സംസ്ഥാനം മുഴുവന് പ്രതിഷേധാഗ്നി ; എന്ഡിഎയുടെ ശബരിമല സംരക്ഷണയാത്രയും ഇന്ന്; പന്തളത്ത് നിന്ന് ആരംഭിക്കുന്ന ജാഥ ആലപ്പുഴ കൊല്ലം ജില്ലകളിലെ പര്യടനത്തിന് ശേഷം 15 ന് തിരുവനന്തപുരത്ത് സമാപിക്കും
ശബരിമലയില് പ്രായഭേദമന്യേ സ്ത്രീകള്ക്ക് പ്രവേശനം അനുവദിച്ച സുപ്രീം കോടതി വിധിക്കെതിരെ കേരളം മുഴുവന് പ്രതിഷേധം അലയടിക്കുകയാണ്. വിവിധ സ്ഥലങ്ങളില് ഹിന്ദു സംഘടനകളുടെ നേതൃത്വത്തില് പ്രതിഷേധങ്ങള് സംഘടിപ്പിച്ചിട്ടുണ്ട്. അതേസമയം എന്ഡിഎ നടത്തുന്ന ശബരിമല സംരക്ഷണയാത്രക്കും ഇന്ന് ആരംഭിക്കും. വന് ജന പങ്കാളിത്തമാണ് പ്രതീക്ഷിക്കുന്നത്. പന്തളത്ത് നിന്ന് ആരംഭിക്കുന്ന ജാഥ ആലപ്പുഴ കൊല്ലം ജില്ലകളിലെ പര്യടനത്തിന് ശേഷം 15 ന് തിരുവനന്തപുരത്ത് സമാപിക്കും. ജാഥയുടെ വിവിധ ഘട്ടങ്ങളില് ദക്ഷിണേന്ത്യയിലെ പ്രമുഖ ബി ജെ പി. നേതാക്കളും ദേശീയ നേതാക്കളും പങ്കെടുക്കും.
ശബരിമലയില് പ്രായഭേദമന്യേ സ്ത്രീകള്ക്ക് പ്രവേശനം അനുവദിച്ച വിഷയത്തില് ശബരിമല കര്മ സമിതിയുടെ നേതൃത്വത്തില് സംസ്ഥാനത്തെ റോഡുകള് രാവിലെ ഒരു മണിക്കൂര് ഉപരോധിക്കും. വിവിധ ഹൈന്ദവ സംഘടനകളുടെ നേതൃത്വത്തില് സംസ്ഥാനത്തുടനീളം നടക്കുന്ന പ്രതിഷേധങ്ങള്ക്കിടെയാണ് ശബരിമല സംരക്ഷണയാത്രയുമായി എന്ഡിഎ രംഗത്തെത്തുന്നത്. ഇന്ന് രാവിലെ പത്ത് മണിക്ക് പന്തളം മണികണ്ഠനാല്ത്തറയില് നിന്ന് ജാഥ ആരംഭിക്കുംശബരിമലയിലെ വിവിധ ആചാരപരമായ ചടങ്ങുകള്ക്ക് നേതൃത്വം നല്കുന്ന ഭക്ത സമൂഹങ്ങളുടെ പ്രതിനിധികളും എന് ഡി എ സംസ്ഥാന നേതാക്കളും ചേര്ന്ന് ജാഥ ഉദ്ഘാടനം ചെയ്യും. ബി ജെ പി സംസ്ഥാന അധ്യക്ഷന് അഡ്വ. പി എസ് ശ്രീധരന് പിളളയാണ് ജാഥ നയിക്കുന്നത്.
ഉദ്ഘാടന സമ്മേളനത്തില് ബി ഡി ജെ എസ് നേതാവ് തുഷാര് വെള്ളാപ്പളളി, ബി ജെ പി തമിഴ്നാട് ഘടകം സംസ്ഥാന പ്രസിഡന്റ് തമിഴിസൈ സൗന്ദരരാജന് തുടങ്ങിയവര് പങ്കെടുക്കും. പത്തനംതിട്ടയിലെ പര്യടനം വൈകീട്ട് അടൂരില് അവസാനിക്കും. നാളെ ആലപ്പുഴയിലെ നൂറനാട് നിന്നും കായംകുളം വരെയും 12 ന് കൊല്ലം ചവറയില് നിന്നും കൊട്ടിയം വരെയും 14 ന് തിരുവനന്തപുരം ആറ്റിങ്ങല് മുതല് കഴക്കൂട്ടം വരെയും ജാഥ പര്യടനം നടത്തും. സമാപന ദിനമായ 15 ന് കഴക്കൂട്ടത്ത് നിന്ന് സെക്രട്ടറിയേറ്റ് കവാടത്തിലേക്കും ജാഥ പര്യടനം നടത്തും. 17 ന് നിലയ്ക്കലില് മഹിള മോര്ച്ചയുടെ നേതൃത്വത്തില് ഉപവാസ സത്യഗ്രഹവും ബി ജെ പി സംഘടിപ്പിച്ചിട്ടുണ്ട്.
ശബരിമല തീര്ഥാടന ഒരുക്കങ്ങള് തീരുമാനിക്കാന് ദേവസ്വം ബോര്ഡ് യോഗം ഇന്ന് ചേരും. ശബരിമലയിലെ സ്ത്രീ പ്രവേശന പ്രശ്നത്തില് സുപ്രീം കോടതി വിധിക്കെതിരെ പുന:പരിശോധനാ ഹര്ജി നല്കേണ്ടതില്ലെന്ന് സര്ക്കാരും ബോര്ഡും തീരുമാനിച്ച പശ്ചാത്തലത്തിലാണ് യോഗം. തുലാമാസ പൂജകള്ക്കായി പമ്പയ്ക്കപ്പുറം വനിതാ പൊലീസിനെ നിയോഗിക്കേണ്ടതില്ലെന്നാണ് ബോര്ഡിന്റെ വിലയിരുത്തല്. യുവതീ പ്രവേശനത്തിനെതിരെ ഉയരുന്ന പ്രതിഷേധം എങ്ങനെ നേരിടാമെന്നതും ചര്ച്ചാ വിഷയമാകും.
പമ്പയിലെ നിര്മാണപുരോഗതി വിലയിരുത്തലും അജണ്ടയിലുണ്ട്. നിലയ്ക്കലില് വനഭൂമി വിട്ടുകിട്ടുന്നതുമായി ബന്ധപ്പെട്ട് ഇന്നലെ ദേവസ്വം കമ്മിഷണറുടെ നേതൃത്വത്തില് ഡല്ഹിയില് നടത്തിയ ചര്ച്ചയുടെ വിശദാംശങ്ങളും യോഗത്തില് അവതരിപ്പിക്കും. അടുത്ത ദിവസങ്ങളില് ചേരുന്ന ശബരിമല ഉന്നതാധികാര യോഗത്തില് സ്വീകരിക്കേണ്ട നിലപാടുകളും ചര്ച്ചാ വിഷയമാകും.രാവിലെ 11ന് ദേവസ്വം ബോര്ഡ് ആസ്ഥാനത്താണ് യോഗം.
https://www.facebook.com/Malayalivartha
