വെള്ളപ്പൊക്കത്തില്‍ അകപ്പെട്ട ഗര്‍ഭിണിയായ യുവതിയെ രക്ഷപ്പെടുത്തി സുഖപ്രസവം.ആലുവയില്‍ നാവികസേനയുടെ ഓപ്പറേഷന്‍ മദദിന്റെ ഭാഗമായിട്ടായിരുന്നു രക്ഷാപ്രവര്‍ത്തനം. ഡോക്ടറെ താഴേക്കിറക്കിയ ശേഷം യുവതിയെ പരിശോധിച്ചാണു ഹെലികോപ്റ്ററിലേക്കു കയറ്റിയത്.സജിതയും കുഞ്ഞും ആശുപത്രിയില്‍. നേവി പങ്കുവച്ച ചിത്രം.യുവതിയുടെ ആരോഗ്യനിലയില്‍ ആശങ്കയുണ്ടായതിനെത്തുടര്‍ന്നാണു ഡോക്ടറെ എത്തിച്ചത്. എന്നാല്‍ തികഞ്ഞ മനഃസംയമനത്തോടെ സജിത ജെബീല്‍ എന്ന ഇരുപത്തിയഞ്ചുകാരി നേവിയുടെ രക്ഷാപ്രവര്‍ത്തനത്തില്‍ സഹകരിച്ചു. നിറവയറുമായി ഹെലികോപ്ടറിലേക്ക് ഉയരുന്ന സജിതയുടെ വിഡിയോയും നാവികസേന പുറത്തുവിട്ടു.നെഞ്ചിടിപ്പിന്റെ നിമിഷങ്ങള്‍ക്കപ്പുറം വൈകാതെ ആശുപത്രിയിലെത്തിയ സജിത ഒരു ആണ്‍കുഞ്ഞിനു ജന്മം നല്‍കി. അമ്മയും കുഞ്ഞും സുഖമായിരിക്കുന്നു. ഇരുവരുടെയും ചിത്രങ്ങളും നാവിക സേന ട്വിറ്ററില്‍ പങ്കുവച്ചു. ക്യാപ്റ്റന്‍ വിജയ് വര്‍മയായിരുന്നു ഈ ഓപറേഷന്റെ പൈലറ്റ് ഇന്‍ കമാന്‍ഡ്.