പതിനൊന്നു ദിവസം മുമ്പ് ടെക്‌സസില്‍നിന്നു കാണാതായ ഇന്ത്യന്‍ പെണ്‍കുട്ടി ഷെറിന്‍ മാത്യുവിനായുള്ള തെരച്ചിലിന് ആളില്ലാ വിമാനവും. പാല്‍ കുടിക്കാത്തതിന്റെ ശിക്ഷയായി വളര്‍ത്തച്ഛന്‍ പുലര്‍ച്ചെ മൂന്നിനു വീടിനു പുറത്ത് ഇറക്കിവിട്ട മൂന്നുവയസുകാരിയെ കണ്ടെത്താനുള്ള അവസാനവട്ട ശ്രമത്തിലാണു പോലീസ്.

ഷെറിനെ ജീവനോടെ കിട്ടുമെന്നു തന്നെയാണ് പ്രതീക്ഷയെന്നും സമയമാണ് ഏക ശത്രുവെന്നും റിച്ചാര്‍ഡ്‌സണ്‍ പോലീസ് പറയുന്നു. റിച്ചാര്‍ഡ്‌സണിലെ ഷെറിന്റെ വീട്ടില്‍നിന്ന് അധികം ദൂരെയല്ലാത്ത റിച്ച്‌ലാന്‍ഡ് കോളജിനടുത്തുള്ള പാടത്താണ് ഇപ്പോള്‍ തെരച്ചില്‍.

അന്വേഷണം പലവഴിക്കു നീങ്ങുന്നുണ്ടെന്നും അരുവിയിലും കുറ്റിക്കാട്ടിലുമടക്കം തെരച്ചില്‍ നടക്കുന്നുണ്ടെന്നും പോലീസ് വ്യക്തമാക്കി. അന്വേഷണത്തിനു സഹായകമായ തുമ്പുകള്‍ കിട്ടിയിട്ടുണ്ടെന്ന് നേരത്തെ അധികൃതര്‍ പ്രദേശിക മാധ്യമങ്ങളെ അറിയിച്ചിരുന്നു. എന്നാല്‍, എന്തൊക്കെയാണ് കിട്ടിയതെന്നോ, കേസുമായി അവയ്ക്ക് എന്തു ബന്ധമാണെന്നോ വ്യക്തമല്ല.

വെള്ളിയാഴ്ച അന്വേഷണം നടന്നിടത്താണ് ഇപ്പോള്‍ വീണ്ടും തെരച്ചില്‍. ഷെറിന്റെ വളര്‍ത്തച്ഛനായ വെസ്‌ലി മാത്യുവും കുടുംബവും പറയുന്ന കാര്യങ്ങള്‍ പോലീസ് പൂര്‍ണ വിശ്വാസത്തിലെടുത്തിട്ടില്ല. അറസ്റ്റിലായ ഘട്ടത്തില്‍ അന്വേഷണത്തോടു വെസ്‌ലി സഹകരിച്ചിരുന്നില്ലെന്നതും ശ്രദ്ധേയമാണ്.

അതിനിടെ, വെസ്‌ലിയുടെ കാര്‍ സംഭവദിവസം രാത്രി പുറത്തേക്കു പോയതുമായി ബന്ധപ്പെട്ടും അന്വേഷണം നടക്കുന്നുണ്ട്. ഇതിന്റെ സിസി. ടിവി. ദൃശ്യങ്ങള്‍ ചുറ്റുവട്ടത്തുനിന്നു കണ്ടെടുക്കാനും ശ്രമവും പുരോഗമിക്കുന്നുണ്ട്.