ശബരിമലയെ തകര്‍ക്കാനുള്ള നീക്കത്തില്‍ നിന്ന് സര്‍ക്കാരും മുഖ്യമന്ത്രിയും പിന്‍മാറണമെന്ന് ബി.ജെ.പി സംസ്ഥാന അധ്യക്ഷന്‍ പി.എസ് ശ്രീധരന്‍ പിള്ള ആവശ്യപ്പെട്ടു. ബി.ജെ.പി കോര്‍കമ്മിറ്റി യോഗ ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. 17ന് നിലയ്ക്കലില്‍ ലാത്തിച്ചാര്‍ജ്ജ്, മാധ്യമപ്രവര്‍ത്തകര്‍ക്ക് നേരെ ആക്രമണം എന്നിവ നടന്നു. അല്ലാതെ എന്താണ് നടന്നത്. അത് ചെറുതായി കാണുന്നില്ല. കുറ്റക്കാര്‍ക്കെതിരെ നടപടി വേണം. നിലയ്ക്കല്‍ ലാത്തിച്ചാര്‍ജ്ജില്‍ ജുഡീഷ്യല്‍ അന്വേഷണം വേണം. ശബരിമല അപകടമേഖലയെന്ന് വരുത്തിത്തീര്‍ക്കാന്‍ ശ്രമം നടക്കുന്നു. ഇത് ശബരിമലയെ തകര്‍ക്കാനാണ്. തുലാമാസത്തില്‍ ഭക്തരുടെ എണ്ണം കുറഞ്ഞു. ദൈനംദിനകാര്യങ്ങള്‍ നിയന്ത്രിക്കാന്‍ ദേവസ്വം മന്ത്രിക്ക് എന്ത് അധികാരം. മുഖ്യമന്ത്രിയുടെ പ്രവര്‍ത്തനത്തിന്റെ ഭാഗമല്ല ശബരിമല. എന്‍.ഡി.എയുടെ ഒന്നാംഘട്ട ശബരിമല സമരം വിജയമാണെന്നും അദ്ദേഹം പറഞ്ഞു.

നിയന്ത്രണങ്ങള്‍ ശബരിമലയെ തകര്‍ക്കും. നിരീശ്വരവാദികളായ കമ്മ്യൂണിസ്റ്റുകാര്‍ക്ക് എന്ത് അവകാശം. ഹൈക്കോടതി പോലും അതിനെതിരെ കമന്റ് വന്നു. ഈ നീക്കത്തില്‍ നിന്ന് സര്‍ക്കാര്‍ മാറണം. ജനഹിതമാണ് ജനാധിപത്യത്തിന്റെ അഭിലാഷം. ആചാര അനുഷ്ഠാനങ്ങള്‍ക്ക് അനുസരിച്ച് പോകാനാഗ്രഹിക്കുന്നവരാണ് 99 ശതമാനം സ്ത്രീകളും. വിശ്വാസികളുടെ വിശ്വാസത്തെ മാനിച്ച് മുഖ്യമന്ത്രി ഏറ്റുമുട്ടലില്‍ നിന്ന് മാറണം. കമ്മ്യൂണിസ്റ്റ് കുടുംബത്തിലുള്ളവര്‍ പോലും ശബരിമലയില്‍ സര്‍ക്കാര്‍ നിലപാട് തെറ്റാണെന്ന് പറഞ്ഞ് എന്‍.ഡി.എ സമരത്തില്‍ വന്നു. വരുംദിവസങ്ങളിലും ധാരാളം പേര്‍ വരും.

ഏറ്റുമുട്ടല്‍ വേണ്ട, വിധി നടപ്പാക്കാന്‍ സമയം നിശ്ചയിച്ചിട്ടില്ല. 2006 സെപ്തംബര്‍ പ്രകാശ്‌സിംഗ് ബാദല്‍ കേസില്‍ കോടിയേരിയോട് പൊലീസിനെ ആഭ്യന്തരമന്ത്രി നിയന്ത്രിക്കേണ്ടെന്ന് പറഞ്ഞു. 1-1-2007 മുതല്‍ നടപ്പാക്കണമെന്നും സുപ്രീംകോടതി പറഞ്ഞു. അത് എന്തേ നടപ്പാക്കിയില്ല. ഇക്കാര്യം കോടിയേരിയും മുഖ്യമന്ത്രിയും വിശദീകരിക്കണം. ഈ വിധിയില്‍ റിവ്യൂ കൊടുത്തിട്ടിരിക്കുകയാണ്. കേരള പൊലീസ് ആക്ടിലെ 2011 ലെ ഭേഗഗതി കൊണ്ടുവന്നത് കോടിയേരിയാണ്. സെന്‍കുമാറിനെ ഡി.ജി.പി ആക്കി പുനര്‍ നിയമിക്കുന്ന കാര്യത്തില്‍ കോടതി അലക്ഷ്യം വന്നപ്പോഴാണ് സര്‍ക്കാര്‍ ഇടപെട്ടത്.

നടതുറക്കുന്ന അഞ്ചിന് മുമ്പ് വിശ്വാസികള്‍ പ്രതിഷേധം നടത്തും. എട്ട് മുതല്‍ കാസര്‍കോട് ആരംഭിച്ച് 13ന് പമ്പയില്‍ അവസാനിക്കുന്ന ശബരിമല സംരക്ഷണ രഥയാത്ര സംഘടിപ്പിക്കും. എല്ലാ മതവിശ്വാസികളും പങ്കെടുക്കും. എല്ലാവരുടെയും പിന്തുണ നേടും. ബി.ജെ.പി- ബി.ഡി.ജെ.എസ് അധ്യക്ഷന്‍മാര്‍ യാത്രയ്ക്ക് നേതൃത്വം നല്‍കും. വിശ്വാസം മൗലികാവകാശമാണ്. അതിനായി ഭരണഘടനയ്ക്ക് അനുസരിച്ച് സഹനസമരം ബി.ജെ.പിയും എന്‍.ഡി.എയും നടത്തും. പൊലീസിനെയും സി.പി.എമ്മിന്റെ വനിതാ പ്രവര്‍ത്തകരെയും ശബരിമലയില്‍ എത്തിക്കാന്‍ നീക്കം നടക്കുന്നുണ്ട്. അത് അരുത് എന്നേ പറയാനുള്ളൂ. ലോക്‌സഭാ തെരഞ്ഞെടുപ്പില്‍ രണ്ട് മുന്നണികളെയും പരാജയപ്പെടുത്തി ബി.ജെ.പി വലിയ ശക്തിയാകുമെന്നും പി.എസ് ശ്രീധരന്‍പിള്ള വാര്‍ത്താസമ്മേളനത്തില്‍ അറിയിച്ചു.