സ്വയം ആനന്ദം കണ്ടെത്താന്‍ പലരും പല രീതികള്‍ നോക്കാറുണ്ട്. ചിലര്‍ക്ക് നല്ല വൃത്തിയുള്ള ചുവരുകള്‍ കണ്ടാല്‍ ഒന്ന് തുപ്പാതെ പോവാന്‍ തോന്നില്ല. അല്ലെങ്കില്‍ എന്തെങ്കിലും ഒക്കെ അവിടെ എഴുതിവെച്ച് ആ ചുവര്‍ വൃത്തികേടാക്കാതെ മനസ്സിന് ഒരു സമാധാനവും കിട്ടില്ല. അത് പോലെയാണ് ടയര്‍ കണ്ടാല്‍ പഞ്ചറാക്കിയില്ലെങ്കില്‍ മനസമാധാനം ഉണ്ടാകില്ല. അങ്ങനെ ഒരാളെ പോലീസ് അടുത്തിടെ അറസ്റ്റ് ചെയ്തു.

ഒരു മനസ്സുഖത്തിനുവേണ്ടിയാണ് അയാള്‍ ടയറുകള്‍ കുത്തി പഞ്ചര്‍ ആക്കിത്തുടങ്ങിയത്. പിന്നീട് അതങ്ങുശീലമായി, പൊലീസിനു തലവേദനയും. വര്‍ഷങ്ങള്‍ നീണ്ട ഒളിച്ചുകളിക്കുശേഷം ആള്‍ പിടിയിലായി. 6000 ടയറുകള്‍ പഞ്ചറാക്കിയശേഷം ഫ്രാന്‍സിലെ ബോര്‍ഡോ സിറ്റിയിലാണ് സംഭവം. ആറുവര്‍ഷമായി വാഹനങ്ങളുടെ ടയര്‍ പഞ്ചറാക്കുന്ന നാല്‍പത്തഞ്ചുകാരനാണ് പിടിയിലായത്. ഇയാളുടെ പേര് പൊലീസ് പുറത്തുവിട്ടിട്ടില്ല.

ഒരു കള്ളന്‍ ബാങ്ക് മോഷണത്തിനു പദ്ധതിയിടുന്നതുപോലെ സൂക്ഷ്മമായാണ് ഇയാള്‍ തന്റെ 'കൃത്യനിര്‍വഹണം' നടത്തിപ്പോന്നത്. സമൂഹത്തോടുള്ള വിദ്വേഷമാണത്രേ ചെയ്തിക്കു പിന്നില്‍. 2011 മുതലാണ് ഇദ്ദേഹം 'കലാപരിപാടി' തുടങ്ങിയത്. ദിവസവും 70 ടയറോളം 'ശരിയാക്കും'. എന്നാല്‍ ആരാണ് ചെയ്തതെന്നു മനസ്സിലാക്കാന്‍പോന്ന തെളിവുകളൊന്നും അവശേഷിപ്പിക്കാതെയാണ് കാര്യം സാധിക്കുന്നത്. എന്തിനു സിസിടിവിയുടെ കണ്ണില്‍പോലും പെടാതെയാണ് ആസൂത്രണം.

മറ്റു ജോലിയൊന്നുമില്ലാത്ത ഇയാള്‍, സ്വയം സീരിയല്‍ പഞ്ചര്‍ എന്നാണു വിശേഷിപ്പിക്കുന്നത്. ഏകദേശം ആറായിരം ടയറുകള്‍ താന്‍ പഞ്ചര്‍ വരുത്തിക്കാണുമെന്ന ഇയാളുടെ അവകാശവാദം പരാതികള്‍ പരിശോധിച്ച് പൊലീസും ശരിവയ്ക്കുന്നു. പൊലീസിനെ സംബന്ധിച്ച് ഇത് ആശ്വാസത്തിന്റെ നിമിഷമാണ്. പഞ്ചറുകള്‍ക്കു പിന്നില്‍ സീരിയല്‍ കുറ്റവാളിയാണെന്നു മനസ്സിലാക്കി 2014 മുതല്‍ അവര്‍ അന്വേഷണത്തിലായിരുന്നു. ഇപ്പോള്‍ മാത്രമേ പിടിക്കാന്‍ കഴിഞ്ഞുളളൂ എന്നു മാത്രം. പൊലീസിനു പിടികൊടുക്കാതിരിക്കാന്‍ പല സമയങ്ങളിലും പല റൂട്ടുകളിലുമായിരുന്നു ഇയാളുടെ ഓപ്പറേഷന്‍.

തന്നെയുമല്ല, ടയര്‍ കുത്തിപ്പിളര്‍ന്ന് പോകുന്ന പരിപാടിയായിരുന്നില്ല കുറ്റവാളിയുടേത്. ചെറുതായി ഒരു സുഷിരമിടും, രാവിലെയാകുമ്പോഴേക്കും കാറ്റുപോയിട്ടുണ്ടാകും. എന്നാല്‍ പരിസരവാസികള്‍ക്ക് ഇയാള്‍ ദുഃസ്വപ്‌നമായിരുന്നു. 1100 പരാതികളാണ് പഞ്ചര്‍ കേസായി പൊലീസ് സ്‌റ്റേഷനില്‍ എത്തിയത്. ഒരു ഹതഭാഗ്യന്റെ ടയര്‍ ആറുതവണയാണ് പഞ്ചറാക്കിയത്.