മീ ടൂ ക്യാമ്പയിനിലൂടെ ടെസ് ജോസഫ് ഉന്നയിച്ച ആരോപണം മാധ്യമപ്രവര്‍ത്തകര്‍ ശ്രദ്ധയില്‍പ്പെടുത്തിയപ്പോള്‍ ഏത് പെണ്ണാണെന്ന എം.എല്‍.എ മുകേഷിന്റെ ചോദ്യം കേട്ട് പത്രക്കാര് ചിരിച്ചു. തിരിച്ച് ഏത് പെണ്ണായിരിക്കും എന്ന് ചോദിച്ചപ്പോള്‍ ' അത് പിന്നെ പെണ്ണിന്റെ പേരും മുഖവും ഓര്‍മയില്ലെന്ന് എം.എല്‍.എ പറഞ്ഞു. ബോളിവുഡ് കാസ്റ്റിംഗ് ഡയറക്ടര്‍ ടെസ് ജോസഫ് ആണ് ആരോപണം ഉന്നയിച്ചെന്ന് പറഞ്ഞപ്പോള്‍ അറിയില്ലെന്നും മുഖം ഓര്‍മയില്ലെന്നും പറഞ്ഞു. അപ്പോഴും ആരോപണം നിഷേധിക്കാന്‍ എം.എല്‍.എ തയ്യാറാകാഞ്ഞത് അദ്ദേഹത്തിന്റെ അങ്കലാപ്പ് എത്രത്തോളം ഉണ്ടായിരുന്നു എന്നത് വ്യക്തമാക്കുന്നതാണ്. ഏത് പെണ്ണ്? എപ്പോ, എവിടെ പറഞ്ഞെന്നും ചോദിച്ചു. കോടീശ്വരന്‍ പരിപാടിക്കിടെ നടന്ന സംഭവമാണെന്ന് പറഞ്ഞതോടെ 19 കൊല്ലം മുമ്പ് നടന്ന കാര്യം ഓര്‍മയില്ലെന്നും ഇത്രയും നാള്‍ അവര്‍ ഉറക്കമായിരുന്നോ, ഞാനിതൊക്കെ ചിരിച്ച് തള്ളുകയാണെന്നും മുകേഷ് പ്രതികരിച്ചു. 

സാധാരണ എല്ലാ ചോദ്യങ്ങളെയും സരസമായി നേരിടുന്ന മുകേഷ് ആരോപണം സംബന്ധിച്ചുള്ള ചോദ്യങ്ങളോട് ദേഷ്യപ്പെടുകയാണുണ്ടായത്. ആരാണ് ആരോപണം ഉന്നയിച്ചത്, എവിടുത്തുകാരിയാണ്, എവിടെയാണ് സംഭവം നടന്നത് തുടങ്ങിയ കാര്യങ്ങള്‍ മുകേഷിനെ അലട്ടി. കൊല്‍ക്കത്തക്കാരിയാണെന്നും ബോളിവുഡ് കാസ്റ്റിംഗ് ഡയറക്ടര്‍ ആണെന്നും അറിഞ്ഞപ്പോഴേക്കും അങ്കലാപ്പ് കൂടി. അവസാനം താന്‍ പരാതി നല്‍കില്ലെന്നും ഉന്നയിച്ച കാര്യങ്ങള്‍ രാഷ്ട്രീയ ആയുധമാക്കരുതെന്നും ടെസ് വ്യക്തമാക്കിയതോടെയാണ് എം.എല്‍.എയ്ക്ക് ആശ്വാസമായതെന്ന് സി.പി.എമ്മിലെ ചില വൃത്തങ്ങള്‍ പറയുന്നു.

മുകേഷിനെതിരെ ലൈംഗികാരോപണവുമായി വനിതാ കാസ്റ്റിംഗ് ഡയറക്ടര്‍ രംഗത്ത് വന്നതിന് പിന്നാലെ വന്‍ പ്രതിഷേധങ്ങളാണ് ഉയരുന്നത്. മി ടൂ ക്യാമ്പൈനില്‍ കുടുങ്ങിയ് എംഎല്‍എയുടെ കോലം കത്തിച്ച് കൊല്ലത്ത് യൂത്ത് കോണ്‍ഗ്രസ് പ്രവര്‍ത്തകര്‍ ദേശീയ പാത ഉപരോധിച്ചു. ഇതിനിടെ മുകേഷിനെതിരെ ബിന്ദു കൃഷ്ണയും രംഗത്ത് വന്നു. എംഎല്‍എ സ്ഥാനം രാജിവയ്ക്കണമെന്നായിരുന്നു ബിന്ദുകൃഷ്ണ ആവശ്യപ്പെട്ടത്.കൊല്ലത്ത് മുകേഷ് എംഎല്‍എ ഇല്ലാത്തത് കൊണ്ടു അദ്ദേഹം എത്താന്‍ സാധ്യതയുള്ള ഇടങ്ങളില്‍ പ്രതിഷേധം ശക്തമാക്കാനാണ് തീരുമാനം.

19 വര്‍ഷം മുമ്പ് കോടീശ്വരന്‍ എന്ന ടെലിവിഷന്‍ പരിപാടിയുടെ ഷൂട്ടിംഗിനിടെയാണ് മുകേഷ് തന്നോട് മോശമായി പെരുമാറിയതെന്ന് ടെസ് പറയുന്നത്. അന്ന് മുകേഷ് താമസിച്ചിരുന്ന ഹോട്ടല്‍ റൂമിനടുത്തേക്ക് തന്നോട് താമസം മാറാന്‍ ആവശ്യപ്പെട്ടിരുന്നതായും, പലതവണ ആവശ്യപ്പെട്ടതിനെ തുടര്‍ന്ന് അന്നത്തെ തന്റെ ചാനല്‍മേധാവിയായ ഡെറക് ഒബ്‌റമിനോട് പറഞ്ഞിരുന്നെന്നും, ഒരുമണിക്കൂറോളം ഇത് ചര്‍ച്ച ചെയ്തുവെന്നും ടെസ് ആരോപിക്കുന്നു. തുടര്‍ന്ന് അവിടെ നിന്നും തൊട്ടടുത്ത ഫ്‌ളൈറ്റില്‍ നാട്ടിലേക്ക് തിരിക്കാന്‍ ഡെറക് സഹായിച്ചുവെന്നും ടെസ് പറയുന്നു.