പത്തു ദിവസത്തെ പൂജ അവധിക്കു ശേഷം സുപ്രീം കോടതി ഇന്ന് തുറക്കുമ്പോൾ ശബരിമല വിഷയത്തിൽ തങ്ങൾക്ക് അനുകൂലമായ വിധി വരുമെന്ന് ഏറെ പ്രതീക്ഷയോടെ കാത്തിരിക്കുകയാണ് ഭക്തർ.ശബരിമല വിധി പുനഃപരിശോധിക്കണം എന്നാവശ്യപ്പെട്ട് ഇതുവരെ ഇരുപതോളം ഹർജികൾ കോടതിയിൽ എത്തിയിട്ടുണ്ട്.ഇതുകൂടാതെ ശബരിമലയിൽ അന്യമതക്കാർ കയറുന്നത് തടയണമെന്ന് ആവശ്യപ്പെട്ട് അയ്യപ്പ പ്രചാരസഭയും ഇന്ന് കോടതിയിൽ ഹർജി നൽകുന്നുണ്ട്.പുതിയ ഹർജികൾ ഉൾപ്പെടെയുള്ള ഹർജികൾ എപ്പോൾ പരിഗണിക്കുമെന്നുള്ളത് സുപ്രീംകോടതി നാളെ തീരുമാനിക്കും

മണ്ഡല കാലം വരാനിരിക്കെ വിഷയത്തിൽ ഇനിയുള്ള കോടതി വിധി വളരെ നിർണ്ണായകമാണ്. ഇതിന്റെ അടിസ്ഥാനത്തിലാകും നടപടികൾ ഉണ്ടാവുക.യുവതി പ്രവേശന വിഷയത്തിൽ ഇപ്പോൾ നടക്കുന്ന കോലാഹലങ്ങൾ കണക്കിലെടുത്താവും വിധി ഉണ്ടാവുക എന്ന പ്രതീക്ഷയിലാണ് ഒരു കൂട്ടം അയ്യപ്പ വിശ്വാസികൾ. ഇതുവരെ 8 യുവതികൾ ശബരിമലയിൽ പോയെങ്കിലും ആളിക്കത്തുന്ന പ്രതിഷേധത്തെ തുടർന്ന് സന്നിധാനത്ത് കയറാൻ സാധിക്കാതെ മടങ്ങി.

അതേസമയം തന്നെ വിഷയത്തിൽ നിലവിലെ സാഹചര്യo വിശദീകരിച്ചുകൊണ്ടുള്ള റിപ്പോർട്ട് ദേവസ്വം ബോർഡ് സുപ്രീം കോടതിക്ക് നൽകുവാൻ തീരുമാനിച്ചിരിക്കുന്നു .എന്നാൽ വിഷയത്തിൽ സർക്കാരിന്റെ നിലപാട് ഇതുവരെയും വ്യക്തമാകീട്ടില്ല . ആയതിനാൽ ഇതുമായി ബന്ധപ്പെട്ട് ദേവസ്വം ബോർഡ് പ്രസിഡന്റ് മുഖ്യമന്ത്രിയെ ഇന്ന് കാണും.