പെര്‍ത്തില്‍ നിന്ന് ഇന്തൊനീഷ്യയിലെ ബാലിയിലേക്കുള്ള എയര്‍ ഏഷ്യ വിമാനത്തില്‍ കഴിഞ്ഞ ദിവസം അരങ്ങേറിയത് നാടകീയ സംഭവങ്ങള്‍. ഓസ്‌ട്രേലിയയിലെ പെര്‍ത്തില്‍ നിന്ന് യാതൊരു പ്രശ്‌നങ്ങളുമില്ലാതെയായിരുന്നു യാത്രയുടെ തുടക്കം. രാവിലെ 11.35ഓടെ എയര്‍ ഏഷ്യയുടെ ആ ക്യുസെഡ് 535 ഫ്‌ലൈറ്റ് പറന്നുയര്‍ന്നു. പക്ഷേ മുന്നേമുക്കാല്‍ മണിക്കൂര്‍ വരുന്ന യാത്രയില്‍ അരമണിക്കൂര്‍ തികയും മുന്‍പ് ആകാശത്തു വച്ചുണ്ടായത് തികച്ചും അപ്രതീക്ഷിത സംഭവങ്ങള്‍. യാത്രക്കാരും സ്റ്റാഫംഗങ്ങളും നിലവിളിയോടെയാണ് അതിനെ നേരിട്ടത്.

യാത്ര തുടങ്ങി 25 മിനിറ്റ് കഴിഞ്ഞ നേരം. പടിഞ്ഞാറന്‍ ഓസ്‌ട്രേലിയയ്ക്കു മുകളിലെത്തിയിരുന്നു. പെട്ടെന്നാണ് തികച്ചും അപ്രതീക്ഷിതമായി വിമാനം 20,000 അടി താഴേക്കു പതിച്ചത്.

അതായത് 32,000 അടിയില്‍ നിന്ന് 10,000 അടി താഴേക്ക്. സ്വാഭാവികമായും യാത്രക്കാരുടെ മുന്നിലേക്ക് ഓക്‌സിജന്‍ മാസ്‌കുകള്‍ വന്നുവീണു. എന്താണ് സംഭവിക്കുന്നതെന്നറിയാന്‍ 145 യാത്രക്കാരും ചുറ്റിലും നോക്കിയപ്പോള്‍ സ്റ്റാഫ് അംഗങ്ങള്‍ എന്തൊക്കെയോ ഭീതിയോടെ വിളിച്ചു പറയുന്നു.

അല്‍പം ആശ്വാസത്തിനു വേണ്ടി അവരെ നോക്കിയ യാത്രക്കാരുടെ ഭയം പക്ഷേ ഇരട്ടിക്കുകയായിരുന്നു. വിമാനം തകരാന്‍ പോകുന്ന വിധമായിരുന്നു സ്റ്റാഫിന്റെ മറുപടികള്‍. പലരുടെയും കണ്ണുകളില്‍ ഭീതി നിറഞ്ഞിരുന്നു. ഞെട്ടി അലറി വിളിക്കുകയായിരുന്നു അവര്‍. യാത്രക്കാരെ ആശ്വസിപ്പിക്കുന്നതിനു പകരം ഇത്തരത്തില്‍ അവരുടെ ഭയം കൂട്ടിയതിന് പിന്നീട് വ്യാപകവിമര്‍ശനവും എയര്‍ ഹോസ്റ്റസുമാര്‍ ഉള്‍പ്പെടെയുള്ളവര്‍ക്കു നേരെയുണ്ടായി. അവരുടെ പേടി കണ്ടാണ് തങ്ങളും പേടിച്ചു വിറച്ചതെന്നാണ് യാത്രക്കാര്‍ പിന്നീടു പറഞ്ഞത്. എന്താണു സംഭവിക്കുന്നതെന്നു പോലും പറയാതെ നിര്‍ണായക സമയത്ത് പൈലറ്റിന്റെ ഇടപെടലും ഉണ്ടായില്ലെന്നും പരാതിയുണ്ട്.

പലരും അവരുടെ വീട്ടിലേക്ക് മൊബൈലില്‍ നിന്ന് 'അവസാന' മെസേജുകള്‍ വരെ അയച്ചു. ഏറെ നേരത്തെ പരിഭ്രാന്തിക്കൊടുവില്‍ വിമാനം സുരക്ഷിതമായി താഴെയെത്തിയപ്പോള്‍ യാത്രക്കാര്‍ പറഞ്ഞു: 'വിമാനം തകര്‍ന്നെന്നാണു കരുതിയത്. ആ ദുര്‍ഘട നിമിഷങ്ങളില്‍ അതിനോടകം ഞങ്ങള്‍ പരസ്പരം ഗുഡ് ബൈ പറഞ്ഞു കഴിഞ്ഞിരുന്നു...' പക്ഷെ ഇത്രയേറെ പരിഭ്രാന്തിയുണര്‍ത്തിയ സംഭവമുണ്ടായെങ്കിലും യാത്രക്കാരിലാര്‍ക്കും തന്നെ ചെറിയൊരു പരുക്കു പോലും ഏറ്റിരുന്നില്ല.

സംഭവത്തെ കുറിച്ച് അധികൃതര്‍ നല്‍കുന്ന വിശദീകരണമിങ്ങനെ-
'കാബിന്‍ പ്രഷര്‍' നഷ്ടപ്പെട്ടതാണ് പെട്ടെന്നുള്ള വിമാനത്തിന്റെ 'പതന'ത്തിനു കാരണമായതായി പറയുന്നത്. എന്നാല്‍ 'സാങ്കേതിക പ്രശ്‌നം' കാരണമാണ് വിമാനം തിരികെ പെര്‍ത്തിലേക്കു വിട്ടതെന്നാണ് മറ്റൊരു വിശദീകരണം. യാത്രക്കാര്‍ക്ക് പിന്നീട് ബാലിയിലേക്ക് മറ്റൊരു വിമാനം ഏര്‍പ്പാടാക്കിക്കൊടുത്തു. യാത്രക്കാരുടെ സുരക്ഷയാണ് തങ്ങള്‍ക്ക് പ്രാധാന്യമെന്ന് പിന്നീട് എയര്‍ ഏഷ്യ പ്രസ്താവനയില്‍ പറഞ്ഞു. യാത്രക്കാര്‍ക്കുണ്ടായ ബുദ്ധിമുട്ടില്‍ ക്ഷമയും പറഞ്ഞു. വിമാനത്തിനു സംഭവിച്ച സാങ്കേതികത്തകരാറിനെപ്പറ്റി പെര്‍ത്തിലെ എയര്‍ഏഷ്യ സാങ്കേതിക വിദഗ്ധര്‍ പരിശോധന ആരംഭിച്ചിട്ടുണ്ട്.