ഉരുട്ടിക്കൊലക്കേസിലെ മൂന്ന് പ്രതികളുടെ ശിക്ഷ നടപ്പിലാക്കുന്നത് ഹൈക്കോടതി തടഞ്ഞു
ഫോര്ട്ട് പൊലീസ് സ്റ്റേഷനില് ഉദയകുമാറിനെ ഉരുട്ടിക്കൊന്ന കേസില് മൂന്ന് പ്രതികളുടെ ശിക്ഷ നടപ്പിലാക്കുന്നത് ഹൈക്കോടതി സ്റ്റേ ചെയ്തു. കേസിലെ മൂന്ന്, നാല്, അഞ്ച് പ്രതികളായ ഡി.വൈ.എസ്.പി അജിത് കുമാര്, മുന് എസ്.പിമാരായ ടി.കെ.ഹരിദാസ്, ഇ.കെ.സാബു എന്നിവരുടെ ശിക്ഷ നടപ്പിലാക്കുന്നതാണ് അപ്പീല് തീരുന്നത് വരെ ഹൈക്കോടതി തടഞ്ഞത്. ഗൂഢാലോചന, തെളിവു നശിപ്പിക്കല്,വ്യാജ രേഖ ചമയ്ക്കല് തുടങ്ങിയ കുറ്റങ്ങള് തെളിഞ്ഞ പ്രതികള്ക്ക് രണ്ട് വകുപ്പുകളിലായി ആറ് വര്ഷം തടവും 5000 രൂപ പിഴയുമാണ് തിരുവനന്തപുരം സി.ബി.ഐ കോടതി ശിക്ഷ വിധിച്ചത്. ഇതിനെതിരെ പ്രതികള് ഹൈക്കോടതിയെ സമീപിക്കുകയായിരുന്നു.
2005 സെപ്തംബര് 27 നാണ് കേസിന് ആസ്പദമായ സംഭവം നടന്നത്. തിരുവനന്തപുരം ശ്രീകണ്ഠേശ്വരം പാര്ക്കില് ഇരുന്ന ഉദയകുമാറിനെയും സുഹൃത്ത് സുരേഷ് കുമാറിനെയും ഫോര്ട്ട് സി.ഐ ആയിരുന്ന ഇ.കെ.സാബുവിന്റെ ക്രൈം സ്ക്വാഡ് പിടികൂടി. സ്ക്വാഡ് അംഗങ്ങളായ ജിതകുമാറും ശ്രീകുമാറും ചേര്ന്നാണ് ഇവരെ ഫോര്ട്ട് സ്റ്റേഷനില് എത്തിച്ചത്. ഉദയകുമാറിന്റെ പക്കല് ഉണ്ടായിരുന്ന 4020 രൂപയുടെ ഉറവിടത്തെ ചൊല്ലിയുള്ള ക്രൂരമായ മര്ദ്ദനത്തിലും ചോദ്യം ചെയ്യലിലുമാണ് ഉദയകുമാര് കൊല്ലപ്പെട്ടത്. ഉദയകുമാര് കസ്റ്റഡിയില് മരിച്ചു എന്ന് ബോദ്ധ്യമായ പൊലീസ് ഉദ്യോഗസ്ഥര് ഉദയകുമാറിനെ രാത്രി മോഷണക്കേസില് പിടികൂടി എന്ന് സ്ഥാപിക്കാന് കള്ള എഫ്.ഐ.ആര് ഉണ്ടാക്കി. ആദ്യം ലോക്കല് പൊലീസും പിന്നീട് ക്രൈംബ്രാഞ്ചും അന്വേഷിച്ചെങ്കിലും പൊലീസുകാരായ ജിതകുമാര്, ശ്രീകുമാര്, സോമന് എന്നീ പ്രതികളില് മാത്രം കേസ് ഒതുങ്ങിപ്പോയിരുന്നു.
എന്നാല് കേസില് സി.ബി.ഐ നടത്തിയ അന്വേഷണത്തില് പ്രതികള് കുറ്റക്കാരെന്ന് കണ്ടെത്തുകയും ഒന്നും രണ്ടും പ്രതികളായ കെ.ജിതകുമാര്, എസ്.വി.ശ്രീകുമാര് എന്നിവര്ക്ക് വധശിക്ഷ വിധിക്കുകയുമായിരുന്നു.
https://www.facebook.com/Malayalivartha
