ശബരിമല യുവതി പ്രവേശന വിഷയത്തിൽ മുഖ്യമന്ത്രി പിണറായി വിജയനെതിരെ ആഞ്ഞടിച്ച് ജോസഫ് വാഴയ്ക്കന്‍ എംഎല്‍എ. പിണറായി വിജയന്‍റെ ധാര്‍ഷ്ട്യത്തിനെതിരെ ഒരു വിശ്വാസ സമൂഹം ഒന്നിച്ചു പ്രതികരിക്കുന്നതിനെ വര്‍ഗ്ഗീയ വത്കരിക്കാനും ആര്‍ എസ് എസ് എന്ന ഉമ്മാക്കി കാട്ടി ന്യൂനപക്ഷങ്ങളെ ഭീതിപ്പെടുത്താനും നടത്തുന്ന സ്ഥിരം അഭ്യാസങ്ങളുടെ ഭാഗമാണ് ശബരിമല വിഷയത്തില്‍ ഇപ്പോള്‍ നടക്കുന്നതെന്ന് ജോസഫ് വാഴയ്ക്കന്‍ അഭിപ്രായപ്പെട്ടു. ആര്‍ എസ് എസിന് ഇല്ലാത്ത വലുപ്പം ഉണ്ടാക്കരുതേ സഖാക്കളെ എന്ന പേരില്‍ പോസ്റ്റ്‌ ചെയ്ത ഫെയ്സ്ബുക്ക് കുറിപ്പിലാണ് കോണ്‍ഗ്രസ് നേതാവും മുന്‍ എം എല്‍ എയുമായ ജോസഫ് വാഴയ്ക്കന്‍ നിശിത വിമര്‍ശനവുമായി രംഗത്തെത്തിയത്.

ജോസഫ് വാഴയ്ക്കന്റെ ഫെയ്സ്ബുക്ക് പോസ്റ്റിന്റെ പൂര്‍ണ്ണരൂപം ഇങ്ങനെ;

ആർ എസ് എസിന് ഇല്ലാത്ത വലുപ്പം ഉണ്ടാക്കല്ലേ സഖാക്കളെ
ലക്ഷകണക്കിന് വരുന്ന അയ്യപ്പ ഭക്തരെ നിങ്ങൾ ആർ എസ് എസായി ചിത്രീകരിക്കല്ലേ. ഇന്നലെ ശബരിമലയിൽ ചുംബന സമരക്കാരി രഹന ഫാത്തിമയെ തടഞ്ഞവർ പല ഭാഷ സംസാരിക്കുന്ന സാക്ഷാൽ അയ്യപ്പ ഭക്തർ തന്നെ. അവരുടെ വിശ്വാസം സംരക്ഷിക്കാൻ നിറ കണ്ണുകളോടെ നിലത്തു കുത്തിയിരുന്ന് ശരണമന്ത്രം ജപിക്കുകയായിരുന്നു. എന്നിട്ട് പിണറായിയും ഇ പി ജയരാജനും കോടിയേരിയുമെല്ലാം ഇവരെ ആർ എസ് എസായി ചിത്രീകരിക്കുകയാണ്.

ഇതിലൊരു രാഷ്ട്രീയമുണ്ട്. പിണറായി വിജയന്റെ ധാർഷ്ട്യത്തിനെതിരെ ഒരു വിശ്വാസ സമൂഹം ഒന്നിച്ചു പ്രതികരിക്കുന്നതിനെ വർഗീയ വത്കരിക്കാനും ആർ എസ് എസ് എന്ന ഉമ്മാക്കി കാട്ടി ന്യൂനപക്ഷങ്ങളെ ഭീതിപെടുത്താനുമുളള സ്ഥിരം അഭ്യാസമാണ്. ഇത്തവണ ഇത് വെറും പാഴ് വേലയായി തീരുമെന്ന് തിരിച്ചറിയുക . ഇക്കാര്യത്തിൽ കേരളത്തിലെ മതവിശ്വാസികളും ഈശ്വര വിശ്വാസികളും ഒറ്റക്കെട്ടാണ്. ഈ സർക്കാരും സിപിഎമ്മും കഠിനാദ്ധ്വാനം ചെയ്ത് ഉണ്ടാക്കിയതാണ്‌ ഈ സാഹചര്യം.
ധിക്കാരം, അഹങ്കാരം, തൻ പ്രമാണിത്തം, അഹം ഭാവം ഇതിൽ ഏതെങ്കിലും ഒന്ന് ഉള്ളവർ തന്നെ നാശത്തിലേക്ക് നീങ്ങുന്നവരാണ്, ഈ നാലു സ്വഭാവവും ഒന്നിച്ചു കൊണ്ട് നടക്കുന്ന പിണറായി വിജയൻ സർവ നാശത്തിലേക്കു നീങ്ങുന്നു എന്നത് ഉറപ്പായി കഴിഞ്ഞു ; ശബരിമല പ്രശ്നം കൈകാര്യം ചെയ്യുന്ന രീതി നോക്കൂ, ആരോടാണ് ഈ യുദ്ധം?

സുപ്രീം കോടതി വിധി നടപ്പിലാക്കാനുള്ള അടക്കാനാവാത്ത ഈ ആവേശത്തിന്റെ കാരണം എന്താ? എത്രയോ വിധികൾ ഇവിടെ പൂഴ്ത്തി വച്ചിട്ടുണ്ട് ; അതോ അവസാനം വരെ കൂടെ നിന്നിട്ടു കാല് വാരിയ RSS നോടുള്ള പക ആണോ?അതോ ഒത്തുകളിയോ ? അതിനു ശബരിമലഃ വിശ്വാസികൾ എന്ത് പിഴച്ചു?

ഒരു കാര്യം വളരെ ശ്രദ്ധേയമാണ് കഴിഞ്ഞ ദിവസങ്ങളിൽ മലകയറാൻ വന്ന സുഹാസിനി രാജ് മുതൽ ചുംബന സമരകാരി രെഹന ഫാത്തിമാ വരെ ഉള്ളവർ വിശ്വാസികൾ അല്ല പ്രകോപനം ഉണ്ടാകാൻ സിപിഎം സ്പോൺസർ ചെയ്തവർ ആണ്, പക്വത ഉള്ള ഒരു ഭരണാധികാരിക് ഒട്ടും ചേർന്നതല്ല ഇത്തരം തറവേലകൾ. നിങ്ങൾ സർവ നാശത്തിലേക്കു ഈ നാടിനെ എത്തിച്ചിരിക്കുന്നു.

ഗാന്ധിയൻ മാർഗത്തിൽ തങ്ങളുടെ വിശ്വാസം സംരക്ഷിക്കാൻ ആയിരങ്ങൾ തെരുവിൽ ഇറങ്ങി ശരണമന്ത്രം ജപിക്കുകയാണ് ഉണ്ടായത്. ഇത് കണ്ട്‌ കാല് മാറ്റിചവിട്ടി പാർട്ടി കൊടിയുമായി ഇതിന് ഓരം പറ്റി നിന്ന് അക്രമം നടത്തുന്നവർ ഗാന്ധിജിയുടെ അനുയായികളല്ല,ഗോഡ്‌സെ യുടെ അനു യായികൾ തന്നെയാണ്, സിപിഎമ്മും RSS ഉം ചേർന്ന് നമ്മുടെ നാടിനെ നശിപ്പിക്കും

വിശ്വാസികൾ കരുതിയിരിക്കുക