കന്യാസ്ത്രീയെ പതിമൂന്ന് തവണ ബലാല്‍സംഗം ചെയ്ത മിഷണറീസ് ഓഫ് ജീസസ് ബിഷപ്പ് ഫ്രാങ്കോ മുളയ്ക്കലിന്റെ നുണകള്‍ പൊളിച്ചടുക്കാന്‍ പൊലീസ്. ബിഷപ്പിനെ താമസിക്കാതെ അറസ്റ്റ് ചെയ്ത ശേഷം നുണപരിശോധനയ്ക്ക് വിധേയമാക്കും. അതിനുള്ള ശാസ്ത്രീയമായ തയ്യാറെടുപ്പുകള്‍ പൊലീസ് സജ്ജമാക്കി. ബിഷപ്പിന്റെയും കന്യാസ്ത്രിയുടെയും മൊഴികളിലെ വൈരുദ്ധ്യം വ്യക്തമാക്കാനായി ബിഷപ്പിന്റെ സഹായിയെ കുറേ ദിവസം മുമ്പ് അന്വേഷണസംഘം കസ്റ്റഡിയില്‍ എടുത്തതായി അറിയുന്നു. കന്യാസ്ത്രീയുടെ പരാതിയില്‍ സഹായിയുടെ പേരും മറ്റ് വിവരങ്ങളും വ്യക്തമായി പറയുന്നുണ്ട്. ഹൈക്കോടതി മുന്‍ ജസ്റ്റിസ് കെമാല്‍ പാഷ ഡി.ജി.പിക്കെതിരെ രൂക്ഷമായ വിമര്‍ശനം നടത്തിയതിനെ തുടര്‍ന്ന് കാര്യങ്ങള്‍ കൈവിട്ട് പോകുമെന്ന് മനസിലാക്കിയ സര്‍ക്കാര്‍ ബിഷപ്പിനെ അറസ്റ്റ് ചെയ്യാനുള്ള അനുമതി നല്‍കുകയായിരുന്നു.

ബിഷപ്പ് ഫ്രാങ്കോയെ കേരളത്തിലെത്തിക്കാതെ തന്നെ കസ്റ്റഡിയില്‍ എടുക്കുന്ന കാര്യവും പൊലീസ് ആലോചിക്കുന്നുണ്ട്. കന്യാസ്ത്രീകളും ഒരുപറ്റം വിശ്വാസികളും ബിഷപ്പിനെതിരെ തിരിഞ്ഞതും അതിനെതിരെ സഭയും മറ്റ് സഭകളിലെ മതമേലധ്യക്ഷന്‍മരും പിന്തുണയ്ക്കാത്തതും സംഘര്‍ഷത്തിനുള്ള സാധ്യതയാണ്. ഇക്കാര്യം ഇന്റലിജന്‍സ് വിഭാഗം സര്‍ക്കാരിനെ ധരിപ്പിച്ചിട്ടുണ്ട്. തുടര്‍ന്നാണ് ബിഷപ്പിന്റെ കേസില്‍ നീതി നടപ്പാക്കുമെന്ന് ക്യാബിനെറ്റിന്റെ ചുമതലയുള്ള മന്ത്രി ഇ.പി ജയരാജനും മന്ത്രി ജെ.മേഴ്‌സിക്കുട്ടിയമ്മയും ഇന്ന് വ്യക്തമാക്കിയത്. ഒരു കുറ്റവാളിയേയും രക്ഷപെടുത്തുന്ന നടപടി സര്‍ക്കാര്‍ സ്വീകരിക്കില്ലെന്നും ഇ.പി ജയരാജന്‍ പറഞ്ഞു. 

ഭരണകക്ഷിയിലെ ചില ഉന്നതര്‍ ബിഷപ്പിനെ രക്ഷിക്കാന്‍ ആവുന്നതെല്ലാം ശ്രമിച്ചു. ഈ വകയില്‍ കോടികളാണ് പല കൈകളിലൂടെ കൈമറിഞ്ഞതെന്ന് ആക്ഷേപമുണ്ട്. ജലന്തറില്‍ നിന്ന് പിന്തുണ ഉറപ്പാക്കാന്‍ സംസ്ഥാനത്തെ ചില കോണ്‍ഗ്രസ് നേതാക്കള്‍ പഞ്ചാബ് മുഖ്യമന്ത്രി അടക്കമുള്ളവരുമായി സംസാരിച്ചെന്ന വിവരം അങ്ങാടിപ്പാട്ടാണ്. പഞ്ചാബിലെ കോണ്‍ഗ്രസ് ഭരണത്തിന്‍ തണലില്‍ ഫ്രാങ്കോ ഇപ്പോഴും സുരക്ഷതിനായി കഴിയുന്നത് ഇതിനാലാണ്. ഇടതുംവലതും ഒരുപോലെ കൈതാങ്ങി നിര്‍ത്തുന്നത് കൊണ്ടാണ് ബിഷപ്പ് മുന്‍കൂര്‍ജാമ്യാപേക്ഷയ്ക്ക് കോടതിയെ സമീപിക്കാത്തത്. സഭയുമായി ബന്ധമുള്ള ചില ഉന്നത പൊലീസ് ഉദ്യോഗസ്ഥരും കേസ് അട്ടിമറിക്കാനുള്ള ശ്രമങ്ങള്‍ക്ക് കരുത്തുപകരുന്നുണ്ട്.