അമേരിക്കയിലെ ടെക്‌സസില്‍ കാണാതായ ഷെറിന്‍ മാത്യൂസ് എന്ന മൂന്നു വയസുകാരിയെ കൊന്നുതള്ളിയതാകാം എന്ന സംശയം നിലനില്‍ക്കേ സംശയ നിഴലിലായ സ്വന്തം മകനെക്കുറിച്ചുള്ള ആശങ്കയിലാണ് എറണാകുളം വൈറ്റില എല്‍.എം.പൈലി റോഡില്‍ നടുവിലേഴത്ത് മാത്യു. കാണാതായ ഷെറിന്റെ വളര്‍ത്തച്ഛനാണ് മാത്യുവിന്റെ മകന്‍ വെസ്‌ലി. 

അമേരിക്കന്‍ പോലീസിന്റെ സംശയം വെസ്‌ലിയിലേക്കു നീണ്ടതാണ് മാത്യുവിന്റെ ആശങ്കയ്ക്കു കാരണം. പാല്‍ കുടിക്കാതിരുന്നതിന്റെ ദേഷ്യത്തില്‍ കുഞ്ഞിനെ വീടിനു പുറത്തു നിര്‍ത്തിയപ്പോഴാണു കാണാതായതെന്നു മകന്‍ പറഞ്ഞതുതന്നെയാണു സത്യമെന്നു വിശ്വസിക്കാനാണ് അദ്ദേഹത്തിന്റെ ശ്രമം. പോലീസ് കസ്റ്റഡിയിലെടുത്ത ശേഷം വെസ്‌ലിയെ ജാമ്യത്തില്‍ വിട്ടയച്ചിരുന്നു.

വെസ്‌ലി പറഞ്ഞതു പൂര്‍ണമായും വിശ്വസിക്കാന്‍ പോലീസ് തയാറായിട്ടില്ല. കുഞ്ഞിനെ കാണാതായ രാത്രിയില്‍ വെസ്‌ലിയുടെ കാര്‍ ഒരു മണിക്കൂര്‍ വീട്ടില്‍നിന്നു പുറത്തുപോയിരുന്നു എന്നു പോലീസ് കണ്ടെത്തിയിട്ടുണ്ട്. ഇക്കാര്യത്തില്‍ വ്യക്തമായ മറുപടി നല്‍കാന്‍ വെസ്‌ലിക്കു കഴിഞ്ഞിട്ടില്ല. വെസ്‌ലിയും ഭാര്യ സിനിയും അന്വേഷണവുമായി സഹകരിക്കുന്നില്ലെന്നാണ് പോലീസിന്റെ നിലപാട്. കൊച്ചിയിലെ സ്വകാര്യ പണമിടപാട് സ്ഥാപനത്തില്‍ ജീവനക്കാരനായ മാത്യു ഭാര്യക്കൊപ്പം െവെറ്റിലയിലാണു താമസം. 

പത്തു വര്‍ഷത്തിലേറെയായി വെസ്‌ലിയും കുടുംബവും ടെക്‌സസിലാണ്. കുഞ്ഞിനെ കാണാതായതിനെത്തുടര്‍ന്ന് വെസ്‌ലി വീട്ടിലേക്ക് വിളിച്ചിരുന്നു. മകളെ സ്‌നേഹത്തോടെയാണ് സംരക്ഷിച്ചിരുന്നതെന്നും മറിച്ച് കേള്‍ക്കുന്നതൊന്നും ശരിയല്ലെന്നും വെസ്‌ലി ആണയിട്ടത്രേ. കുഞ്ഞിന് പ്രായത്തിനനുസരിച്ച് തൂക്കം ഇല്ലാത്തത് അവിടെ കുറ്റകരമാണ്. നിശ്ചിത ഇടവേളകളില്‍ പരിശോധനയ്ക്കു ഹാജരാക്കണം. ഷെറിന് തൂക്കം കുറവായതുകൊണ്ടാണ് പാല്‍ കുടിക്കാന്‍ നിര്‍ബന്ധിച്ചത്. 

പുറത്തുനിര്‍ത്തിയ കുഞ്ഞ് തനിയെ മടങ്ങിവരുമെന്നാണു കരുതിയത്. 15 മിനിറ്റ് കഴിഞ്ഞും എത്താതെ വന്നപ്പോള്‍ പുറത്തുചെന്ന് നോക്കിയെങ്കിലും കണ്ടില്ലെന്നാണ് വെസ്‌ലി പറഞ്ഞത്. ഈ മാസം ഏഴിന് പുലര്‍ച്ചേ മൂന്നോടെയാണ് സംഭവം. എന്നാല്‍, അഞ്ചു മണിക്കൂര്‍ കഴിഞ്ഞാണ് വെസ്‌ലി പോലീസിനെ വിവരമറിയിച്ചത്. അതോടെയാണ് പോലീസിന്റെ സംശയം ഇയാളിലേക്കായി. വീടിന് പിന്നില്‍ നൂറടി ദൂരെയുള്ള മരത്തിനടിയിലാണ് കുഞ്ഞിനെ നിര്‍ത്തിയതെന്ന് വെസ്‌ലി പറയുന്നു. 

ചെന്നായ്ക്കളുടെ ശല്യമുണ്ടെന്നറിഞ്ഞിട്ടും ഇവിടെ കുഞ്ഞിനെ കൊണ്ടുനിര്‍ത്തിയതിന് ഇയാള്‍ക്കു വിശ്വസനീയ മറുപടിയില്ല. സ്വന്തം കുഞ്ഞിനെ കാണാതാകുമ്പോള്‍ പിതാവിനുണ്ടാകുന്ന മാനസികവ്യഥ വെസ്‌ലിയില്‍ പ്രകടമായില്ലെന്നതും പോലീസിന്റെ സംശയങ്ങള്‍ ബലപ്പെടുത്തി. ഷെറിനെ വെസ്‌ലിയും സിനിയും ചേര്‍ന്ന് ബിഹാറിലെ ഗയയില്‍നിന്നാണു ദത്തെടുത്തത്. ഒന്നര വയസുള്ളപ്പോള്‍ മാതാപിതാക്കള്‍ ഉപേക്ഷിച്ച കുഞ്ഞിന് അന്നു സരസ്വതി എന്നായിരുന്നു പേര്. 

2015 ഫെബ്രുവരി നാലിന് സന്നദ്ധ സംഘടനയ്ക്കു ലഭിച്ച കുട്ടിയെ നളന്ദയിലെ ബാലസംരക്ഷണകേന്ദ്രത്തില്‍നിന്ന് കഴിഞ്ഞ ജൂണ്‍ 23നാണ് വെസ്‌ലിയും സിനിയും ദത്തെടുത്ത് അമേരിക്കയിലേക്കു കൊണ്ടുപോയത്. മൂന്നടി ഉയരമുള്ള കുഞ്ഞിന് 22 പൗണ്ടായിരുന്നു തൂക്കം. കാഴ്ചയും കുറവായിരുന്നു. പ്രായത്തിനനുസരിച്ച സംസാരശേഷിയും ഇല്ലായിരുന്നത്രേ.