തടിയമ്പാടിന് സമീപം പെരിയാറിലെ തുരുത്തില്‍ ഒറ്റപ്പെട്ട മൃഗങ്ങളാണ് പട്ടിണിയില്‍ വലഞ്ഞത്. പന്നി, പോത്ത്, പശുക്കള്‍, നായ്കള്‍, ആടുകള്‍ എന്നിവയായിരുന്നു തുരുത്തില്‍ കുടുങ്ങിയത്. സമീപവാസിയായ ഉടമസ്ഥന്‍ ഇവയെ തുരുത്തില്‍ ഷെഡ് കെട്ടിയാണ് വളര്‍ത്തിയിരുന്നത്.

അണക്കെട്ടിന്റെ ആദ്യ മൂന്ന് ഷട്ടറുകള്‍ തുറന്നപ്പോള്‍ തുരുത്ത് ഒറ്റപ്പെട്ടിരുന്നില്ല. എന്നാല്‍ അഞ്ചു ഷട്ടറുകള്‍ തുറന്നതോടെ തുരുത്ത് ഒറ്റപ്പെട്ടു. നാലുദിവസമായി ഒന്നും കഴിക്കാതെയുള്ള അവയുടെ കരച്ചില്‍ കേട്ടാണ് ഇയാള്‍ കുത്തൊഴുക്കുള്ള പുഴകടക്കാന്‍ തയ്യാറായത്. തുരുത്തില്‍ കുടുങ്ങിയ മിണ്ടാപ്രാണികളുടെ കരച്ചില്‍ അയാള്‍ക്ക് സഹിക്കാനായില്ല. അവയ്ക്കുള്ള ഭക്ഷണവുമായി പെരിയാറിന്റെ കൈവഴിയുടെ കുത്തൊഴുക്കിനെ നീന്തി മറികടന്നു. പട്ടിണികിടന്ന് ഒരാട് ചത്തിരുന്നു. ബാക്കിയുള്ളവയ്ക്ക് തീറ്റനല്‍കിയ ശേഷമാണ് അദ്ദേഹം മടങ്ങിയത്


കഴിഞ്ഞദിവസം അരിയുമായി രണ്ടുമൂന്ന് പ്രാവശ്യം തുരുത്തിലേക്ക് നീന്തി. അവിടെയത്തി ചോറുണ്ടാക്കി നായ്ക്കള്‍ക്കും പന്നിക്കും കൊടുത്തു. പശുവിനും ആടുകള്‍ക്കും പോത്തിനും ഇലവെട്ടിയിട്ട് കൊടുത്തു. അധികൃതരാരെങ്കിലും എത്തി മൃഗങ്ങളെ രക്ഷിക്കുമെന്നാണ് അദ്ദേഹം കരുതുന്നത്.