പ്രളയാനന്തരമുണ്ടായ അതി കഠിനമായ വെയിലിലും കനത്ത ചൂടിലും നെല്പാടങ്ങള്‍ വിണ്ടു കീറുന്നത് കര്‍ഷകരെ വളരെയേറെ ആശങ്കയിലാക്കുന്നു. മണ്ണിലെ ജലാംശം വറ്റിയതോടെ ഭൂമി വിണ്ടു കീറുകയാണ്. ജില്ലയില്‍ കൂടുതല്‍ പ്രളയം ബാധിച്ച കോട്ടത്തറയിലെയും വെണ്ണിയോടിലെയും പല ഭാഗങ്ങളിലും വരള്‍ച്ച രൂക്ഷമാകുകയാണ്. ഏക്കര്‍ കണക്കിന് നെല്‍വയലുകളാണ് ആവശ്യമായ വെള്ളം ലഭിക്കാതെ വരണ്ടുണങ്ങിക്കിടക്കുന്നത്.

മൈലാടി, കാരക്കുന്ന്, വെണ്ണിയോട്, കരിഞ്ഞ് കുന്ന്, കുറുമണി തുടങ്ങിയ സ്ഥലങ്ങളിലാണ് വയലുകള്‍ വ്യാപകമായി വിണ്ടുകീറിക്കിടക്കുന്നത്. മഴ പെയ്ത സമയത്ത് ഒരുമാസത്തിലധികം വെള്ളം കെട്ടിനിന്ന പ്രദേശങ്ങളാണിത്. വെള്ളമിറങ്ങാത്തതിനാല്‍ ഏറെ വൈകിയാണ് കര്‍ഷകര്‍ നെല്‍കൃഷിക്ക് തയ്യാറെടുപ്പ് നടത്തിയത്. ഞാറ്് തയ്യാറാക്കുന്നതിനായി വിത്തുകള്‍ വിതച്ച വയലുകളില്‍ വളരെ പെട്ടെന്നുത്തന്നെ ജലാംശം കുറഞ്ഞിരുന്നു. മുളച്ചു ഞാറിന് പാകമായവ ഇപ്പോള്‍ കരിഞ്ഞുപോകുന്ന അവസ്ഥയിലാണ്.

വെള്ളപ്പൊക്കം മൂലം ഇത്തവണ മൂന്നാംതവണയാണ് കര്‍ഷകര്‍ നെല്‍കൃഷിയിറക്കുന്നത്. നല്ല വിത്ത് ഉപയോഗിച്ച് കൃഷി ചെയ്തതെല്ലാം പ്രളയത്തില്‍ ഒഴുകി പോയിട്ടും മിക്ക കര്‍ഷകരും പണം കടം വാങ്ങിയാണ് വീണ്ടും നെല്‍കൃഷി ചെയ്തത്. പതിവിന് വിപരീതമായി ഇത്തവണ ശക്തമായ വെയിലും ചൂടുമാണ് ഇവിടങ്ങളില്‍ അനുഭവപ്പെടുന്നത്. ഇതോടെ വലിയ പുഴയിലും ചെറുപുഴയിലും ജലനിരപ്പ് ക്രമാതീതമായി കുറഞ്ഞിട്ടുണ്ട്. പുഴയുടെ കൈവഴികളില്‍നിന്നും തോടുകള്‍ വഴിയാണ് കൃഷിപ്പാടങ്ങളിലേക്ക് കര്‍ഷകര്‍ അവശ്യത്തിന് വെള്ളം കണ്ടെത്തിയിരുന്നത്. ഇപ്പോള്‍ സമീപത്തുള്ള തോടുകള്‍ എല്ലാം തന്നെ വറ്റിയ അവസ്ഥയിലാണ്.
മഹാപ്രളയത്തില്‍ വെള്ളം മുക്കിയ പ്രദേശങ്ങള്‍ വറ്റിവരളുന്ന കാഴ്ചയാണ് ഇപ്പോഴുള്ളത്. വെള്ളപ്പൊക്കത്തിന്റെ ദുരിതങ്ങള്‍ വിട്ടുമാറും മുമ്പാണ് വളരെ പെട്ടെന്നുള്ള വരള്‍ച്ച കര്‍ഷകര്‍ക്ക് തിരിച്ചടിയാകുന്നത്. ഇത്തരത്തില്‍ കഷ്ടതയനുഭവിക്കുന്ന കര്‍ഷകര്‍ക്ക് അടിയന്തര സഹായമെത്തിക്കണമെന്നതാണ് കര്‍ഷകരുടെ ആവശ്യം.