ചിത്തിര ആട്ടവിശേഷത്തിന് ശബരിമല അഞ്ചാം തീയതി നടതുറക്കാനിരിക്കെ ഏതു വിധേനയും യുവതികളെ കയറ്റാന്‍ പോലീസും സര്‍ക്കാരും തന്ത്രങ്ങള്‍ മെനയുമ്പോള്‍ അതേ നാണയത്തില്‍ തിരിച്ചടിക്കാനൊരുങ്ങി ബിജെപിയും. കഴിഞ്ഞ തുലാമാസ പൂജകള്‍ക്ക് ബിജെപിക്ക് കിട്ടിയ വന്‍പിച്ച ജന പിന്തുണയും ജനം ടിവിയ്ക്ക് ലഭിച്ച വലിയ റേറ്റിങും ദേശീയ നേതാക്കളെ പോലും അമ്പരപ്പിച്ചിട്ടുണ്ട്. ഇത് അതു പോലെ നിലനിര്‍ത്തിയാല്‍ വരുന്ന ലോക് സഭാ തെരഞ്ഞെടുപ്പില്‍ വലിയ നേട്ടം കൊയ്യാനാകുമെന്നാണ് ബിജെപി വിശ്വസിക്കുന്നത്. ഇതിന്റെ തയ്യാറെടുപ്പുകള്‍ ബിജെപി തുടങ്ങികഴിഞ്ഞു.

വനിതാ പ്രവര്‍ത്തകരെയും പോലീസിനെയുമുപയോഗിച്ച് തന്ത്രപൂര്‍വ്വം അഞ്ചാം തീയതി നട തുറക്കുമ്പോള്‍ സര്‍ക്കാര്‍ യുവതികളെ സന്നിധാനത്തെത്തിക്കുമെന്നും, ഇതു തടയാന്‍ വിശ്വാസികളെ ബിജെപി സഹായിക്കുമെന്നും ബിജെപി സംസ്ഥാന പ്രസിഡന്റ് പിഎസ് ശ്രീധരന്‍പിള്ള. സര്‍ക്കാര്‍ തന്ത്രങ്ങള്‍ വിലപോകില്ലെന്നും അദ്ദേഹം പറഞ്ഞു. പാര്‍ട്ടി സംസ്ഥാന നേതൃത്വയോഗത്തിനുശേഷം സംസാരിക്കുകയായിരുന്നു.
രണ്ടാംഘട്ട സമരത്തിന് എന്‍ഡിഎ രൂപം നല്‍കിയിട്ടുണ്ട്. ഇന്നു മണ്ഡലങ്ങള്‍ തോറും പുരര്‍പ്പണ പ്രതിജ്ഞയെടുക്കും. നാളെ കോട്ടയത്ത് സമരപ്രഥ്യാപന സമ്മേളനം 4,5,6 തീയതികളില്‍ വിശ്വാസികളുടെ സമരത്തിനു പിന്തുണ ഉറപ്പാക്കാന്‍ ബിജെപി പ്രവര്‍ത്തകര്‍ ശബരിമലയിലുണ്ടാകും. 8 മുതല്‍ 13 വരെ ശബരിമല സംരക്ഷണ രഥയാത്ര കാസര്‍കോട്ടു നിന്നാരംഭിച്ച് ശബരിമലയില്‍ സമാപിക്കും.
പാര്‍ലമെന്റ് തിരഞ്ഞെടുപ്പു പ്രചാരണത്തിനു നല്ല തുടക്കം കുറിക്കാനായെന്ന് ബിജെപി നിഗമനം. ബൂത്തുതലം മുതല്‍ സന്ദേശമെത്തിക്കുന്നതിനു കേന്ദ്ര നേതൃത്വം നിര്‍ദ്ദേശിച്ച സമയത്തിനു മുമ്പേ സാധിച്ചുവെന്നു ബിജെപി സംസ്ഥാന പ്രസിഡന്റ് പിഎസ് ശ്രീധരന്‍പിള്ള പറഞ്ഞു. ശബരിമലയില്‍ എന്‍ഡിഎ നടത്തിയ ആദ്യഘട്ട സമരം പൂര്‍ണവിജയമായിരുന്നുവെന്നും പറഞ്ഞ ശ്രീധരന്‍പിള്ള രണ്ടാം ഘട്ട സമരത്തിലേക്ക് ഇടതു നേതാക്കളെുമെത്തുമെന്നും അവകാശപ്പെട്ടു.