പമ്പാനദിയില് വന്തോതില് ജലനിരപ്പ് ഉയരുന്നു; ശബരിമലയില് ദര്ശനത്തിനെത്തരുതെന്ന് ഭക്തര്ക്ക് തിരുവിതാംകൂര് ദേവസ്വം ബോര്ഡിന്റെ മുന്നറിയിപ്പ്; പമ്പാനദിയ്ക്ക് കുറുകെയുള്ള പാലം വെള്ളം കയറിയ അവസ്ഥയില്
പമ്പാനദിയില് ജലനിരപ്പ് വന്തോതില് ഉയരുന്നതിനാല് ശബരിമലയില് ദര്ശനത്തിനെത്തരുതെന്ന് ഭക്തര്ക്ക് തിരുവിതാംകൂര് ദേവസ്വം ബോര്ഡ് മുന്നറിയിപ്പുനല്കി. പമ്പയിലെ വിവിധ ഡാമുകള് തുറന്നിരിക്കുന്ന പശ്ചാത്തലത്തില് ശബരിമലയിലേക്ക് പോകുന്നതിനുള്ള പമ്പാനദിയ്ക്ക് കുറുകെയുള്ള പാലം വെള്ളം കയറിയ അവസ്ഥയിലാണ്. വെള്ളം കയറി പമ്പയിലുണ്ടായിരുന്ന ദേവസ്വം ബോര്ഡിന്റെ നിര്മാണ പ്രവര്ത്തനങ്ങള്ക്ക് കനത്ത നാശനഷ്ടം ഉണ്ടായി. പമ്പാനദിയിലെ ജലനിരപ്പ് അപകടമാം വിധം ഉയരുകയായണ്. കക്കി, ആനത്തോട് ഡാമുകള് ഉള്പ്പെടെ ശബരിഗിരി പദ്ധതിയുടെ ഭാഗമായുള്ള ഡാമുകളുടെയെല്ലാം ഷട്ടറുകള് ജലനിരപ്പ് ഉയര്ന്നതിനെ തുടര്ന്ന് തുറന്നിരിക്കുകയാണ്. ഇതാണ് വെള്ളപ്പൊക്കം രൂക്ഷമാകാന് കാരണം. പമ്പയിലും ത്രിവേണിയിലും വെള്ളം കയറി. പാലങ്ങള് മുങ്ങി.
നിറപുത്തരി ആചാരത്തിന്റെ ഭാഗമായി ചൊവ്വാഴ്ച നടതുറക്കുമെങ്കിലും പമ്പയിലേക്കും ശബരിമലയിലേക്കും തീര്ഥാടകരെ കടത്തിവിടേണ്ട എന്നാണ് ജില്ലാ ഭരണകൂടത്തിന്റെയും ദേവസ്വം ബോര്ഡിന്റെയും തീരുമാനം. മുന്നറിയിപ്പ് അവഗണിച്ച് എത്തുന്ന തീര്ഥാടകരെ പമ്പയിലെത്തുന്നതിന് മുമ്പ് തടയും.
പമ്പാ നദിയിലെ വെള്ളത്തിന്റെ അപകടാവസ്ഥയ്ക്ക് മാറ്റം വരാതെ അയ്യപ്പഭക്തരെ പമ്പയില് നിന്ന് ശബരിമലയിലേക്ക് കടത്തിവിടാനാകില്ല. പമ്പയില് പൊലീസ് ബാരിക്കേഡ് സ്ഥാപിച്ചും വടം കെട്ടിയും അപകട മുന്നറിയിപ്പ് നല്കിയും അയ്യപ്പഭക്തര്ക്ക് സ്ഥിതിഗതികള് കൈമാറാന് സജ്ജമാണ്. അയ്യപ്പഭക്തര് അപകട മുന്നറിയിപ്പ് നിര്ദ്ദേശങ്ങള് മുഖവിലക്കെടുക്കണമെന്നും ദേവസ്വം ബോര്ഡ് ആവശ്യപ്പെട്ടു.
https://www.facebook.com/Malayalivartha
