ചകള് പ്രതിസന്ധിയിലായത്. തുടക്കത്തില് ചില അസ്വാരസ്യങ്ങള് ഉണ്ടായെങ്കിലും സ്വിറ്റ്സര്ലന്റിലെ ചര്ച്ചകള് വിജയകരമായി മുന്നോട്ടുപോയെന്നും വലിയ പുരോഗതി കൈവരിക്കാന് കഴിഞ്ഞെന്നും വാന്സ് കൂട്ടിച്ചേര്ത്തു.
ആണവോര്ജ ഏജന്സിയുടെ ഇന്സ്പെക്ടര്മാരെ തിരികെ പ്രവേശിപ്പിക്കാമെന്ന ഇറാന്റെ സമ്മതം അമേരിക്കയെ സംബന്ധിച്ചിടത്തോളം വലിയൊരു നാഴികക്കല്ലാണെന്ന് വാന്സ് വ്യക്തമാക്കി. ഇറാനിലെ ആണവായുധ പദ്ധതികള്ക്ക് ശാശ്വതമായി അന്ത്യം കുറിക്കുന്നതിനുള്ള ആദ്യ പടിയാണിതെന്നും മേഖലയില് കൂടുതല് സംഘര്ഷങ്ങള് ഒഴിവാക്കാനും സമാധാനം ഉറപ്പാക്കാനുമുള്ള നടപടികളിലേക്ക് അടുക്കുകയാണെന്നും ജെ ഡി വാന്സ് പറഞ്ഞു.
ചര്ച്ചകളില് നിര്ണായക പുരോഗതിയുണ്ടായതായി ഇറാന് വിദേശകാര്യ മന്ത്രി അബ്ബാസ് അരാഗ്ചിയും നേരത്തെ സ്ഥിരീകരിച്ചിരുന്നു. ഒരു അന്തിമ കരാറിലെത്തുന്നതിനായി ഇനിയും ഒരുപാട് കാര്യങ്ങള് ചെയ്യാനുണ്ടെന്ന് വാന്സ് ചൂണ്ടിക്കാട്ടി. പ്രത്യേകിച്ച് ആഗോള ഊര്ജ വിതരണത്തിന്റെ 25 ശതമാനത്തോളം കടന്നുപോകുന്ന ഹോര്മുസ് കടലിടുക്കിലെ മൈനുകള് നീക്കം ചെയ്യുന്നതും കപ്പല് ഗതാഗതം പുനഃസ്ഥാപിക്കുന്നതും അടക്കമുള്ള കാര്യങ്ങളില് ഇനിയും നടപടികള് ആവശ്യമുണ്ട്.
ഇറാനിന്റെ മരവിപ്പിച്ച ആസ്തികള് വിട്ടുനല്കുന്നതുമായി ബന്ധപ്പെട്ട് ജാരെഡ് കുഷ്നറും ഖത്തറും ചേര്ന്ന് ശ്രദ്ധേയമായ ഒരു ഫോര്മുല മുന്നോട്ടുവെച്ചിട്ടുണ്ടെന്ന് വാന്സ് വെളിപ്പെടുത്തി. ഈ ആസ്തികള് അണ്ഫ്രീസ് ചെയ്യുന്ന പ്രക്രിയയുടെ പൂര്ണ്ണമായ നിയന്ത്രണം അമേരിക്കയ്ക്കായിരിക്കുമെന്നും അദ്ദേഹം പറഞ്ഞു. ഈ പദ്ധതി പ്രകാരം ഇറാന്റെ ആസ്തികള് വിട്ടുനല്കുകയാണെങ്കില്, അത് അമേരിക്കന് കര്ഷകര്ക്ക് കൂടുതല് സാമ്പത്തിക നേട്ടമുണ്ടാക്കാനും അതുവഴി ഇറാനിലെ ജനങ്ങള്ക്ക് ഭക്ഷണം ലഭ്യമാക്കാനും വേണ്ടിയായിരിക്കും ഉപയോഗിക്കുകയെന്ന് വാന്സ് വിശദീകരിച്ചു.
https://www.facebook.com/Malayalivartha
