മുംബയ് ഭീകരാക്രമണത്തിന്റെ സൂത്രധാരന്‍ ഹാഫിസ് സെയിദിനെ വീട്ടുതടങ്കലില്‍ നിന്നും മോചിപ്പിക്കാന്‍ പാക് സര്‍ക്കാര്‍ ഒരുങ്ങുന്നു. ഭീകരവാദ നിയമത്തിന്റെ അടിസ്ഥാനത്തില്‍ വീട്ടുതടങ്കലിലാക്കിയിരിക്കുന്ന ഹാഫിസിന്റെ തടവ് ഇനിയും തുടരേണ്ടതില്ലെന്നാണ് സര്‍ക്കാര്‍ നിലപാട്.

ഇതനുസരിച്ച് ഇയാളുടെ തടങ്കല്‍ നീട്ടുന്നതിന് നല്‍കിയിരുന്ന അപേക്ഷ സര്‍ക്കാര്‍ പിന്‍വലിച്ചു. രാജ്യ സുരക്ഷയ്ക്കും സമാധാനത്തിനും ഭീഷണയാണെന്ന് കാണിച്ച് ഈ വര്‍ഷം ജനുവരി 31 മുതല്‍ ഹാഫീസ് സെയ്ദിനെയും നാല് സഹായികളെയും സര്‍ക്കാര്‍ വീട്ടുതടങ്കലിലാക്കിയിരുന്നു. ആദ്യം 90 ദിവസത്തേക്കായിരുന്നു വീട്ടുതടങ്കലെങ്കിലും പിന്നീടിത് രണ്ട് മാസത്തേക്ക് കൂടി നീട്ടിയിരുന്നു.

എന്നാല്‍ ഇതിന് പിന്നാലെ വീട്ടുതടങ്കല്‍ നീട്ടാന്‍ സര്‍ക്കാര്‍ നല്‍കിയ അപേക്ഷ മതിയായ മാനദണ്ഡങ്ങള്‍ പാലിച്ചില്ലെന്ന് കോടതി ചൂണ്ടിക്കാട്ടിയിരുന്നു. തുടര്‍ന്നാണ് തങ്ങള്‍ അപേക്ഷ പിന്‍വലിക്കുന്നതായി സര്‍ക്കാര്‍ അറിയിച്ചത്. എന്നാല്‍ സെയിദിന്റെ വീട്ടുതടങ്കല്‍ അവസാനിപ്പിക്കുന്നതിന് സര്‍ക്കാര്‍ മനപ്പൂര്‍വം കോടതിയില്‍ വീഴ്ച വരുത്തിയെന്നാണ് ആക്ഷേപം. നിയമ പ്രകാരം കോടതിയില്‍ ഹാജരാക്കിയാല്‍ മാത്രമേ വീട്ടുതടങ്കല്‍ നീട്ടാന്‍ അനുവദിക്കാറുള്ളൂ. ഇത് അറിയാമായിരുന്നിട്ടും ഹാഫിസ് സെയിദിനെയും കൂട്ടാളികളെയും കോടതിയില്‍ ഹാജരാക്കാതെ ഒത്തുകളിച്ചെന്നാണ് ആക്ഷേപം.

എന്നാല്‍ ഇക്കാര്യത്തില്‍ കോടതിയുടെ അനുമതി വേണ്ടെന്നും സര്‍ക്കാരിന് തീരുമാനമെടുക്കാനാകുമെന്നും മുതിര്‍ന്ന ഉദ്യോഗസ്ഥന്‍ വ്യക്തമാക്കി. നിലവില്‍ ഒക്‌ടോബര്‍ 24 വരെ സെയിദിന്റെ വീട്ടുതടങ്കല്‍ കാലാവധിയുണ്ടെന്നും അദ്ദേഹം ചൂണ്ടിക്കാട്ടി. പാകിസ്ഥാനില്‍ സൈന്യം പിടിമുറുക്കുന്നതായുള്ള സൂചനകള്‍ക്കിടയാണ് ഈ വാര്‍ത്ത പുറത്തുവരുന്നത്. തീവ്രവാദികളെ മുഖ്യധാരയിലേക്ക് കൊണ്ടുവരുന്നതിന്റെ ഭാഗമായി ഹാഫിസ് സെയിദിനെ രാഷ്ട്രീയത്തിലിറക്കാന്‍ സൈന്യം പദ്ധതിയിടുന്നതായും റിപ്പോര്‍ട്ടുകളുണ്ടായിരുന്നു. ആഗോള ഭീകര സംഘടനയായി പ്രഖ്യാപിക്കപ്പെട്ട ജമാഅത്തു ദഅ്‌വയുടെ നേതാവായ സെയിദിന്റെ തലയ്ക്ക് 10 മില്യന്‍ അമേരിക്കന്‍ ഡോളര്‍ ഇനാം പ്രഖ്യാപിച്ചിട്ടുണ്ട്.