ജബല്‍പുര്‍ ജില്ലയില്‍ ബര്‍ഗി ഡാം റിസര്‍വോയറിലുണ്ടായ ക്രൂസ് ബോട്ട് അപകടത്തിന്റെ കൂടുതല്‍ ദൃശ്യങ്ങള്‍ പുറത്ത്. അപകടമുണ്ടായ സമയത്തെ ദൃശ്യങ്ങളാണ് പ്രചരിക്കുന്നത്. കടുത്ത സുരക്ഷാവീഴ്ചയുണ്ടായെന്നും ദൃശ്യങ്ങളില്‍ വ്യക്തമാണ്.

ക്രൂസില്‍ യാത്രക്കാര്‍ ശാന്തരായി ഇരിക്കുന്നതും പെട്ടെന്ന് ബോട്ടിനുള്ളിലേക്ക് വെള്ളം ഇരച്ചുകയറുന്നതുമാണ് ദൃശ്യത്തിലുള്ളത്. തുടര്‍ന്ന് ആളുകള്‍ നിലവിളിക്കുന്നതും ബോട്ടിനുള്ളില്‍ വെള്ളം നിറയുന്നതും കാണാം. ലൈഫ് ജാക്കറ്റിനുള്ളില്‍ കെട്ടിപ്പിടിച്ച നിലയില്‍ കഴിഞ്ഞ ദിവസം യുവതിയുടെയും നാലുവയസുകാരന്‍ മകന്റെയും മൃതദേഹം കണ്ടെത്തിയത് നൊമ്പരപ്പെടുത്തിയ സംഭവമായിരുന്നു. ആ അമ്മയെയും മകനെയും ദൃശ്യങ്ങളില്‍ കാണാം. ബോട്ടിന്റെ ഇടതുവശത്ത് മകനെ ചേര്‍ത്തുപിടിച്ചിരിക്കുന്ന അമ്മയുടെ ദൃശ്യങ്ങളാണ് വിഡിയോയില്‍ ഉള്ളത്.

അപകടമുണ്ടായതോടെ പരിഭ്രാന്തനായ ബോട്ട് ജീവനക്കാരന്‍ ലൈഫ് ജാക്കറ്റുകളുടെ വലിയ കെട്ടഴിക്കുന്നതും വിഡിയോയിലുണ്ട്. ബോട്ട് മുങ്ങാന്‍ തുടങ്ങുമ്പോഴാണിത്. പരിഭ്രാന്തരായി പായുന്ന യാത്രക്കാരില്‍ പലരും ലൈഫ് ജാക്കറ്റ് ധരിച്ചിട്ടില്ല എന്നതും ദൃശ്യങ്ങളില്‍ കാണാം. ബോട്ടില്‍ വേണ്ടത്ര സുരക്ഷാ സംവിധാനങ്ങളുണ്ടായിരുന്നില്ല എന്ന, രക്ഷപ്പെട്ടവരുടെ വാദങ്ങള്‍ക്ക് ബലം നല്‍കുന്നതാണ് പുറത്തുവന്ന ദൃശ്യങ്ങള്‍.

ജലത്തില്‍ സഞ്ചരിക്കുന്ന വാഹനങ്ങളില്‍ കയറുന്നതിനു മുന്‍പ് എല്ലാ യാത്രക്കാര്‍ക്കും ലൈഫ് ജാക്കറ്റ് നല്‍കുകയും അത് യാത്രക്കാര്‍ ശരിയായ രീതിയില്‍ ധരിച്ചുവെന്ന് ഉറപ്പാക്കുകയും ചെയ്യണമെന്നാണ് നിയമം. എന്നാല്‍ ഈ അടിസ്ഥാന നിയമം പോലും ലംഘിച്ചിരുന്നെന്ന് ജബര്‍പുരിലെ പ്രാഥമിക പരിശോധനയില്‍ കണ്ടെത്തിയിരുന്നു.

40ലേറെ വിനോദസഞ്ചാരികളാണ് അപകടത്തില്‍പ്പെട്ട ക്രൂസിലുണ്ടായിരുന്നത്. എന്നാല്‍ ടിക്കറ്റ് നല്‍കിയത് വെറും 29 യാത്രക്കാര്‍ക്കും. സ്ഥലത്ത് ഓറഞ്ച് അലര്‍ട്ട് പ്രഖ്യാപിച്ചിരുന്നിട്ടും അമിതമായി ആളുകളെ കയറ്റിയ ബോട്ടിന് ഡാമില്‍ പ്രവേശിക്കാന്‍ അനുമതി നല്‍കിയതും സുരക്ഷാലംഘനങ്ങളുടെ കൂട്ടത്തില്‍ പെടുന്നു. ഇതുവരെ 9 പേരുടെ മൃതദേഹങ്ങളാണ് കണ്ടെടുത്തത്. 3 കുട്ടികളടക്കം നാലുപേര്‍ക്കായി തിരച്ചില്‍ തുടരുകയാണ്