ശബരിമലയില്‍ സ്ത്രീപ്രവേശനം അനുവദിച്ചു കൊണ്ടുള്ള സുപ്രീം കോടതിയുടെ ഉത്തരവ് മാനിച്ച്, ദേവഹിതം മറികടന്ന് മല ചവിട്ടുന്ന സ്ത്രീകളെ ഒന്നുകില്‍ പുലി അല്ലെങ്കില്‍ പുരുഷന്‍ പിടിക്കുമെന്ന് ദേവസ്വം ബോര്‍ഡ് മുന്‍ പ്രസിഡന്റ് പ്രയാര്‍ ഗോപാലകൃഷ്ണന്‍. യുവതികള്‍ ഈ സാഹചര്യം ഒഴിവാക്കാന്‍ ശബരിമലയില്‍ പോകാതിരിക്കുന്നതാണ് നല്ലത്. വിശ്വാസികളുടെ കുടുംബങ്ങളില്‍ നിന്ന് ആരും പോകില്ല.

ശബരിമലയില്‍ യുവതികള്‍ കയറിയാല്‍ പിന്നെ താന്‍ ദര്‍ശനത്തിന് പോകില്ലെന്നും പ്രയാര്‍ പറഞ്ഞു. പ്രസ്‌ക്ലബില്‍ മുഖാമുഖം പരിപാടിയില്‍ പങ്കെടുക്കുകയായിരുന്നു അദ്ദേഹം. അയ്യപ്പചൈതന്യം യുവതികള്‍ കയറിയാല്‍ നഷ്ടമാകും. ചൈതന്യം നഷ്ടമായ ഒരു ക്ഷേത്രത്തില്‍ പോയി പ്രാര്‍ഥിക്കുന്നതിലും നല്ലത് വീട്ടില്‍ അയ്യപ്പന്റെ ചിത്രത്തിനു മുമ്പില്‍ പ്രാര്‍ഥിക്കുകയാണ്. യുവതികളോടുള്ള വിരോധം കൊണ്ടല്ല അവര്‍ പോകരുതെന്ന് പറയുന്നത്. അവിടുത്തെ പ്രതിഷ്ഠയുടെ പ്രത്യേകത കൊണ്ടാണ്. അത് ലംഘിക്കാന്‍ ആര്‍ക്കും അവകാശമില്ലെന്നും പ്രയാര്‍ പറഞ്ഞു.

സുപ്രീംകോടതി വിധിക്കെതിരെ റിവ്യൂ ഹര്‍ജി നല്‍കാനും ഓര്‍ഡിനന്‍സ് പുറത്തിറക്കാനും സര്‍ക്കാര്‍ തയാറാകണം. നിയമനിര്‍മാണം നടത്തി സുപ്രീംകോടതി വിധി മറികടക്കാനുള്ള സാധ്യത ആരായണം. വിശ്വാസികളുടെ സമരമാണിതെന്നും ഇതിന്റെ പേരില്‍ പമ്പാ നദിയ്ക്ക് ചോരയുടെ നിറമുണ്ടാകാന്‍ അനുവദിക്കരുതെന്നും പ്രയാര്‍ പറഞ്ഞു. രണ്ടാം വിമോചനസമരമല്ല ഇവിടെ നടക്കുന്നത്. വിശ്വാസികളുടെ സമരമാണ്. എല്ലാമതങ്ങളിലെയും വിശ്വാസികളുടെ പിന്തുണ ഇതിനുണ്ട്. ശബരിമല വിഷയത്തില്‍ സര്‍ക്കാര്‍ കടുംപിടുത്തം വെടിയണമെന്നും നിയമനടപടികളുമായി മുന്നോട്ടു പോകുമെന്നും അദ്ദേഹം ആവശ്യപ്പെട്ടു