ദൂരെ എന്തോ അനങ്ങുന്നത് കണ്ട വേട്ടക്കാരന്‍ വെടിയുതിര്‍ത്തു. മാനായിരിക്കുമെന്ന് കരുതിയാണ് നിറയൊഴിച്ചത്. എന്നാല്‍ കൊണ്ടത് ആകട്ടേ നാല്‍പത് വയസുകാരിക്കും. പെന്‍സില്‍വാനിയ അതിര്‍ത്തിയിലെ ഷെര്‍മണിലാണ് സംഭവം. റോസ്‌മേരി എന്ന യുവതിയാണ് ദാരുണമായി കൊല്ലപ്പെട്ടത്. 

ബുധനാഴ്ച വൈകീട്ട് നായയുമായി നടക്കാനിറങ്ങിയതായിരുന്നു യുവതി. എന്നാല്‍ വേട്ടക്കാരന്‍ തോമസ് ജസലോസ്‌ക്കിയുടെ ദൃഷ്ടിയില്‍ ദൂരെ എന്തോ അനങ്ങുന്നതു പോലെ തോന്നി. പിന്നെ ഒന്നും ആലോചിക്കാതെ വെടിയുതിര്‍ക്കുകയായിരുന്നു. വെടിയുണ്ട ചെന്ന് തറച്ചത് റോസ്‌മേരിയുടെ മാറിലായിരുന്നു. 

നായയുടെ കുരയും, സ്ത്രീയുടെ നിലവിളിയും കേട്ടു ഓടിചെന്ന വേട്ടക്കാരന്‍ കണ്ടത് രക്തത്തില്‍ കുളിച്ചു കിടക്കുന്ന റോസ്‌മേരിയെയാണ്. ഉടന്‍ പ്രാഥമിക ചികിത്സ നടത്തി പോലീസിനേയും വിളിച്ചു വിവരം അറിയിച്ചു.

പോലീസ് റോസ്‌മേരിയെ തൊട്ടടുത്തുള്ള ആശുപത്രിയില്‍ എത്തിച്ചുവെങ്കിലും ജീവന്‍ രക്ഷിക്കാനായില്ല. ആംബുലന്‍സ് വരുന്നതും, തന്റെ നായയുടെ കുരയും കേട്ട് തൊട്ടടുത്തുണ്ടായിരുന്ന ഭര്‍ത്താവ് ജെയ്മിയും ഇതിനകം സംഭവസ്ഥലത്തു എത്തിച്ചേര്‍ന്നിരുന്നു. 

ഹൃദയഭേദകവും, അപ്രതീക്ഷിതവുമായ സംഭവമാണിതെന്ന് കൗണ്ടി ഷെറിഫ് ജൊ ജിറാസ് പറഞ്ഞു. വേട്ടയാടാന്‍ എത്തുന്നവര്‍ ആ പ്രദേശങ്ങളില്‍ ജനങ്ങളും ഉണ്ടായിരിക്കും എന്നത് പ്രത്യേകം ശ്രദ്ധിക്കേണ്ടതായിരുന്നുവെന്നും, വേട്ടക്കാര്‍ക്ക് ഈ വിഷയത്തില്‍ ബോധവല്‍ക്കരണം ആവശ്യമാണെന്നും ചീഫ് പറഞ്ഞു.