145 കിലോ ഭാരമുള്ള ഒരാള്‍ ശരീരത്തില്‍ കയറിയിരുന്നാല്‍ എന്താകും സ്ഥിതി. അതേ, 145 കിലോ ഭാരമുള്ള ഒരു സ്ത്രീ ഒമ്പതു വയസുകാരിയുടെ ശരീരത്തില്‍ കയറിയിരുന്ന് കുട്ടിയെ കൊലപ്പെടുത്തി. വറോണിക്ക പോസി എന്ന 64കാരിയാണ് കുട്ടിയെ കൊലപ്പെടുത്തിയത്. ഈ യുവതിയ്‌ക്കെതിരെ പോലീസ് കേസേടുത്തു.

ഫ്‌ളോറിഡയിലെ പെന്‍സാകോളയില്‍ ശനിയാഴ്ചയാണ് സംഭവം നടന്നത്. തന്റെ സഹോദരപുത്രിയായ ഡെറിക ലിന്‍ഡ്‌സയെ അനുസരണക്കേട് കാണിച്ചതിന് ശിക്ഷിക്കാന്‍ വേണ്ടി വെറോണിക്ക കുട്ടിയുടെ ശരീരത്തിന് മുകളില്‍ കയറി ഇരുന്നതാണ് മരണത്തിനിടയാക്കിയതെന്ന് പൊലീസ് പറഞ്ഞു.

34 കിലോ മാത്രം ഭാരമുള്ള ഡെറികയ്ക്കു മേലെയാണ് 145 കിലോ ഭാരമുള്ള വെറോണിക്ക കയറിയിരുന്നത്. ഭാരം താങ്ങാനാവാതെ ഡെറികയ്ക്ക് ശ്വാസം മുട്ടി. തുടര്‍ന്ന് കുട്ടിയുടെ ബോധം മറഞ്ഞതായി വെറോണിക്ക പൊലീസിനോട് സമ്മതിച്ചിട്ടുണ്ട്. ഹൃദയം സ്തംഭിച്ചാണ് കുട്ടി മരിച്ചതെന്നും പൊലീസ് റിപ്പോര്‍ട്ടില്‍ പറയുന്നു.

വികൃതിക്കാരിയായ കുട്ടിയെ പെരുമാറ്റ മര്യാദകള്‍ പഠിപ്പിക്കുന്നതിനാണ് തന്റെ സഹോദരിയായ വെറോണിക്കയെ വിളിച്ചുവരുത്തിയതെന്ന് കുട്ടിയുടെ മാതാവ് ഗ്രേസ് സ്മിത്ത് പൊലീസിനോട് പറഞ്ഞു. തുടര്‍ന്നാണ് കുട്ടി മരിക്കുന്നതിനടയാക്കിയ സംഭവം ഉണ്ടായത്. കസേരയില്‍ ഇരിക്കുകയായിരുന്ന കുട്ടിയുടെ മേല്‍ വെറോണിക്ക കയറിയിരുന്നതായും ശ്വാസം മുട്ടുന്നതായി കുട്ടി പറഞ്ഞിട്ടും എണീറ്റില്ലെന്നും കുട്ടിയുടെ പിതാവ് ജയിംസ് സ്മിത് പൊലീസിന് മൊഴി നല്‍കി.

കുട്ടി അബോധാവസ്ഥയിലാണെന്ന് തിരിച്ചറിഞ്ഞ ഉടന്‍ തന്നെ പ്രഥമശുശ്രൂഷകള്‍ നല്‍കിയതായും ഉടന്‍ തന്നെ ആംബുലന്‍സ് വിളിച്ചുവരുത്തിയതായും വെറോണിക്ക പൊലീസിനോട് പറഞ്ഞു.