മീ ടു ക്യാമ്പയിന്റെ ഭാഗമായി സിനിമ നടനും രാഷ്ട്രീയ നേതാവുമായ മുകേഷിനെതിരെ ഉയർന്ന ആരോപണങ്ങൾ സമൂഹമാധ്യമങ്ങളിലടക്കം ചർച്ചാ വിഷയമാവുകയാണ്. അതേസമയം ആരോപണത്തിന്റെ പശ്ചാത്തലത്തില്‍ എംഎല്‍എ മുകേഷിനെതിരേ യൂത്ത് കോണ്‍ഗ്രസ് പോലീസില്‍ പരാതി നല്‍കിയിരിക്കുകയാണ്. ബോളിവുഡിലെ കാസ്റ്റിംഗ് ഡയറക്ടര്‍ ടെസ് ജോസഫിന്‍റെ വെളിപ്പെടുത്തലിന്റെ അടിസ്ഥാനത്തില്‍ കേസെടുക്കണമെന്ന് ആവശ്യപ്പെട്ടാണ് പരാതി നൽകിയിരിക്കുന്നത്.

19 വർഷങ്ങൾക്ക് മുൻപ് ഒരു സ്വകര്യ ചാനലിലെ ടെലിവിഷൻ ഷോയ്ക്കിടെ കാസ്റ്റിങ് ഡയറക്റ്ററായ തന്നെ ഹോട്ടൽ മുറിയിലെ ഫോണിൽ വിളിച്ച് ശല്യം ചെയ്യുകയും മുകേഷിന്റെ മുറിയുടെ തൊട്ടടുത്ത മുറിയിലേക്ക് മാറ്റാൻ ശ്രമിച്ചുവെന്നുമാണ് മുകേഷിനെതിരെ ടെസ് ഉയർത്തിയ ആരോപണം.

തനിക്ക് അന്ന് 20 വയസ്സ് മാത്രമാണ് ഉണ്ടായിരുന്നത്. അന്നത്തെ സ്ഥാപന മേധാവി ഡെറിക് ഒബ്രയാനാണ് പ്രശ്നത്തിൽ അന്ന് ഇടപെട്ടതും തന്റെ രക്ഷകനായതും. തന്റെ ബോസ്സുമായി ഇക്കാര്യം സംസാരിച്ചുവെന്നും തുടര്‍ന്ന് അദ്ദേഹം അടുത്ത ഫ്ലൈറ്റ് പിടിച്ചു തന്ന് അവിടെ നിന്നും രക്ഷപെടാൻ സഹായിക്കുകയായിരുന്നുവെന്നുമാണ് ടെസ് വെളിപ്പെടുത്തിയത്.

അതേസമയം മുകേഷ് രാജിവയ്ക്കണമെന്നും സംഭവത്തില്‍ അന്വേഷണം നടത്തണമെന്നും ആവശ്യപ്പെട്ട് കൊല്ലത്ത് യൂത്ത് കോണ്‍ഗ്രസ് പ്രവര്‍ത്തകര്‍ എംഎല്‍എയുടെ കോലം കത്തിച്ച ശേഷം ദേശീയപാത ഉപരോധിച്ചു. ഇതോടെ പോലീസ് മുകേഷിന്‍റെ സുരക്ഷ ശക്തമാക്കിയിരിക്കുകയാണ്. കൊല്ലത്തെ എംഎല്‍എയുടെ വീടിനും സുരക്ഷ ഏര്‍പ്പെടുത്തിയിട്ടുണ്ട്.