അന്വേഷണാത്മക പത്രപ്രവര്‍ത്തനത്തിലൂടെ പാനമ പേപ്പര്‍ രേഖകള്‍ പുറത്തുകൊണ്ടുവന്ന സംഘത്തിന് നേതൃത്വം വഹിച്ച മാധ്യമപ്രവര്‍ത്തക ഡാഫ്നെ കരുനെ ഗലീസിയ കൊല്ലപ്പെട്ടു. മാള്‍ട്ടയില്‍ വീടിനടുത്ത് വെച്ച്‌ കാറില്‍ ഘടിപ്പിച്ച ബോംബ് പൊട്ടിയാണ് ഗലീസിയ കൊല്ലപ്പെട്ടത്.

തിങ്കളാഴ്ച ഉച്ചക്ക് ശേഷമാണ് ഗലീസിയ കൊല്ലപ്പെട്ടത്. വാഹനത്തില്‍ ഘടിപ്പിച്ച ബോംബ് പൊട്ടിത്തെറിച്ച്‌ കാര്‍ പല കഷണങ്ങളായി പൊട്ടിത്തെറിക്കുകയായിരുന്നു.
'വണ്‍ വിമന്‍ വിക്കിലീക്ക്സ് ' എന്നായിരുന്നു ഗലാസിയ അറിയപ്പെട്ടിരുന്നത്. ഇവരുടെ ബ്ലോഗുകള്‍ രാജ്യത്തെ എല്ലാ പത്രങ്ങളുടേയും സര്‍ക്കുലേഷനേക്കാള്‍ ഉയര്‍ന്ന തോതില്‍ എത്തിയ സന്ദര്‍ഭങ്ങളും ഉണ്ടായിട്ടുണ്ട്. അന്വേഷണാത്മക പത്രപ്രവര്‍ത്തനത്തിലൂടെ സ്ഫോടനാത്മകമായ രാഷ്ട്രീയ വാര്‍ത്തകള്‍ ഇവര്‍ പുറത്തു വിട്ടിട്ടുണ്ട്.
യൂറോപ്യന്‍ ദ്വീപ് രാഷ്ട്രമായ മാള്‍ട്ടയിലെ പ്രധാനമന്ത്രിയും രണ്ട് അടുത്ത സഹായികളും നടത്തിയ അനധികൃത ഇടപാടുകളെക്കുറിച്ചായിരുന്നു ഇവരുടെ അവസാനത്തെ വാര്‍ത്ത. വധത്തിന്‍റെ ഉത്തരവാദിത്തം ഇതുവരെ ആരും ഏറ്റെടുത്തിട്ടില്ല.