ബുധനാഴ്ച അര്‍ധരാത്രി ലോകത്തെ ഞെട്ടിച്ച് യു.എസ് പ്രസിഡന്റ് ഡോണള്‍ഡ് ട്രംപ് നടത്തിയ പ്രഖ്യാപനത്തിനെതിരെ രോഷവും പ്രതിഷേധവും പടരുന്നു. ജറൂസലമിനെ ഇസ്രായേല്‍ തലസ്ഥാനമായി അംഗീകരിച്ച ട്രംപിന്റെ പ്രഖ്യാപനത്തിനെതിരെ ഫലസ്തീന്‍കാര്‍ തെരുവിലിറങ്ങി.

ഈസ്തംബൂള്‍, ലബനാന്‍, ജോര്‍ഡന്‍ എന്നിവിടങ്ങളില്‍ പ്രതിഷേധപ്രകടനങ്ങള്‍ നടക്കുകയാണ്. മേഖലയിലെ യു.എസ് എംബസികള്‍ക്കും പൗരന്മാര്‍ക്കും ജാഗ്രതാ നിര്‍ദേശമുണ്ട്. െഎക്യരാഷ്ട്രസഭയും യു.എസ് സഖ്യകക്ഷികളും അറബ് രാജ്യങ്ങളും ട്രംപിനെതിരെ രംഗത്തുവന്നു. അതിനിടെ, യു.എസ് എംബസി തെല്‍ അവീവില്‍നിന്ന് ജറൂസലമിലേക്ക് മാറ്റാന്‍ നടപടി തുടങ്ങിയതായി സ്‌റ്റേറ്റ് സെക്രട്ടറി റെക്‌സ് ടില്ലേഴ്‌സണ്‍ അറിയിച്ചു. പുതിയ എംബസി കെട്ടിടം പണിയാന്‍ ആര്‍ക്കിടെക്റ്റുകളെയും എന്‍ജിനീയര്‍മാരെയും പ്ലാനര്‍മാരെയും ഉടന്‍ എത്തിക്കും.

ട്രംപിനെതിരെ ഡെമോക്രാറ്റിക് അംഗം കൊണ്ടുവന്ന ഇംപീച്മന്റെ് പ്രമേയം യു.എസ് പ്രതിനിധിസഭ തള്ളി. 58നെതിരെ 364 വോട്ടിനാണ് തള്ളിയത്. പ്രമേയത്തിന് സമയമായിട്ടില്ലെന്ന് ഡെമോക്രാറ്റിക് പാര്‍ട്ടി നേതാക്കളടക്കമുള്ളവര്‍ ചൂണ്ടിക്കാട്ടി. ട്രംപിന്റെ പ്രഖ്യാപനം ചര്‍ച്ച ചെയ്യാന്‍ ഐക്യരാഷ്ട്രസഭ രക്ഷാ സമിതി വെള്ളിയാഴ്ച അടിയന്തര യോഗം ചേരും. യു.എസ് സഖ്യകക്ഷികളായ ബ്രിട്ടനും ഫ്രാന്‍സും അടക്കം എട്ട് അംഗരാഷ്ട്രങ്ങള്‍ അടിയന്തര യോഗം ചേരാന്‍ ആവശ്യപ്പെട്ടിരുന്നു. യു.എന്‍ സെക്രട്ടറി ജനറല്‍ അന്‍േറാണിയോ ഗുട്ടെറസ് പങ്കെടുക്കും.

ദ്വിരാഷ്ട്ര പരിഹാരത്തിന് ബദലില്ലെന്ന് ഗുട്ടെറസ് പറഞ്ഞു. സുരക്ഷ കൗണ്‍സിലിന്റെയും പൊതുസഭയുടെയും പ്രമേയങ്ങളനുസരിച്ചുള്ള ചര്‍ച്ചകളിലൂടെ മാത്രമേ പരിഹാരം സാധ്യമാകൂവെന്ന് അദ്ദേഹം പറഞ്ഞു.

ഇസ്രായേലും ഫലസ്തീനും തമ്മിലുള്ള ചര്‍ച്ചയിലൂടെ മാത്രമേ പ്രശ്‌നപരിഹാരം സാധ്യമാകൂവെന്നും തെല്‍ അവീവിലെ ബ്രിട്ടീഷ് എംബസി മാറ്റില്ലെന്നും ബ്രിട്ടീഷ് പ്രധാനമന്ത്രി തെരേസ മേയ് പറഞ്ഞു. ട്രംപിന്റെ തീരുമാനത്തില്‍ റഷ്യന്‍ വിദേശകാര്യ മന്ത്രാലയം കടുത്ത ആശങ്ക പ്രകടിപ്പിച്ചു.

നീതീകരിക്കാനാകാത്തതും നിരുത്തരവാദപരവുമായ തീരുമാനമെന്ന്് സൗദി അറേബ്യ പ്രതികരിച്ചു. യു.എസ് എംബസി ജറൂസലമിലേക്ക് മാറ്റാനുള്ള തീരുമാനം അപകടകരമെന്ന് നേരത്തെ സൗദി രാജാവ് സല്‍മാന്‍ മുന്നറിയിപ്പു നല്‍കിയിരുന്നു. ഗുരുതര പ്രത്യാഘാതമുണ്ടാക്കുന്ന തീരുമാനമാണെന്ന് ഖത്തര്‍ വിദേശകാര്യ മന്ത്രാലയം പറഞ്ഞു. പശ്ചിമേഷ്യന്‍ സമാധാനപ്രക്രിയക്ക് കനത്ത ആഘാതമെന്ന് പാകിസ്താന്‍ വിദേശകാര്യ വക്താവ് പറഞ്ഞു.

'ഞാന്‍ ശക്തനാണ്, അതുകൊണ്ട് ഞാന്‍ ശരിയാണ്' എന്നാണ് ട്രംപ് വിശ്വസിക്കുന്നതെങ്കില്‍ അദ്ദേഹത്തിന് തെറ്റുപറ്റിയെന്ന് തുര്‍ക്കി പ്രസിഡന്റ് റജബ് ത്വയ്യിബ് ഉര്‍ദുഗാന്‍ പറഞ്ഞു.