ശബരിമലയില്‍ യുവതികളെ പ്രവേശിപ്പിക്കണമെന്ന സുപ്രീംകോടതി വിധിക്കെതിരെ അയ്യപ്പ ഭക്തർ ശകതമായ പ്രതിഷേധവുമായി മുന്നോട്ട് പോവുകയാണ്. അതേസമയം വിധിക്ക് പിന്നാലെ നട തുറന്ന ശേഷം എത്തിയ സ്ത്രീകള്‍ എല്ലാവരും തന്നെ പ്രതിഷേധത്തെ തുടര്‍ന്ന് മലയിറങ്ങി. നാളെ നട അടയ്ക്കാനിരിക്കെയും ബിജെപിയും ഹൈന്ദവ സംഘടനകളും പ്രതിഷേധത്തില്‍ നിന്ന് പിന്നോട്ട് പോയിട്ടില്ല.

ശബരിമല സ്ത്രീപ്രവേശനം പിണറായി സര്‍ക്കാരിനെതിരേയുള്ള രാഷ്ട്രീയ ആയുധമാക്കി മാറ്റിരിക്കുകയാണ് ബിജെപി. അതേസമയം പ്രതിഷേധങ്ങള്‍ക്കിടയിൽ സർക്കാരിനെതിരെ രൂക്ഷ വിമർശങ്ങൾ ഉന്നയിച്ചും കാണിക്കയായി ശബരിമലയിൽ പണമിടരുതെന്നും ഇതര സംസ്ഥാനത്ത് നിന്ന് എത്തുന്നവരോട് ആവശ്യപ്പെടുന്ന വീഡിയോ സോഷ്യൽ മീഡിയയിൽ വ്യാപകമായി പ്രചരിക്കുകയാണ്.

ശബരിമലയിലെത്തുന്ന വിശ്വാസികളോട് കാണിക്കയായി പണമിടരുതെന്ന് സംഘപരിവാര്‍ നേതാക്കള്‍ ആവശ്യപ്പെടുന്നു എന്ന തലക്കെട്ടിലാണ് വീഡിയോ പ്രചരിക്കുന്നത്. എന്നാൽ ദൃശ്യങ്ങളിൽ എത്രമാത്രം വസ്തുത ഉണ്ട് എന്നത് വ്യകതമല്ല.

ശബരിമല യുവതീപ്രവേശന വിവാദം കത്തി നില്‍ക്കുന്ന പശ്ചാത്തലത്തിലാണ് ഇത്തരത്തിലൊരു ആഹ്വാനത്തിന്റെ ദൃശ്യങ്ങൾ പുറത്തു വരുന്നത്. ബസിലിരിക്കുന്ന അയ്യപ്പ ഭക്തരോടാണ് അഭ്യര്‍ത്ഥനാസ്വരത്തില്‍ രണ്ട് പ്രവര്‍ത്തകര്‍ സര്‍ക്കാരിനെതിരെ വ്യാജ പ്രചാരണം നടത്തുന്നത്. അയ്യപ്പന് പണം വേണ്ടെന്നും പാവപ്പെട്ടവര്‍ക്ക് കൊടുക്കാനും ഒരു രൂപ പോലും നല്‍കരുതെന്നും പ്രവര്‍ത്തകര്‍ വീഡിയോയില്‍ പറയുന്നു.

പൈസ വാങ്ങിയിട്ട് പിണറായി വിജയന്റെ സിപിഎം സര്‍ക്കാര്‍ ഹിന്ദുവിന്റെ കഴുത്തു കണ്ടിക്കുകയാണെന്നും ഇവര്‍ പറയുന്നു. മക്കയ്ക്ക് പോകുന്നതിന് മുസ്‌ലിംകള്‍ക്ക് കെഎസ്‌ആര്‍ടിസി ബസ് സൗജന്യമായി നല്‍കുന്നു. നിലയ്ക്കലില്‍ നിന്ന് പമ്പ വരെ പോകുന്നതിന് നാല്‍പ്പത് രൂപ കൊടുക്കണം. നമ്മള്‍ ഹിന്ദുക്കള്‍ ഇന്ത്യയില്‍ അല്ലേ ജീവിക്കുന്നത്. ഹിന്ദുക്കള്‍ക്കും, മുസ്ലീങ്ങള്‍ക്കും ക്രിസ്ത്യാനികള്‍ക്കും വേറെ വേറെ നിയമങ്ങളാണോ?

ശബരിമലയില്‍ എ​ത്തിയാല്‍ ഒരാള്‍ പോലും ഒരു രൂപ പോലും ക്ഷേത്രത്തില്‍ കാണിക്കയായി നല്‍കരുത്. മാത്രമല്ല അരണവണയോ പ്രസാദമോ ഒന്നും വാങ്ങരുത്. അയ്യപ്പന്‍ സര്‍വ്വ ഇടത്തും ഉണ്ട്. അയ്യപ്പന് പണം വേണ്ട. ശബരിമല ഉള്‍പ്പെടെയുള്ള ക്ഷേത്രത്തിലെ വരുമാനം പിണറായി സര്‍ക്കാര്‍ ദുരുപയോഗം ചെയ്യുകയാണ്.

അയ്യപ്പനോട് സര്‍ക്കാര്‍ കാണിക്കുന്ന ഈ ക്രൂരതയാണ് കേരളത്തില്‍ പ്രളയത്തിന് കാരണമായത്. എന്നാല്‍ സര്‍ക്കാര്‍ ഇതില്‍ നിന്നൊന്നും പഠിച്ചിട്ടില്ല. അതുകൊണ്ട് നമ്മളാല്‍ കഴിയുന്നത് ചെയ്യണം എന്ന് ഇവര്‍ ആവശ്യപ്പെടുന്നതായും വീഡിയോയില്‍ കാണാം.

നേരത്തെ, ശബരിമല ഉള്‍പ്പെടെയുള്ള ക്ഷേത്രങ്ങളിലെ വരുമാനം സര്‍ക്കാര്‍ ദുരുപയോഗം ചെയ്യുന്നുവെന്ന ബിജെപി,സംഘപരിവാര്‍ പ്രചാരണത്തിനെതിരെ സര്‍ക്കാര്‍ രംഗത്ത് വന്നിരുന്നു.