മദ്യവും സിഗരറ്റും ഉപയോഗിക്കാത്തതിന് കാരണം വ്യക്തമാക്കി അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. ഒരു പൊതുപരിപാടിക്കിടെയാണ് ട്രാംപ് ഇക്കാര്യം തുറന്ന് പറഞ്ഞത്. മദ്യത്തിന് അടിമയായി 43ആം വയസില്‍ മരിച്ച തന്റെ മൂത്ത സഹോദരന്റെ അനുഭവം ട്രംപ് പരിപാടിക്കിടെ പങ്കുവെച്ചു. ' എനിക്കൊരു സഹോദരനുണ്ടായിരുന്നു. 

ഫ്രെഡ് ട്രംപ്. കാണാന്‍ സുന്ദരനായ, എന്നേക്കാള്‍ വളരെ നല്ല വ്യക്തിത്വമുള്ള ഒരാള്‍. എന്നാല്‍ അദ്ദേഹത്തിന്റെ ഏറ്റവും വലിയ പ്രശ്‌നം അദ്ദേഹം മദ്യത്തിന് അടിമപ്പെട്ടിരുന്നു എന്നതാണ്. മദ്യം ഉപയോഗിക്കരുതെന്ന് പലപ്പോഴും അദ്ദേഹം എന്നോട് ആവശ്യപ്പെട്ടിരുന്നു. സഹോദരന്റെ വാക്കുകള്‍ അനുസരിച്ച് അന്നു മുതല്‍ മദ്യവും സിഗരറ്റും ഞാന്‍ വര്‍ജിച്ചു. മദ്യത്തിന്റെ പ്രശ്‌നങ്ങള്‍ അദ്ദേഹത്തിലൂടെയാണ് ഞാന്‍ പഠിച്ചത്, ട്രംപ് കൂട്ടിച്ചേര്‍ത്തു.

അമേരിക്കയില്‍ ഓപ്പിയോയിഡ് മരുന്നുകള്‍ ഉപയോഗിക്കുന്നതിലൂടെ ഉണ്ടാവുന്ന ദുരന്തങ്ങള്‍ക്കെതിരെ വളരെ ശക്തമായ ബോധവത്ക്കരണ പ്രവര്‍ത്തനങ്ങള്‍ക്കാണ് ട്രംപിന്റെ നേതൃത്വത്തില്‍ തുടക്കം കുറിച്ചിരിക്കുന്നത്. ഈ വിഷയത്തില്‍ ട്രംപ് മുമ്പും വളരെ സജീവമായി ഇടപ്പെട്ടിരുന്നു. താന്‍ നേതൃത്വം കൊടുത്ത പരിപാടികളിലെല്ലാം തന്റെ സഹോദരന്റെ അനുഭവം ട്രംപ് പങ്കുവെച്ചിട്ടുമുണ്ട്.

മരുന്ന് ഉപയോഗങ്ങള്‍ക്കെതിരെ ഏറ്റവും ഫലപ്രദമായി ബോധവത്കരിക്കാനാവുന്നത് യുവാക്കളെയാണ്. ഓപ്പിയോയിഡ് മരുന്നുകളോടുള്ള ആസക്തിക്കെതിരെ ആദ്യം ബോധവത്ക്കരിക്കേണ്ടത് യുവജനങ്ങളെയാണെന്നും ട്രംപ് അഭിപ്രായപ്പെട്ടു. 1990കളില്‍ സ്ഥിരം വേദനകളാല്‍ ദുരിതമനുഭവിക്കുന്നവര്‍ക്കും സാധാരണ രീതിയാല്‍ ചികിത്സിക്കാന്‍ ബുദ്ധിമുട്ടുന്നവര്‍ക്കും താല്‍ക്കാലിക ആശ്വാസമെന്ന നിലയ്ക്ക് ഓപ്പിയോയിഡ് വേദനസംഹാരികളുടെ ഉപയോഗം ഫലപ്രദമാണെന്ന് ഡോക്ടര്‍മാര്‍ കണ്ടെത്തിയിരുന്നു. എന്നാല്‍ ഓപ്പിയോയിഡ് പ്രചാരത്തിലെത്തിയതോടെ യഥാര്‍ത്ഥവും അല്ലാത്തതുമായി പലതരം വേദനസംഹാരികള്‍ വിപണിയിലെത്തി.